തകര്‍പ്പന്‍ ഒന്നാംഭാഗത്തിന് ശേഷം സ്റ്റീഫന്‍ നെടുമ്പള്ളിയെ വീണ്ടും വെള്ളിത്തിരയിലെത്തിക്കാന്‍ പൃഥ്വിരാജ്; രണ്ടാം ഭാഗത്തിന്റെ പ്രഖ്യാപനം ലാലേട്ടനടങ്ങുന്ന ലൂസിഫര്‍ ടീമിന്റെ സാന്നിധ്യത്തില്‍; എമ്പുരാന്‍ ഒരുങ്ങുക അടുത്തവര്‍ഷമെന്ന് വ്യക്തമാക്കി പൃഥ്വി

‘ലൂസിഫർ എന്ന ആശയം ഉടലെടുത്തുപ്പോൾ മലയാളത്തിന് ചിന്തിക്കാൻ കഴിയാത്തൊരു ബജറ്റ് ആയിരുന്നു ആ പ്രോജക്ടിനു വേണ്ടിയിരുന്നത്. അടുത്തഘട്ടത്തിലേയ്ക്ക് കഥ വളരണമെങ്കിൽ മലയാളം ഇൻഡസ്ട്രിയും അതിനനുസരിച്ച് വളരണമായിരുന്നു. ലൂസിഫർ എന്ന സിനിമയിലൂടെ അത് സംഭവിച്ചു. അവിടെ നിന്നാണ് ലൂസിഫർ 2 എന്ന സിനിമ സാധ്യമാകും എന്ന് തീരുമാനിക്കുന്നത്. ഈ സിനിമയിൽ നിങ്ങൾ കാണാൻ പോകുന്ന കഥയുടെ ചർച്ച തുടങ്ങുന്നതും ലൂസിഫറിന്റെ വിജയത്തിൽ നിന്നാണ്.’–പൃഥ്വിരാജ് പറഞ്ഞു.

ലൂസിഫർ 2 എന്നത് ലൂസിഫർ സിനിമയുടെ തുടർക്കഥയല്ല, അവിടെ ഈ കഥാപാത്രങ്ങൾ എങ്ങനെ എത്തി എന്നതാണ് ചിത്രം പറയുന്നത്. അതിനോടൊപ്പം ലൂസിഫറിന്റെ തുടർച്ചയും ചിത്രത്തിൽ ഉണ്ടാകും. എമ്പുരാൻ എന്നാണ് സിനിമയുടെ പേര്.’–പൃഥ്വിരാജ് വ്യക്തമാക്കി.

‘അടുത്തവർഷം ചിത്രത്തിന്റെ ചിത്രീകരണം തുടങ്ങും. റിലീസിനെപറ്റി ഇപ്പോൾ പറയാനാകില്ല. താരങ്ങളെപറ്റിയും ധാരണയില്ല. എന്നാൽ ഷൂട്ട് ചെയ്യേണ്ട ലൊക്കേഷൻസ് തീരുമാനിച്ചു കഴിഞ്ഞു.’–പൃഥ്വി പറഞ്ഞു.

സിനിമയുടെ മറ്റുവിവരങ്ങളെക്കുറിച്ച് പിന്നീട് അറിയാക്കാമെന്ന് പൃഥ്വി പറഞ്ഞു. നിർമാതാവ് ആന്റണി പെരുമ്പാവൂർ, തിരക്കഥാകൃത്ത് മുരളി ഗോപി എന്നിവരും ഇവർക്കൊപ്പമുണ്ടായിരുന്നു.