സര്‍ക്കാര്‍ ജോലി നേടമെന്നത് ഏറ്റവും വലിയ ആഗ്രഹം; സാമ്പത്തികബാധ്യത കൂടിയപ്പോള്‍ വിദേശത്തേക്കും പോയി; 12 വര്‍ഷത്തോളം ഓട്ടോ ഓടിച്ചു; 23 വര്‍ഷം കാത്തിരുന്നു.. ഒടുവില്‍ ജംഷീര്‍ നേടിയെടുത്ത വിജയം

വണ്ടൂരിലെ കുറ്റിയിലൊരു വീട്ടില്‍ ഈ ഓണം മറ്റെല്ലാവരുടെയും ഓണത്തെക്കാള്‍ പ്രത്യേകമാണ്. 23 വര്‍ഷത്തെ കാത്തിരിപ്പിനും നൂറോളം പിഎസ്സി പരീക്ഷകള്‍ക്കുമൊടുവിലാണ് ജംഷീറിന്റെ വലിയ സ്വപ്‌നമായിരുന്ന സര്‍ക്കാര്‍ ജോലി വീട്ടിലെത്തിയത്. ഒരു കാലത്ത് ഓട്ടോറിക്ഷയില്‍ യാത്രക്കാരോട് ചോദിച്ചറിഞ്ഞു പഠിച്ചിരുന്ന ജംഷീര്‍ ഇന്ന് പെരിന്തല്‍മണ്ണ പോളിടെക്നിക് കോളേജിലെ വാച്ച്മാനായി ചുമതലയേറ്റു. കഷ്ടപ്പെട്ട് നേടിയ വിജയത്തിന്റെ കഥയാണ് ജംഷീറിന് പറയാനുള്ളത്.

വണ്ടൂരിലെ കുറ്റിയില്‍ താമസിക്കുന്ന ഗുഡ്സ് ഓട്ടോ ഡ്രൈവര്‍ ഒറവുങ്ങല്‍ ജംഷീര്‍ (41) ഏറെ നാളായി സ്വപ്‌നം കണ്ടിരുന്നത് ഒരു സ്ഥിരമായ സര്‍ക്കാര്‍ ജോലി നേടണമെന്നായിരുന്നു. ഈ ഓണത്തില്‍ ആ സ്വപ്‌നം സഫലമായത് അദ്ദേഹത്തിനും കുടുംബത്തിനും വലിയ ആഘോഷമായി. ഓണസമ്മാനമായി കിട്ടിയ പോലെ ഒന്നാം തീയതി പെരിന്തല്‍മണ്ണ പോളിടെക്നിക് കോളേജില്‍ വാച്ച്മാനായി ചുമതലയേറ്റു. ചുമതലയേറ്റ ദിവസത്തില്‍ തന്നെ അദ്ദേഹം ഏറെ വികാരാധീനനായിരുന്നു. 23 വര്‍ഷമായി കാത്തിരുന്ന ജീവിതത്തിലെ ഏറ്റവും വലിയ ലക്ഷ്യമാണ് ഇപ്പോള്‍ കൈവരിച്ചത് എന്ന ബോധ്യം അദ്ദേഹത്തിന്റെ മുഖത്ത് തെളിഞ്ഞുനിന്നു.

സര്‍ക്കാര്‍ ജോലി സ്വന്തമാക്കണമെന്നത് ജംഷീറിന്റെ ഹൃദയത്തിലെ വലിയ ആഗ്രഹമായിരുന്നു. കുടുംബച്ചെലവ് കണ്ടെത്താന്‍ ഓട്ടോറിക്ഷ ഓടിച്ചുകൊണ്ടിരുന്നപ്പോഴും പഠനം നിര്‍ത്തിയില്ല. രാത്രി വൈകിയും പുലര്‍ച്ചെ നേരത്തെയും സമയം കണ്ടെത്തി പുസ്തകങ്ങള്‍ തുറന്നിരുന്നു. യാത്രക്കാരോടു സംസാരിച്ചും, അവരുടെ അനുഭവങ്ങള്‍ കേട്ടും, പിഎസ്സി പരീക്ഷക്കുള്ള അറിവ് കൂടി ശേഖരിച്ചു. ഒടുവില്‍ ലഭിച്ച നിയമന ഓര്‍ഡര്‍ അദ്ദേഹത്തിനും കുടുംബത്തിനും ഒരുപാട് സന്തോഷം സമ്മാനിച്ചു. പ്ലസ്ടുവിന് ശേഷം ജംഷീര്‍ അരീക്കോട് ഐടിഐയില്‍ ഒരു വര്‍ഷത്തെ കോഴ്സ് ചെയ്തു. അതിന് പിന്നാലെ തന്നെ ഒരു സ്ഥിര ജോലി കിട്ടുമെന്നായിരുന്നു പ്രതീക്ഷ. പക്ഷേ അത് സംഭവിച്ചില്ല. ഒടുവില്‍ കാത്തിരിപ്പും ശ്രമവും നീണ്ടു പോയത് മുഴുവന്‍ 23 വര്‍ഷമായി. ഇടക്കിടെ ജീവിതം മുന്നോട്ട് കൊണ്ടുപോകാന്‍ വിദേശത്തേക്കും പോയി. എന്നാല്‍ അവിടത്തെ ജോലി അദ്ദേഹത്തിന് യോജിച്ചില്ല, പലതവണ ശ്രമിച്ചിട്ടും കാര്യമായി മുന്നേറാന്‍ കഴിഞ്ഞില്ല. നാട്ടിലേക്ക് തിരിച്ചെത്തിയപ്പോള്‍ സ്വന്തം ജീവിതം മുന്നോട്ട് കൊണ്ടുപോകാനായി ഓട്ടോറിക്ഷ ഓടിക്കുകയായിരുന്നു വഴിയെന്ന് തീരുമാനിച്ചു.

