മമ്മൂട്ടി ചിത്രം കളങ്കാവല് കാണാനുള്ള കാത്തിരിപ്പിലാണ് ഏവരും. സിനിമയുമായി ബന്ധപ്പെട്ട് സോഷ്യല് മീഡിയകളില് നിരവധി പോസ്റ്റുകളും മറ്റും പ്രത്യക്ഷപ്പെടുന്നുമുണ്ട്. ഇക്കൂട്ടത്തില് മമ്മൂട്ടിയെ കുറിച്ച് പോസ്റ്റര് ഡിസൈനര് ആന്റണി സ്റ്റീഫന്സ് ക്രോം പങ്കുവച്ച വാക്കുകള് ശ്രദ്ധനേടിയിരിക്കുകയാണ്. കഴിഞ്ഞ ദിവസം കളങ്കാവല് പ്രീ റിലീസ് ടീസര് ലോഞ്ചില് അണിയറ പ്രവര്ത്തകരെ എല്ലാവരെയും സ്റ്റേജിലേക്ക് ക്ഷണിച്ച് മമ്മൂട്ടി പരിചയപ്പെടുത്തിയിരുന്നു. ഇതുമായി ബന്ധപ്പെട്ടായിരുന്നു ആന്റണിയുടെ വാക്കുകള്.
ചന്ദ്രനില് പോയി തിരിച്ചുവന്ന നീല് ആംസ്ട്രോങ് അനുഭവിച്ച അതേ മാനസികാവസ്ഥയാണ് ഇപ്പോഴും തന്റെയുള്ളില് എന്നാണ് ആന്റണിയുടെ കുറിപ്പ്. റോഷാക്ക് എന്ന ചിത്രത്തിന്റെ പോസ്റ്ററുകള് കണ്ട് മമ്മൂട്ടി നേരിട്ട് അഭിനന്ദിച്ച അനുഭവവും ആന്റണി പങ്കുവെച്ചു.
റോഷാക്കിന്റെ പോസ്റ്ററുകള് ചെയ്തു അയച്ചു കൊടുത്ത് അതിന്റെ റിസള്ട്ട് എന്താണെന്നു അറിയാതെ ഫുള് ടെന്ഷനില് ഇരിക്കുമ്പോള് ജോര്ജേട്ടന് വിളിച്ചു, മമ്മുക്ക എന്നെ കാണണം എന്ന് പറഞ്ഞിരിക്കുന്നു... സ്ക്രീനില് മാത്രം കണ്ടിരുന്ന മമ്മുക്കയെ നേരില് കാണുന്നതില് അതിയായ സന്തോഷവും, പോസ്റ്ററുകള് കണ്ടിട്ട് എന്താവും അദ്ദേഹം പറയാന് പോകുന്നത് എന്നാലോചിച്ചു പരിഭ്രമവും തോന്നി... എന്തായാലും മമ്മുക്കയെ കാണാം, കൂടെ നിന്ന് ഒരു ഫോട്ടോ എടുക്കാം എന്ന ചിന്തയില് ഞാന് ഇറങ്ങി.
കടവന്ത്രയിലെ വീടിന്റെ ഗേറ്റുകള് ഓരോന്നായി എന്റെ മുന്നില് തുറന്നു, സന്ദര്ശകര്ക്കായുള്ള ഇടത്തില് ഇരിക്കവേ ചില്ലുവാതില് തള്ളി തുറന്നു മുന്നിലേക്ക് വന്നു. 'ഡിസൈനര്' അല്ലേ? എപ്പോഴുമുള്ള ആ ഗൗരവ ഭാവം വിടാതെതന്നെ ചോദിച്ചു. ഉള്ളില് നിന്നും പൊന്തി വന്ന അന്താളിപ്പിനെ മറച്ചു വെക്കാന് ശ്രമിച്ചു കൊണ്ട് 'അതേ' എന്ന് ഞാന് പറഞ്ഞു. 'ലാപ്ടോപ്പോ ടാബോ ഒന്നും ഇല്ലേ ?' എന്റെ ശൂന്യമായ കൈകളിലേക്ക് നോക്കി മമ്മുക്ക ചോദിച്ചു. അബദ്ധം മനസ്സിലായ ഞാന് ചമ്മലോടു കുടി ഇല്ലന്ന് പറഞ്ഞു.
ചെറുതായി ചിരിച്ചു കൊണ്ട് മമ്മുക്ക അദ്ദേഹത്തിന്റെ ഫോണ് തുറന്ന് ഞാന് അയച്ചു കൊടുത്ത പോസ്റ്റര് ഓരോന്നായി എടുത്ത് അഭിപ്രായം പറയാന് തുടങ്ങി. എല്ലാം മമ്മുക്കക്ക് ഇഷ്ടപ്പെട്ടിരിക്കുന്നു.. ഫോണ്ട് സൈസ് വലുതാക്കല് പോലുള്ള ചെറിയ തിരുത്തലുകള് മാത്രം. കുറച്ചു നേരം സംസാരിച്ചു. ഈ രീതിയില് മുന്നോട്ട് പോകട്ടെ എന്ന് പറഞ്ഞു മമ്മുക്ക എന്നെ യാത്രയാക്കി. ആ പരിഭ്രമത്തിനിടയില് ഫോട്ടോ എടുത്തോട്ടെ എന്ന് ചോദിക്കാന് തോന്നിയില്ല.
ശേഷം മമ്മുക്കയോടൊപ്പം 5 സിനിമയില് വര്ക്ക് ചെയ്തു. പലതവണ കണ്ടു. പക്ഷേ അപ്പോളൊക്കെയും ഒപ്പം നിന്ന് ഒരു പടം എടുക്കണം എന്ന ആഗ്രഹം സാധിച്ചില്ല. ഇന്നലെ കളംകാവലിന്റെ ലോഞ്ച് ഫങ്ക്ഷനില് പോകുമ്പോള് ഇന്നെന്തായാലും എടുക്കണം എന്ന് ആഗ്രഹിച്ചിരുന്നു. പക്ഷെ ഇങ്ങനെ സ്റ്റേജിലേക്ക് വിളിച്ചു ചേര്ത്ത് നിര്ത്തികൊണ്ടാവുമെന്നു വിചാരിച്ചില്ല.
താങ്ക് യു മമ്മുക്ക. ചന്ദ്രനില് പോയിട്ട് തിരിച്ചുവന്ന നീല് ആംസ്ട്രോങ് അനുഭവിച്ച അതെ മാനസികാവസ്ഥയാണ് ഇതെഴുതുമ്പോഴും എന്റെയുള്ളില്...'.- ആന്റണി കുറിച്ചതിങ്ങനെ മമ്മൂട്ടിക്കൊപ്പമുള്ള തന്റെ ചിത്രങ്ങളും അദ്ദേഹം കുറിപ്പിനൊപ്പം പോസ്റ്റ് ചെയ്തിട്ടുണ്ട്.
Premium Lifestyle and Entertainment website
അവസാന ഷോട്ട് ഓകെ പറഞ്ഞതോടെ ജോര്ജ്ജ് കുട്ടിയും സംഘവും പാക്ക് അപ്പ്; കേക്ക് മുറിച്ച് സെറ്റിലെ അണിയറ പ്രവര്ത്തകര്ക്കൊപ്പം സന്തോഷം പങ്കിട്ട് മോഹന്ലാലും ജിത്തു ജോസഫും