പടേക്കറിനെതിരെ ലൈംഗീക ആരോപണം ഉന്നയിച്ച തനുശ്രി ദത്തിന് വക്കീല്‍ നോട്ടീസ്; വ്യാജ ആരോപണത്തില്‍ മാപ്പ് പറയണമെന്നും പടേക്കര്‍; വൈല്‍ഡ് കാര്‍ഡ് എന്‍ട്രി വഴി ഹിന്ദി ബിഗ്‌ബോസില്‍ തനുശ്രി  പ്രവേശിച്ചാല്‍ തടയുമെന്ന് നവനിര്‍മാണ്‍ സേന

ബോളിവുഡ് നടി തനുശ്രീ ദത്ത് പ്രശസ്ത നടന്‍ നാനാ പടേക്കറിനെതിരെ ഉന്നയിച്ച് ലൈംഗിക ആരോപണം ഹിന്ദി സിനിമ മേഖലയില്‍ ചൂടു പിടിക്കുകയാണ്. അതിനെ തുടര്‍ന്ന് തനുശ്രീ ദത്തയ്‌ക്കെതിരെ നാനാ പടേക്കര്‍ വക്കീല്‍ നോട്ടീസ് അയച്ചതായി അഗ്‌നിഹോത്രി ദേശീയ മാധ്യമമായ എഎന്‍ഐ യോട് വെളിപ്പെടുത്തിയിരുന്നു. തനുശ്രീ ദത്ത് തനിക്കെതിരെ ഉന്നയിച്ച വ്യാജ ആരോപണത്തിന് മാപ്പ്് പറയണമെന്ന് ആവശ്യപ്പെട്ടാണ് നാനാ പടേക്കര്‍ വക്കീല്‍ നോട്ടീസ് അയച്ചിരിക്കുന്നത്. എന്നാല്‍ തനിക്ക് ഇങ്ങനെയൊരു വക്കീല്‍ നോട്ടീസ് കിട്ടിയിട്ടില്ല എന്ന് തനുശ്രീ ആദ്യം വെളിപ്പെടുത്തിയിരുന്നെങ്കിലും കഴിഞ്ഞ ദിവസം തനിക്ക് ലോട്ടീസ് ലഭിച്ചതായി നടി അറിയിച്ചു.

എനിക്കിന്ന് രണ്ട് വക്കീല്‍ നോട്ടീസുകള്‍ ലഭിച്ചു. ഒന്ന് നാനാ പടേക്കറില്‍ നിന്നും മറ്റൊന്ന് വിവേക് അഗ്നിഹോത്രിയില്‍ നിന്നും. ഇന്ത്യയില്‍ പീഡനത്തിനും അനീതിക്കുമെതിരെ ശബ്ദമുയര്‍ത്തുന്നതിന് നല്‍കേണ്ട വിലയാണിതെന്നും നടി പറയുന്നു. പൊതു ഇടങ്ങളില്‍ എനിക്കെതിരെ നുണ പ്രചാരണങ്ങള്‍ നടത്തുകയാണ് ഇരുവരും. ഇവരെ പിന്തുണയ്ക്കുന്നവരും എനിക്കെതിരെ അനാവശ്യമായ ആരോപണങ്ങള്‍ ഉന്നയിക്കുകയും വാര്‍ത്താ സമ്മേളനങ്ങളിലും മറ്റും വന്ന് പൊട്ടിത്തെറിക്കുകയും ചെയ്യുന്നുണ്ട്, തനുശ്രീ ദത്ത പറഞ്ഞു.

2008ല്‍ ഹോണ്‍ ഓക്കെ പ്ലീസ് എന്ന ചിത്രത്തിന്റെ ഷൂട്ടിങ്ങിനിടയില്‍ നാനാ പടേക്കര്‍ തന്നോട് മോശമായി പെരുമാറുകയും തന്നെ സ്പര്‍ശിക്കുകയും ചെയ്തതായി അടുത്തിടെ തനുശ്രീ ദത്ത പറഞ്ഞിരുന്നു. കൂടാതെ ചോക്ലേറ്റ് എന്ന ചിത്രത്തിന്റെ സെറ്റില്‍വച്ച് തന്നോട് വസ്ത്രമഴിക്കാന്‍ വിവേക് അഗ്നിഹോത്രി ആവശ്യപ്പെട്ടതായുമാണ് തനുശ്രീ ദത്ത വെളിപ്പെടുത്തിയത്.

എന്നാല്‍ ഇതിനിടെ നാനനാപടേക്കറിനും അഗ്നിഹോത്രിക്കുമെതിരെ ലൈംഗിക പീഡനാരോപണം നടത്തിയ തനുശ്രീ ദത്തയെ ബിഗ് ബോസ് പരിപാടിയില്‍ പങ്കെടുപ്പിച്ചാല്‍ ആക്രമണം നേരിടേണ്ടി വരുമെന്ന് കളേഴ്‌സ് ചാനലിനോടും വിയാകോം 18നോടുമാണ് നവനിര്‍മ്മാണ്‍ സേനയുടെ ഭീഷണി. വൈല്‍ഡ് കാര്‍ഡ് എന്‍ട്രിയിലൂടെ ബിഗ്ബോസിലെത്താന്‍ തനുശ്രീ ശ്രമിക്കുന്നുണ്ടെന്ന് നടി രാഖി സാവന്ത് ആരോപിച്ചിരുന്നു. മറാത്തി നടന്മാരെയും പാര്‍ട്ടിയെയും അപമാനിക്കാന്‍ തനുശ്രീ ശ്രമിക്കുന്നുവെന്നും ഇത് അനുവദിക്കാന്‍ കഴിയില്ലെന്നുമാണ് എംഎന്‍സിന്റെ നിലപാട്.

മഹാരാഷ്ട്ര നവനിര്‍മ്മാണ്‍ സേന തലവന്‍ രാജ് താക്കറേ ഗുണ്ടയാണെന്ന് തനുശ്രീ ആരോപിച്ചിരുന്നു. സ്ത്രീകളെ ആക്രമിക്കുന്നവരെ ഒരിക്കലും നേതാവ് എന്ന് വിളിക്കാന്‍ സാധിക്കുകയില്ലെന്നും തനുശ്രീ മുമ്പ് ഒരു അഭിമുഖത്തില്‍ പറഞ്ഞിരുന്നു. ഇതാണ് സംഘടനെയെ ചൊടിപ്പിക്കാന്‍ കാരണം.