മോഹന്‍ലാലിനും രജനിക്കും എത്താനായില്ല; ജയറാമും റഹ്മാനും ചിരഞ്ജീവിയും പാര്‍വ്വതിയും ശോഭനയും ഖുശ്ബും അടക്കം 80 കളിലെ മിന്നും താരങ്ങള്‍ വീണ്ടും ഒന്നിച്ചത്  പുലി തീമില്‍; ഒന്നിച്ച് ഇരിക്കുക എന്നത് തന്നെ സന്തോഷമെന്ന് കുറിച്ച് രേവതി

മൂന്നു വര്‍ഷത്തെ ഇടവേളയ്ക്ക് ശേഷം ഇന്ത്യന്‍ സിനിമയിലെ പ്രമുഖ താരങ്ങള്‍ ചെന്നൈയില്‍ വീണ്ടും ഒത്തുചേര്‍ന്നു. 80കളിലെ പ്രമുഖ താരങ്ങളായ ജാക്കി ഷ്രോഫ്, ജയറാം, മീന, ഖുശ്ബു, റഹ്മാന്‍, ചിരഞ്ജീവി, വെങ്കിടേഷ്, ശോഭന എന്നിവരടക്കം 31 പേരാണ് പുലി തീമിലുള്ള വസ്ത്രങ്ങള്‍ ധരിച്ച് സംഗമത്തിനെത്തിയത്.

താരസംഗമത്തിന്റെ ആശയം നടി ലിസിയുടേതാണെങ്കിലും, ഒത്തുചേരലിന് ചുക്കാന്‍ പിടിക്കുന്നത് നടിയും സംവിധായികയുമായ സുഹാസിനി മണിരത്‌നമാണ്. സംഗമത്തിന്റെ ചിത്രങ്ങള്‍ പങ്കുവെച്ച് നടി രേവതി ഇട്ട കുറിപ്പ് ഏറെ ശ്രദ്ധ നേടി. 'എപ്പോഴും കാണാനാകാത്ത സുഹൃത്തുക്കളെ കണ്ടുമുട്ടിയ ഒരു സായാഹ്നം. ഞങ്ങള്‍ ഒരുമിച്ച് പ്രവര്‍ത്തിച്ചവര്‍. 12 വര്‍ഷത്തിലേറെയായി കണ്ടുമുട്ടല്‍ തുടരുന്ന ഒരേയൊരു കൂട്ടായ്മ. ഒന്നിച്ച് ഇരിക്കുക എന്നത് തന്നെ സന്തോഷമാണ്. ഈ ഒരു സായാഹ്നത്തിനായി അക്ഷീണം പ്രവര്‍ത്തിച്ച ലിസി, സുഹാസിനി, പൂര്‍ണ്ണിമ, രാജ്കുമാര്‍, ഖുശ്ബു എന്നിവര്‍ക്ക് നന്ദി. 'ക്ലാസ് ഓഫ് 80'സ് റോക്ക്‌സ്'' എന്നായിരുന്നു രേവതി കുറിച്ചത്.

രാജ്കുമാര്‍ സേതുപതിയുടേയും ശ്രീപ്രിയയുടെയും വീടാണ് ഇത്തവണ സംഗമത്തിനായി തിരഞ്ഞെടുത്തത്. കഴിഞ്ഞ വര്‍ഷം ചെന്നൈയിലുണ്ടായ വെള്ളപ്പൊക്കം കാരണം സംഗമം മാറ്റിവെക്കേണ്ടി വന്നിരുന്നു. ആഡംബര ഹോട്ടലുകളെക്കാള്‍ തുറന്നു സംസാരിക്കാനും സമയം ചെലവഴിക്കാനും വീടാണ് നല്ലതെന്നതിനാലാണ് ഇത്തവണ സഹതാരങ്ങളിലൊരാളുടെ വീട് തിരഞ്ഞെടുത്തതെന്ന് താരങ്ങള്‍ സൂചിപ്പിച്ചു. രജനീകാന്ത്, മോഹന്‍ലാല്‍ തുടങ്ങിയ പ്രമുഖ താരങ്ങള്‍ ഇത്തവണത്തെ സംഗമത്തില്‍ പങ്കെടുത്തില്ല. 80കളിലെ താരങ്ങളുടെ സൗഹൃദസംഗമം സിനിമാപ്രേമികള്‍ക്കിടയില്‍ വീണ്ടും ചര്‍ച്ചയായിരിക്കുകയാണ്.

തമിഴ്, തെലുങ്ക്, മലയാളം, കന്നഡ, ഹിന്ദി തുടങ്ങി വിവിധ ഭാഷകളിലെയും അഭിനേതാക്കള്‍ ഈ ഒത്തുചേരലിന്റെ ഭാഗമാകാന്‍ ചെന്നൈയിലെത്തി. പങ്കെടുത്ത 31 പേരില്‍ ചിരഞ്ജീവി, വെങ്കിടേഷ്, ജാക്കി ഷ്രോഫ്, ശരത്കുമാര്‍, രേവതി, രമ്യ കൃഷ്ണന്‍, രാധ, ശോഭന, പ്രഭു, നദിയ, സുഹാസിനി മണിരത്‌നം, ജയസുധ, സുമലത, റഹ്മാന്‍, ഖുശ്ബു, നരേഷ്, സുരേഷ്, മേനക, പ്രഭു, ജയറാം, അശ്വതി ജയറാം, സരിത, ഭാനു ചന്ദര്‍, മീന, ലത, സ്വപ്ന, ജയശ്രീ, പൂര്‍ണ്ണിമ ഭാഗ്യരാജ്, ഭാഗ്യരാജ് എന്നിവരുണ്ടായിരുന്നു.