ബിഗ് ബോസ് ഹൗസിലെത്തിയ രേണുവിന് തലവേദന; സ്ട്രാറ്റജിയെന്ന് ആരോപിച്ച് ഒരുകൂട്ടര്‍; രേണുവിന്റെ തലവേദനയുടെ പേരില്‍ വാക്കേറ്റം; പഞ്ച് ഡയലോഗുമായി രേണു സുധി; സുധിച്ചേട്ടന്‍ ഒരുപാട് ആഗ്രഹിച്ച വേദിയിലെത്തിയ സന്തോഷത്തിന് പിന്നാലെ രേണുവിന് സംഭവിച്ചത്

ബിഗ് ബോസ് മലയാളം സീസണ്‍ 7 ലെ ശ്രദ്ധേയ മത്സരാര്‍ഥികളില്‍ ഒരാളാണ് രേണു സുധി. സമീപകാലത്ത് സോഷ്യല്‍ മീഡിയയിലൂടെ നേടിയെടുത്ത വലിയ ശ്രദ്ധയുടെ തുടര്‍ച്ചയാണ് രേണുവിന്റെ ബിഗ് ബോസിലെ സാന്നിധ്യം. ഭൂരിഭാഗം സഹമത്സരാര്‍ഥികള്‍ക്കും അറിയാവുന്ന ഒരാള്‍ ഈ സീസണില്‍ ഉണ്ടെങ്കില്‍ അത് രേണു സുധി ആണ്. അത്രയും വലിയ സോഷ്യല്‍ മീഡിയ റീച്ച് ആണ് രേണു സുധി സമീപകാലത്ത് നേടിയെടുത്തത്

സീസണ്‍ 7ന്റെ പ്രഡിക്ഷന്‍ ലിസ്റ്റില്‍ ആദ്യം മുതലുണ്ടായിരുന്ന പേരാണ് രേണു സുധിയുടേത്. ഇപ്പേളിതാ ഹൗസിനുള്ളിലെത്തി ആദ്യദിനം തന്നെ രേണുവിന് നേരെ ഒരു കൂട്ടംപേര്‍ എത്തിയെങ്കിലും രേണുവും പിടിച്ച് നിന്നുവെന്നാണ് വിലയിരുത്തല്‍.മുന്‍ സീസണുകളില്‍ നിന്ന് വ്യത്യസ്തമായി ആദ്യദിനം തന്നെ മത്സരാര്‍ഥികള്‍ കൈയ്യാങ്കളിക്ക് അടുത്തെത്തുന്ന കാഴ്ചയ്ക്ക് ഹൗസ് ഇന്ന് സാക്ഷ്യം വഹിച്ചു. അരങ്ങേറിയ പല തര്‍ക്കങ്ങളില്‍ ഒന്നില്‍ കേന്ദ്ര സ്ഥാനത്ത് രേണു സുധി ഉണ്ടായിരുന്നു.

തലവേദനയാണെന്ന് പറഞ്ഞ രേണു സുധിക്ക് അല്‍പസമയം വിശ്രമിക്കാന്‍ ക്യാപ്റ്റനായ അനീഷ് അനുവാദം കൊടുത്തിരുന്നു. എന്നാല്‍ ഇത് ചോദ്യം ചെയ്ത് പലരും എത്തി. അഭിലാഷ്, ഷാനവാസ്, അപ്പാനി ശരത് തുടങ്ങിയവരായിരുന്നു ഇതിന്റെ മുന്‍പന്തിയില്‍. അല്‍പം മുന്‍പ് ഷാനവാസ് കടുത്ത തലവേദനയാണെന്ന് പറഞ്ഞിട്ട് അനങ്ങാത്ത ക്യാപ്റ്റന്‍ രേണു സുധി പറഞ്ഞപ്പോഴേക്കും വിശ്രമം അനുവദിച്ചു എന്നതായിരുന്നു ഇവരുടെ പരാതി. ഇത് പ്രശ്‌നമായി ഉന്നയിച്ച് കുറച്ച് കഴിഞ്ഞപ്പോള്‍ തലവേദനയുടേതായ ബുദ്ധിമുട്ട് പ്രകടിപ്പിക്കാതെ നടന്ന രേണു സുധിയോട് അഭിലാഷും അപ്പാനി ശരത്തും അടക്കമുള്ളവര്‍ രേണുവിന്റേത് അഭിനയമായിരുന്നുവെന്ന് വാദിച്ചു. ക്ഷീണത്തിന് വിശ്രമിക്കാന്‍ കണ്ടെത്തിയ ഉപായമാണ് തലവേദന എന്നായിരുന്നു ഇവരുടെ വാദം. എന്നാല്‍ ഇതിനോടെല്ലാം ശക്തിയുക്തം എതിര്‍ത്ത് നില്‍ക്കുന്ന രേണു സുധിയെയാണ് സഹമത്സരാര്‍ഥികള്‍ കണ്ടത്.