ഇങ്ങനെ 12 വര്‍ഷത്തോളം ഓട്ടോറിക്ഷ ഓടിച്ചു കുടുംബം നോക്കിക്കൊണ്ടിരിക്കുമ്പോഴും ജംഷീര്‍ തന്റെ സ്വപ്‌നം ഉപേക്ഷിച്ചില്ല. ജോലിക്കിടയിലും ഇടവേളകളിലും, രാത്രിയിലും പുലര്‍ച്ചെയുമെല്ലാം സമയം കണ്ടെത്തി പിഎസ്സിക്കായി പഠിച്ചു. പുസ്തകങ്ങള്‍ വാങ്ങി, ക്ലാസുകള്‍ കേട്ടു, യാത്രക്കാരോട് സംസാരിച്ചും പല വിഷയങ്ങളും പഠിച്ചു. സ്ഥിര ജോലി നേടാന്‍ വേണ്ടിയുള്ള ആഗ്രഹം തന്നെ അദ്ദേഹത്തെ പഠനത്തിലേക്ക് തിരിച്ചെത്തിച്ച ശക്തിയായിരുന്നു. ഉദ്യോഗസ്ഥരോ വിദ്യാര്‍ഥികളോ ഓട്ടോറിക്ഷയില്‍ കയറിയാല്‍ അവരോടൊക്കെ വിവിധ വിഷയങ്ങള്‍ ചോദിച്ചു പഠിക്കും. ഓട്ടോറിക്ഷ മുഴുവന്‍ സമയവും അങ്ങാടിയില്‍ ഇട്ടു കാത്തിരിക്കണം. ഇതു പഠനത്തിനു പ്രയാസമുണ്ടാക്കിയപ്പോള്‍ 4 വര്‍ഷം മുന്‍പു ഗുഡ്‌സ് ഓട്ടോറിക്ഷ വാങ്ങി. വീട്ടിലിട്ട് ആവശ്യക്കാര്‍ വിളിക്കുമ്പോള്‍ ഓടും. ബാക്കി സമയം മുഴുവന്‍ പരിശീലനം. വായന തുടര്‍ന്നു. മൊബൈല്‍ ഫോണില്‍ പരിശീലന ക്ലാസുകള്‍ കേട്ടു.

ഇതുവരെ നൂറിനടുത്തു പിഎസ്സി പരീക്ഷകള്‍ എഴുതിയിട്ടുണ്ടെന്നു ജംഷീര്‍ പറയുന്നു. ഫോറസ്റ്റ്, എക്‌സൈസ് വകുപ്പുകളിലടക്കം റാങ്ക് ലിസ്റ്റുകളില്‍ ഉള്‍പ്പെട്ടെങ്കിലും നിയമനമായില്ല. പ്രായം കൂടുന്നതൊന്നും ജംഷീറിന്റെ പഠിക്കാനുള്ള ആവേശത്തെ തളര്‍ത്തിയില്ല. പിഎസ്സി എഴുതാനുള്ള പ്രായപരിധിക്കുള്ളില്‍ തന്നെ ജോലി നേടണമെന്നതു വാശിയായിരുന്നു. അടുത്തറിയുന്ന പലരും പ്രോത്സാഹിപ്പിച്ചു. ജോലിയായതിന്റെ തൊട്ടുപിന്നാലെ വിവിധ വകുപ്പുകളിലേക്കുള്ള ഡ്രൈവര്‍ നിയമന ലിസ്റ്റിലും ജംഷീര്‍ ഇടംപിടിച്ചിട്ടുണ്ട്. മറ്റ് ഏത് തൊഴിലിനൊപ്പവും പരിശ്രമിക്കാന്‍ മനസ്സുണ്ടെങ്കില്‍ പഠനത്തിനു സമയം കിട്ടുമെന്നു ജംഷീര്‍ പറയുന്നു. കൂട്ടുകാരോടൊക്കെ ഇക്കാര്യം പറയാറുണ്ട്. ഓണസമ്മാനമായി സര്‍ക്കാര്‍ ജോലി വീട്ടിലെത്തിയതിന്റെ സന്തോഷത്തിലാണ് ഭാര്യ ഫസ്‌നയും മക്കളായ ഹാഷിം നിഹാലും മുഹമ്മദ് നിദാനും ഐസ മെഹറിനും.