നാനിയുടെ നായികയായി കീര്‍ത്തി സുരേഷ്; പാന്‍ ഇന്ത്യന്‍ ചിത്രം ദസറയിലെ നടിയുടെ ക്യാരക്ടര്‍ പോസ്റ്റര്‍ പുറത്ത്

തെന്നിന്ത്യന്‍ താരം നാനിയെ നായകനാക്കി നവാഗതനായ ശ്രീകാന്ത് ഒഡേല സംവിധാനം ചെയ്യുന്ന ചിത്രമാണ് 'ദസറ'. ശ്രീ ലക്ഷ്മി വെങ്കിടേശ്വര സിനിമാസിന്റെ ബാനറില്‍ സുധാകര്‍ ചെറുകുരി നിര്‍മ്മിക്കുന്ന ചിത്രം നാനിയുടെ ഏറ്റവും വലിയ പ്രോജക്റ്റുകളില്‍ ഒന്നാണ്. കീര്‍ത്തി സുരേഷാണ് ഈ മാസ് ആക്ഷന്‍ എന്റര്‍ടെയ്‌നറില്‍ നായികയായി എത്തുന്നത്. കീര്‍ത്തി സുരേഷിന്റെ ജന്മദിനത്തോടനുബന്ധിച്ച് താരത്തിന്റെ പ്രത്യേക പോസ്റ്റര്‍ അണിയറപ്രവര്‍ത്തകര്‍ പുറത്തിറക്കി യിരിക്കുകയാണ്. 

മാസ് ലുക്കില്‍ പവര്‍പാക്കായാണ് കീര്‍ത്തിയും എത്തുന്നത്. കഴിഞ്ഞ ദിവസം നാനിയുടെ ഫസ്റ്റ് ലുക്ക് പോസ്റ്ററും, ചിത്രത്തിലെ ആദ്യ ഗാനവും റിലീസ് ചെയ്തിരുന്നു.പെദ്ദപ്പള്ളി ജില്ലയിലെ ഗോദാവരികാനിയിലെ സിംഗരേണി കല്‍ക്കരി ഖനിയില്‍ സ്ഥിതി ചെയ്യുന്ന ഒരു ഗ്രാമത്തില്‍ നടക്കുന്ന കഥയാണ് ദസറ പറയുന്നത്. ഇതില്‍ നാനി അവതരിപ്പിക്കുന്ന കഥാപാത്രവും ഏറെ ശ്രദ്ധേയമാണ്. നാനി തെലുങ്കാന ഭാഷയാണ് കൈകാര്യം ചെയ്യുന്നത് എന്നതും മറ്റൊരു പ്രത്യേകതയാണ്. താരത്തിന്റെ ആദ്യ ബിഗ് ബജറ്റ് പാന്‍ ഇന്ത്യന്‍ ചിത്രം കൂടിയാണ് ദസറ. സിനിമയ്ക്ക് വേണ്ടിയുള്ള നാനിയുടെ ഗെറ്റപ്പ് ചേഞ്ച് ഒക്കെത്തന്നെ മാധ്യമശ്രദ്ധ ആകര്‍ഷിച്ചിരുന്നു.

സമുദ്രക്കനി, സായ് കുമാര്‍, സറീന വഹാബ് എന്നിവരാണ് ചിത്രത്തിലെ മറ്റ് പ്രധാന അഭിനേതാക്കള്‍, സത്യന്‍ സൂര്യന്‍ ഐഎസ്സി ഛായാഗ്രഹണം നിര്‍വഹിക്കുന്ന ചിത്രത്തിന്റെ സംഗീതം സന്തോഷ് നാരായണനാണ്. ചിത്രം തെലുങ്ക്, തമിഴ്, കന്നഡ, മലയാളം, ഹിന്ദി ഭാഷകളില്‍ റിലീസ് ചെയ്യും. പ്രൊഡക്ഷന്‍ ബാനര്‍ ശ്രീ ലക്ഷ്മി വെങ്കിടേശ്വര സിനിമാസ്, ഛായാഗ്രഹണം സത്യന്‍ സൂര്യന്‍, എഡിറ്റര്‍ നവീന്‍ നൂലി, പ്രൊഡക്ഷന്‍ ഡിസൈനര്‍ അവിനാഷ് കൊല്ല, എക്സിക്യൂട്ടീവ് പ്രൊഡ്യൂസര്‍ വിജയ് ചഗന്തി, സംഘട്ടനം അന്‍ബറിവ്, പിആര്‍ഒ ശബരി എന്നിവരാണ് ചിത്രത്തിന്റെ അണിയറപ്രവര്‍ത്തകര്‍.