ഒടുവില്‍ ബിഗ് ബോസ് ക്യാമറയ്ക്ക് മുന്നില്‍ നിന്നുകൊണ്ട് തനിക്ക് മരുന്ന് വേണമെന്നും രേണു അഭ്യര്‍ഥിക്കുന്നുണ്ടായിരുന്നു. അല്‍പം കഴിഞ്ഞ് ബെഡ്‌റൂമില്‍ ഒരു പഞ്ച് ഡയലോഗ് തമാശ മട്ടില്‍ പറയുന്ന രേണു സുധിയെയും കണ്ടു. 100 പേര്‍ നിന്ന് കളിയാക്കി ചിരിച്ചാലും താഴത്തില്ലെടാ, രേണു സുധി ഫ്‌ളവറല്ലെടാ, ഫയറാടാ എന്നായിരുന്നു പുഷ്പയിലെ ഡയലോഗ് കടംകൊണ്ടുള്ള രേണുവിന്റെ പറച്ചില്‍. അതേസമയം സീസണിലെ ആദ്യ നോമിനേഷന്‍ ലിസ്റ്റിലും രേണു സുധി ഇടംപിടിച്ചിട്ടുണ്ട്.

ഇതിനിട ബിഗ് ബോസിലേക്ക് പോകുന്നതിനു മുന്‍പ് രേണു പറഞ്ഞ കാര്യങ്ങളും സോഷ്യല്‍ മീഡിയയില്‍ വൈറലാകുകയാണ്. ഹൗസിലേക്ക് പോകും മുന്‍പ് സുധിയുടെ കല്ലറയില്‍ പ്രാര്‍ത്ഥിക്കാന്‍ എത്തിയതായിരുന്നു രേണു.

''ഞാന്‍ ഇപ്പോള്‍ സുധിച്ചേട്ടന്റെ അടുത്തു വന്നതിനു പിന്നില്‍ ഒരു കാരണമുണ്ട്. പെട്ടെന്നായിരുന്നു ബിഗ് ബോസില്‍ നിന്ന് എന്നെ വിളിച്ചത്. ജീവിതത്തില്‍ എന്തു നല്ല കാര്യം വന്നാലും സുധിച്ചേട്ടന്റെ അടുത്തു വന്ന് അറിയിക്കാനും അദ്ദേഹത്തിന്റെ അനുഗ്രഹം വാങ്ങാനും ഇഷ്ടമുള്ളയാളാണ് ഞാന്‍. ചേട്ടന്‍ ഒരുപാട് ആഗ്രഹിച്ച വേദിയായിരുന്നു ബിഗ്‌ബോസ്. പലപ്പോഴും ഞങ്ങളോട് അത് പറഞ്ഞിട്ടുണ്ട്. ചേട്ടന് പോകാന്‍ സാധിച്ചില്ല. ഏതോ ലോകത്തിരുന്ന് ചേട്ടന്‍ എന്നെ വിടുന്നതാണ് എന്നാണ് ഞാന്‍ വിശ്വസിക്കുന്നത്'', എന്ന് രേണു സുധി പറയുന്നു.

