ദിലീപ് കുറ്റക്കാരനാണെന്ന് ഒരു ഘട്ടത്തിലും തോന്നിയിട്ടില്ല; അതിനുള്ള ഒരു തെളിവും എന്റെ പക്കലില്ല; കോടതി വിധിയില്‍ വിശ്വാസം; അതിജീവിതയ്ക്കൊപ്പമെന്നും രമേഷ് പിഷാരടി

നടിയെ ആക്രമിച്ച കേസില്‍ കോടതി വിധിയെ പൂര്‍ണ്ണമായി വിശ്വസിക്കുന്നുവെന്ന് നടന്‍ രമേഷ് പിഷാരടി. നടന്‍ ദിലീപ് കുറ്റക്കാരനാണെന്ന് തനിക്ക് ഒരു ഘട്ടത്തിലും തോന്നിയിട്ടില്ലെന്നും, എന്നാല്‍ അതിജീവിതയ്‌ക്കൊപ്പമാണ് താന്‍ നിലകൊള്ളുന്നതെന്നും അദ്ദേഹം വ്യക്തമാക്കി. വോട്ട് രേഖപ്പെടുത്തിയ ശേഷം മാധ്യമങ്ങളോട് സംസാരിക്കുകയായിരുന്നു രമേഷ് പിഷാരടി. 

പൊതുജനങ്ങളും മാധ്യമങ്ങളും ചേര്‍ന്ന് തീരുമാനിക്കുന്ന ഒരു നീതിയും, കോടതി തെളിവുകളുടെയും വസ്തുതകളുടെയും അടിസ്ഥാനത്തില്‍ തീരുമാനിക്കുന്ന മറ്റൊരു നീതിയും ഉണ്ടെന്ന് രമേഷ് പിഷാരടി ചൂണ്ടിക്കാട്ടി.
ഈ രണ്ട് നീതികളും തമ്മില്‍ പൊരുത്തക്കേടുകള്‍ ഉണ്ടാകാമെന്നും, താന്‍ ആഗ്രഹിക്കുന്ന വിധി എപ്പോഴും കോടതിയില്‍ നിന്ന് വരണമെന്നില്ലെന്നും അദ്ദേഹം പറഞ്ഞു. നിലവിലെ സാഹചര്യത്തില്‍ കോടതി പറയുന്ന കാര്യങ്ങള്‍ വിശ്വസിക്കുക മാത്രമാണ് തനിക്ക് ചെയ്യാനുള്ളതെന്നും അദ്ദേഹം കൂട്ടിച്ചേര്‍ത്തു.

ദിലീപ് കുറ്റം ചെയ്തിട്ടില്ലെങ്കില്‍ വേട്ടയാടപ്പെടുകയാണ് ചെയ്തിട്ടുള്ളതെന്നും, അത് തെളിയിക്കേണ്ടത് ദിലീപിന്റെ ഉത്തരവാദിത്തമാണെന്നും രമേഷ് പിഷാരടി അഭിപ്രായപ്പെട്ടു. ദിലീപ് കുറ്റക്കാരനാണെന്ന് തോന്നാനുള്ള ഒരു തെളിവും തന്റെ പക്കലില്ലാത്തതിനാലാണ് ഇത്തരമൊരു നിലപാടെന്നും അദ്ദേഹം വ്യക്തമാക്കി.

ദിലീപ് കുറ്റക്കാരനാണെന്ന് ഒരു ഘട്ടത്തിലും എനിക്ക് തോന്നിയിട്ടില്ല. കാരണം അങ്ങനെ തോന്നാനുള്ളതൊന്നും എന്റെ കയ്യില്‍ ഇല്ല. ദിലീപിനെതിരെ ആരോപണമുന്നയിച്ചയാളെ തനിക്ക് വ്യക്തിപരമായി പരിചയമില്ലാത്തതുകൊണ്ട്, കേട്ടയുടനെ ഒരാള്‍ കുറ്റക്കാരനാണെന്ന് അനുമാനിക്കാന്‍ കഴിയില്ലെന്നും പിഷാരടി കൂട്ടിച്ചേര്‍ത്തു. 

കേസുമായി ബന്ധപ്പെട്ട എല്ലാവരുമായി തനിക്ക് വ്യക്തിബന്ധമുണ്ടെങ്കിലും, താന്‍ അതിജീവിതയ്‌ക്കൊപ്പമാണ് നില്‍ക്കുന്നതെന്ന് അദ്ദേഹം ഊന്നിപ്പറഞ്ഞു. അവര്‍ക്ക് മാനസികമായ പിന്തുണ നല്‍കാന്‍ മാത്രമേ തനിക്ക് കഴിയൂ എന്നും രമേഷ് പിഷാരടി വ്യക്തമാക്കി.