മോഹൻലാലിന്റെ മീശയിലെ നര കടിച്ച് പറിക്കുന്ന സീനുണ്ടായിരുന്നു; ഞാൻ വിറയ്ക്കുകയായിരുന്നു; അതായിരുന്നു ആദ്യത്തെ ഷോട്ട്; നരൻ സിനിമയെക്കുറിച്ച് പറഞ്ഞ് നടി സോന നായർ

മലയാളികൾക്ക് ഏറെ സുപരിചിതയായ താരമാണ് സോനാ നായര്‍.  തൂവല്‍ക്കൊട്ടാരം എന്ന ചിത്രത്തിലൂടെയാണ്  നടി സിനിമ മേഖലയിൽ സജീവമായത്. ഒരേസമയം സിനിമയിലും  പാരമ്പരകളിലുമായി താരത്തിന് തിളങ്ങാനും സാധിച്ചറിയുന്നു. മലയാളത്തിന് പുറമേ അന്യ ഭാഷകളിലും സജീവമായിരുന്നു താരം.  നരൻ എന്ന ചിത്രത്തിലെ  കുന്നുമ്മൽ ശാന്ത എന്ന കഥാപാത്രം സോനയുടെ സിനിമ കരിയറിലെ വഴിത്തിരിവായിരിന്നു. എന്നാൽ ഇപ്പോൾ സിനിമയിൽ നിന്ന് ഒഴിവാക്കിയ ചില സീനുകളെക്കുറിച്ച് പറയുകയാണ് സോന.

നരനിലെ തന്റെ ഫസ്റ്റ് ഷോട്ട് വേലായുധന്റെ മീശയിലെ ഒരു നര കടിച്ച് പറിക്കുന്നതാണ്. ഞാൻ വിറയ്ക്കുകയായിരുന്നു. വേറെ ഏതെങ്കിലും സീൻ ചെയ്തിട്ട് ഇതിലേക്ക് വരാമെന്നും അതല്ലെങ്കിൽ എനിക്ക് പറ്റില്ലെന്നും സംവിധായകൻ ജോഷി സാറിനോട് ഞാൻ പറഞ്ഞു. എന്നാൽ ഇത്രയും ഭീകരമായിട്ടുള്ള സീൻ ആദ്യം എടുത്താൽ ബാക്കി എല്ലാം വളരെ എളുപ്പമായി നീ ചെയ്യുമെന്ന് പറഞ്ഞു. അങ്ങനെ അത് ചെയ്തെങ്കിലും സിനിമയിൽ ആ സീനില്ല’ ശാന്തയ്ക്ക് അദ്ദേഹത്തോട് വലിയ ഇഷ്ടമാണ്. പുള്ളി ഉറങ്ങി കിടക്കുമ്പോൾ അടുത്ത് പോയി ആസ്വദിച്ച് കൊണ്ട് നിൽക്കുന്ന ശാന്തയാണ് സീനിൽ. അങ്ങനെ നോക്കുമ്പോൾ മീശയിൽ ഒരു നരയുണ്ട്. പതുക്കെ അത് കടിച്ചെടുക്കാനായി ചുണ്ടിന്റെ അടുത്ത് വരെ പോകും. അതായിരുന്നു ആദ്യത്തെ ഷോട്ട്.’

പക്ഷേ അടുത്ത് വരെ ചെന്നെങ്കിലും അത് എടുക്കാതെ ശാന്ത പിന്മാറും. കാരണം അത്രയും പോസിറ്റീവിറ്റിയുള്ള കഥാപാത്രമാണ് കുന്നുമ്മൽ ശാന്ത. ഇങ്ങനെയുള്ള കാര്യങ്ങളൊന്നും വേലായുധന്റെ അടുത്ത് ചെയ്യുകയില്ല. എന്നാൽ അദ്ദേഹത്തോട് അഘാതമായ പ്രണയമുണ്ട് താനും. പിന്നെ കൈ കൊണ്ടാണ് ആ നര പറച്ചെടുക്കുന്നത്. പക്ഷേ ആ സീൻ സിനിമയിൽ ഉൾപ്പെടുത്തിയില്ല. അതിന്റെ കാരണം എന്താണെന്ന് അറിയില്ല

സീരിയലുകളിലൂടെ മലയാളിയുടെ മനം കവർന്ന സോന ദുരദർശനിൽ സംപ്രേക്ഷണം ചെയ്ത നിരവധി ടെലിഫിലിമുകളിലും അഭിനയിച്ചിരുന്നു. അതിൽ രാച്ചിയമ്മ എന്ന ടെലിഫിലിം ഏറെ ശ്രദ്ധനേടിയിരുന്നു. 1996ൽ സത്യൻ അന്തിക്കാട് സംവിധാനം ചെയ്ത തൂവൽക്കൊട്ടാരം എന്ന ചിത്രത്തിലെ ഹേമാ എന്ന കഥാപാത്രത്തെ അഭിനയിച്ചുകൊണ്ടാണ് സോന മലയാളചലച്ചിത്ര ലോകത്തേക്ക് എത്തിയത്