''സുധിച്ചേട്ടന്‍ ജീവനോടെയുള്ളപ്പോള്‍ അദ്ദേഹത്തെ തള്ളിപ്പറഞ്ഞ ഒരുപാട് ആളുകള്‍ ഉണ്ടായിരുന്നു. അവരുടെയൊക്കെ മുന്നില്‍ പിടിച്ചു നിന്നയാളാണ് സുധിച്ചേട്ടന്‍. ചെയ്യാത്ത കുറ്റത്തിന് കുറേപ്പേര്‍ എന്നെ എതിര്‍ക്കുമ്പോഴും ആ ഒരൊറ്റ ധൈര്യത്തിലാണ് ഞാന്‍ മുന്നോട്ട് പോകുന്നത്. ഒറ്റയ്ക്ക് നില്‍ക്കാനുള്ള കരുത്തും അതൊക്കെത്തന്നെയാണ്. എന്തായാലും മുന്നോട്ടു തന്നെ പോകും. മനസാക്ഷിക്ക് നിരക്കാത്തതൊന്നും ചെയ്തിട്ടുമില്ല, ഇനി ചെയ്യത്തുമില്ല. മനഃസാക്ഷി ഉള്ളവര്‍ക്ക് അതു മനസിലാകും'', എന്നും രേണു പറയുന്നു.

''അമ്മ അച്ഛന്റെയടുത്തു പോയി പ്രാര്‍ത്ഥനയും അനുഗ്രഹവും വാങ്ങിക്കൂ. എന്റെ പിന്തുണ എപ്പോഴും ഉണ്ടാകും എന്നു കിച്ചു തന്നോട് പറഞ്ഞതായും ആശുപത്രിയില്‍ പോകേണ്ടതുകൊണ്ടാണ് കിച്ചു ഒപ്പം വരാത്തതെന്നും രേണു വീഡിയോയില്‍ പറയുന്നുണ്ട്. എല്ലാം വളരെ പെട്ടെന്നായിരുന്നു. പെട്ടെന്നാണ് ബിഗ്‌ബോസില്‍ നിന്നുമുള്ള വിളി വന്നത്. കിച്ചുവിനെ അറിയിച്ചയുടന്‍ അവന്‍ ഓടിവന്നു. എന്റെ കയ്യില്‍ ഉള്ള ഡ്രസ് മാത്രമാണ് പാക്ക് ചെയ്യുന്നത്. സുധിച്ചേട്ടന്റെ അനുഗ്രഹം കിട്ടി. ആ മനസ് എനിക്കറിയാം. ഇത്രയും നേരം മഴ ഇല്ലായിരുന്നു. ഇപ്പോ പെട്ടെന്നൊരു മഴ പെയ്തത് ചേട്ടന്റെ അനുഗ്രഹമായിട്ടു തന്നെ ഞാന്‍ കാണുന്നു. എന്നെ പിന്തുണക്കുകയും മനസിലാക്കുകയും ചെയ്യുന്ന എല്ലാവര്‍ക്കും നന്ദി'', എന്നും രേണു കൂട്ടിച്ചേര്‍ത്തു.

മലയാളി പ്രേക്ഷകര്‍ക്ക് ഏറെ പ്രിയങ്കരനായിരുന്ന നടനും മിമിക്രി കലാകാരനുമായ കൊല്ലം സുധിയുടെ ഭാര്യയാണ് രേണു സുധി.  കൊല്ലം സുധിയുടെ മരണത്തിന് പിന്നാലെയാണ് രേണു സുധി സമൂഹമാധ്യമങ്ങളില്‍ സജീവമായത്. റീല്‍സ് വിഡിയോകളിലൂടെയും മ്യൂസിക് ആല്‍ബങ്ങളിലൂടെയും ഫോട്ടോഷൂട്ടികളിലൂടെയും രേണു സമൂഹമാധ്യമങ്ങളില്‍ തിളങ്ങി.