കാറിന്റെ ബ്രേക്ക് തകരാറിലാക്കി അപകടപ്പെടുത്താന്‍ ശ്രമിച്ചു; വെള്ളത്തില്‍ വിഷം കലര്‍ത്തി; മീടു ആരോപണത്തിന് ശേഷം തനിക്ക് നേരിടേണ്ടി വന്ന അനുഭവങ്ങളെ കുറിച്ച് തനുശ്രീ ദത്ത

മീടു ആരോപണത്തിന് ശേഷം തനിക്കെതിരെ വധശ്രമങ്ങള്‍ ഉണ്ടായെന്ന് നടി തനുശ്രീ ദത്തയുടെ വെളിപ്പെടുത്തല്‍.വെള്ളത്തില്‍ വിഷം കലര്‍ത്തിയും കാറ് അപകടത്തില്‍പ്പെടുത്തിയും തന്നെ വകവരുത്താന്‍ ശ്രമിച്ചു എന്നാണ് നടി പറയുന്നത്.ഒരു എഫ് എമ്മിന് നല്‍കിയ അഭിമുഖത്തിലാണ് നടി ഇക്കാര്യം പറഞ്ഞത്.

ഉജ്ജയിനില്‍ ആയിരിക്കുമ്പോള്‍ തന്റെ കാറിന്റെ ബ്രേക്ക് പലതവണ തകരാറിലായതായി നടി വെളിപ്പെടുത്തി. അടുത്തിടെ ഒരു അപകടമുണ്ടായി. ധാരാളം രക്തം നഷ്ടപ്പെട്ടതിനാല്‍ അതില്‍ നിന്നും കര കയറാന്‍ രണ്ടു മാസമെടുത്തു. ഒരിക്കല്‍ തന്നെ ആരോ വിഷം തന്ന് കൊലപ്പെടുത്താന്‍ ശ്രമിച്ചെന്നും തനുശ്രീ ആരോപിച്ചു. ''എനിക്കെന്തെങ്കിലും സംഭവിച്ചാല്‍ നാനാ പടേക്കറും അദ്ദേഹത്തിന്റെ അഭിഭാഷകരും കൂട്ടാളികളും  ബോളിവുഡ് മാഫിയ സുഹൃത്തുക്കളും ഉത്തരവാദികളാണെന്ന് അറിയിക്കട്ടെ. 

ആരാണീ ബോളിവുഡ് മാഫിയ? എസ്.എസ്.ആര്‍ കേസുകളുമായി ബന്ധപ്പെട്ട് പതിവായി ഉയര്‍ന്നുവരാറുള്ള പേരുകളാണ് അവര്‍. അവരുടെ സിനിമകള്‍ കാണരുത്, അവരെ പൂര്‍ണ്ണമായും ബഹിഷ്‌കരിക്കുക, കഠിനമായ പ്രതികാരത്തോടെ അവരെ പിന്തുടരുക'' തനുശ്രീ കൂട്ടിച്ചേര്‍ത്തു.

2018ല്‍ നടന്‍ നാനാ പടേക്കറിനെതിരെയുള്ള  തനുശ്രീ ദത്തയുടെ വെളിപ്പെടുത്തലിന് പിന്നാലെയാണ് ഇന്ത്യയില്‍ മീടു ക്യാമ്പയിന്‍ ആളിക്കത്തുന്നത്. 2008ല്‍ 'ഹോണ്‍ ഓകെ പ്ലീസ്' എന്ന ചിത്രത്തിന്റെ ഷൂട്ടിങ്ങിനിടയില്‍ നാനാ പടേക്കര്‍ തനിക്ക് നേരെ ലൈംഗിക അതിക്രമം നടത്തിയെന്നായിരുന്നു നടിയുടെ ആരോപണം. ഇത് വലിയ വിവാദങ്ങള്‍ക്ക് വഴി തെളിക്കുകയും ചെയ്തു. നിരവധി പേര്‍ തങ്ങള്‍ക്ക് നേരിട്ട പീഡനങ്ങളെക്കുറിച്ച് തുറന്നുപറയുകയും ചെയ്തു.