നീ ജനിച്ച ആ ദിവസം.. ലോകത്തിലെ ഏറ്റവും വിലയേറിയ നിധി എനിക്ക് ലഭിച്ചു എന്ന് ഞാന്‍ തിരിച്ചറിഞ്ഞു;  കുഞ്ഞാറ്റയ്ക്ക് ആശംസകളുമായി ഉര്‍വശി

മകള്‍ കുഞ്ഞാറ്റ എന്നു വിളിക്കുന്ന തേജ ലക്ഷ്മിയ്ക്ക് ജന്മദിനാശംസകള്‍ നേര്‍ന്ന് ഉര്‍വശി പങ്കുവച്ച കുറിപ്പാണ് ഇപ്പോള്‍ ശ്രദ്ധ നേടുന്നത്. തനിക്ക് ലഭിച്ച ലോകത്തിലെ ഏറ്റവും വിലയേറിയ നിധി എന്നാണ് മകളെ ഉര്‍വശി വിശേഷിപ്പിക്കുന്നത്.

'എന്റെ സുന്ദരിയായ മകള്‍ക്ക്  ജന്മദിനാശംസകള്‍. നീ ജനിച്ച ആ ദിവസം, ലോകത്തിലെ ഏറ്റവും വിലയേറിയ നിധി എനിക്ക് ലഭിച്ചു എന്ന് ഞാന്‍ തിരിച്ചറിഞ്ഞു. ഞാന്‍ നിന്നെ സ്‌നേഹിക്കുന്നു,' എന്നാണ് ഉര്‍വശി കുറിച്ചത്. 

സോഷ്യല്‍ മീഡിയയില്‍ ഒന്നും സജീവമല്ലാതിരുന്ന ഉര്‍വശി കഴിഞ്ഞ വര്‍ഷമാണ്  ഇന്‍സ്റ്റഗ്രാമില്‍ അക്കൗണ്ട് തുടങ്ങിയത്. മക്കള്‍ക്കൊപ്പമുള്ള ചിത്രങ്ങള്‍ ഇടയ്ക്ക് ഉര്‍വശി ഷെയര്‍ ചെയ്യാറുണ്ട്.

കുഞ്ഞാറ്റയെ കൂടാതെ ഇഷാന്‍ പ്രജാപതി എന്നൊരു മകന്‍ കൂടി ഉര്‍വശിയ്ക്കുണ്ട്. നടന്‍ മനോജ് കെ. ജയനുമായുള്ള വിവാഹത്തില്‍ ഉര്‍വശിക്കുണ്ടായ മകളാണ് കുഞ്ഞാറ്റ. 2008ല്‍ ഉര്‍വശിയും മനോജ് കെ. ജയനും വേര്‍പിരിഞ്ഞു. 2013ല്‍ ചെന്നൈയിലെ ബില്‍ഡറായ ശിവപ്രസാദിനെ ഉര്‍വശി വിവാഹം കഴിച്ചു. ഈ ബന്ധത്തിലുള്ള മകനാണ് ഇഷാന്‍. 

തേജാലക്ഷ്മി എന്ന കുഞ്ഞാറ്റ നായികയായി അരങ്ങേറ്റം കുറിക്കാന്‍ ഒരുങ്ങുകയാണ്.  സുന്ദരിയായവള്‍ സ്റ്റെല്ല എന്ന ചിത്രത്തിലൂടെയാണ് തേജാലക്ഷ്മിയുടെ അരങ്ങേറ്റം. ചിത്രത്തിന്റെ ലോഞ്ചും അടുത്തിടെ നടന്നിരുന്നു. 

മലയാളികളുടെ എക്കാലത്തേയും പ്രിയങ്കരിയായ നടിയാണ് ഉര്‍വശി. മലയാളത്തിനൊപ്പം തമിഴിലും കന്നടയിലും തെലുങ്കിലുമെല്ലാം ഒരുപോലെ തിളങ്ങിയ അഭിനയപ്രതിഭ. എന്നും തന്നോട് തന്നെയാണ് ഉര്‍വശിയുടെ മത്സരം. ഹാസ്യമോ ഗൗരവമോ കണ്ണീരോ കുശുമ്പോ എന്നു തുടങ്ങി കഥാപാത്രത്തിന്റെ സ്ഥായീഭാവം ഏതുമായി കൊള്ളട്ടെ, ആ കഥാപാത്രത്തെ തന്മയത്വത്തോടെ അവതരിപ്പിക്കുന്ന തെന്നിന്ത്യയുടെ പകരക്കാരില്ലാത്ത പ്രിയനടിയാണ് ഉര്‍വശി. ലേഡി സൂപ്പര്‍സ്റ്റാര്‍ എന്ന വിശേഷണം പലപ്പോഴും മഞ്ജു വാര്യര്‍ക്ക് ചാര്‍ത്തപ്പെടുമ്പോഴും സിനിമാപ്രേമികള്‍ പലപ്പോഴും തിരുത്താറുണ്ട്, മലയാളം കണ്ട എക്കാലത്തെയും വലിയ ലേഡി സൂപ്പര്‍സ്റ്റാര്‍ ഉര്‍വശിയാണെന്ന് വാദിക്കുന്ന വലിയൊരു വിഭാഗം പ്രേക്ഷകരുണ്ട്.