വയസ്സാനാലും ഉന്‍ സ്‌റ്റൈലും,അഴകും ഉന്നെ വിട്ട് പോകല..! 'ജയിലര്‍' പടം സ്‌ക്രീനുകളില്‍ കാണുമ്പോള്‍ ആരാധകരുടെ മനസ്സില്‍ തെളിയുന്നത് ഒരൊറ്റ ചോദ്യം മാത്രം; വയസ്സ് 75-ലും തളരാത്ത എനര്‍ജി; സൂപ്പര്‍സ്റ്റാര്‍ രജനിയുടെ ഡയറ്റ് പ്ലാനെന്ത്? ഒടുവില്‍ ആ രഹസ്യം പരസ്യമാക്കി മകള്‍ സൗന്ദര്യ 

പ്രായത്തെ വെല്ലുന്ന ഊര്‍ജ്ജത്തോടെ എഴുപത്തിയഞ്ചാം വയസിലും സിനിമാരംഗത്ത് സജീവമായി തുടരുന്ന സൂപ്പര്‍താരം രജനികാന്തിന്റെ ആരോഗ്യശീലങ്ങളും ഭക്ഷണക്രമവും വീണ്ടും സമൂഹമാധ്യമങ്ങളില്‍ ചര്‍ച്ചയാകുന്നു. പ്രായം കൂടുന്നതിനനുസരിച്ച് ഭക്ഷണക്രമത്തില്‍ കര്‍ശനമായ നിയന്ത്രണങ്ങള്‍ പാലിക്കേണ്ടതിന്റെ പ്രാധാന്യത്തെക്കുറിച്ച് മകളും സംവിധായികയുമായ സൗന്ദര്യ രജനികാന്ത് നടത്തിയ വെളിപ്പെടുത്തലുകളാണ് ഇപ്പോള്‍ ഏറെ ശ്രദ്ധ നേടുന്നത്. പഞ്ചസാരയും ഉപ്പും ഉള്‍പ്പെടെയുള്ളവയുടെ ഉപയോഗത്തില്‍ എപ്പോഴും മിതത്വം പാലിക്കണമെന്നാണ് തന്റെ അച്ഛന്‍ എപ്പോഴും ആഗ്രഹിക്കുന്നതെന്നും സൗന്ദര്യ ചൂണ്ടിക്കാണിക്കുന്നു. 

ജോലിയില്‍ അതീവ തിരക്കുള്ള സമയങ്ങളിലും വളരെ അച്ചടക്കത്തോടെയുള്ള ഭക്ഷണക്രമമാണ് രജനികാന്ത് പിന്തുടരാറുള്ളതെന്ന് സൗന്ദര്യ 'ദി ഹിന്ദുവിന്' നല്‍കിയ പ്രത്യേക അഭിമുഖത്തില്‍ വ്യക്തമാക്കുകയുണ്ടായി. എന്നാല്‍ ഭക്ഷണകാര്യത്തില്‍ എല്ലാവര്‍ക്കും ഒരേ രീതിയിലുള്ള കര്‍ശന നിയന്ത്രണങ്ങള്‍ അനുയോജ്യമാകണമെന്നില്ലെന്നും അവര്‍ അഭിപ്രായപ്പെട്ടു. ചില വ്യക്തികള്‍ക്ക് ഗോതമ്പ് അടങ്ങിയ ആഹാരം ശരീരത്തിന് ചേരണമെന്നില്ല, മറ്റു ചിലര്‍ക്ക് ആരോഗ്യപരമായ കാരണങ്ങളാല്‍ അരി ആഹാരം ഒഴിവാക്കേണ്ട സാഹചര്യവും ഉണ്ടായേക്കാം. അതിനാല്‍ ഭക്ഷണത്തില്‍ അമിതത്വം ഒഴിവാക്കി പരമാവധി മിതത്വം പാലിക്കുക എന്നതാണ് അച്ഛന്റെ വാക്കുകളുടെ യഥാര്‍ത്ഥ അര്‍ഥമെന്നും അവര്‍ കൂട്ടിച്ചേര്‍ത്തു. 

ഒരു പ്രത്യേക പ്രായം കഴിഞ്ഞതോടെ തന്റെ ഭക്ഷണക്രമത്തില്‍ നിന്ന് 'വൈറ്റ് ഫുഡ്' പൂര്‍ണ്ണമായി ഒഴിവാക്കിയതായി രജനികാന്ത് നേരത്തെയും പരസ്യമായി വെളിപ്പെടുത്തിയിരുന്നു. പാല്‍, തൈര്, വെളുത്ത അരി, പഞ്ചസാര തുടങ്ങിയവയാണ് ഈ വിഭാഗത്തില്‍ ഉള്‍പ്പെടുത്തിയിട്ടുള്ളത്. 'ജയിലര്‍' സിനിമയുടെ ചിത്രീകരണ വേളയില്‍ രജനികാന്തുമായി അടുത്ത് ഇടപഴകാന്‍ അവസരം ലഭിച്ച സഹതാരം മിര്‍ണ മേനോനും അദ്ദേഹത്തിന്റെ ലളിതമായ ഭക്ഷണശീലങ്ങളെക്കുറിച്ച് മുമ്പ് സംസാരിച്ചിട്ടുണ്ട്. ഷൂട്ടിംഗ് സെറ്റുകളില്‍ മസാലയും എണ്ണയും കൂടുതലുള്ള ഭക്ഷണങ്ങളോട് അദ്ദേഹം താല്പര്യം കാണിക്കാറില്ലെന്നും വളരെ ആരോഗ്യകരമായ ആഹാരമാണ് പൊതുവെ കഴിക്കാറുള്ളതെന്നുമാണ് മിര്‍ണ വ്യക്തമാക്കിയത്. 

എല്ലാ വെളുത്ത ഭക്ഷണങ്ങളും ആരോഗ്യത്തിന് ദോഷകരമാണെന്ന തെറ്റായ ധാരണ ഇതില്‍ നിന്നെടുക്കരുതെന്ന് വിദഗ്ധര്‍ ചൂണ്ടിക്കാണിക്കുന്നു. അരി, പാല്‍, തൈര് തുടങ്ങിയ ഭക്ഷണങ്ങളില്‍ ധാരാളം പോഷകമൂല്യങ്ങള്‍ അടങ്ങിയിട്ടുണ്ട്. ഭക്ഷണത്തിന്റെ അളവും ഓരോ വ്യക്തിയുടെയും ശാരീരിക ആരോഗ്യസ്ഥിതിയും മൊത്തത്തിലുള്ള ഭക്ഷണക്രമവുമാണ് പ്രധാനം എന്ന കാര്യം സൗന്ദര്യയുടെ വാക്കുകളിലും വ്യക്തമാണ്. അഭിമുഖത്തിനിടെ താന്‍ പനീറും തൈരും ധാരാളമായി കഴിക്കാറുണ്ടെന്ന് തമാശരൂപേണ സമ്മതിച്ച സൗന്ദര്യ, അതുകൊണ്ടാണ് താന്‍ വൈറ്റ് ഫുഡിനോട് പൂര്‍ണ്ണമായും 'നോ' പറയാത്തതെന്നും ചിരിച്ചുകൊണ്ട് വ്യക്തമാക്കുകയുണ്ടായി. 

പഞ്ചസാരയും ഉപ്പും അമിതമായി ഉപയോഗിക്കുന്നത് ഭാവിയില്‍ പ്രമേഹം, ഉയര്‍ന്ന രക്തസമ്മര്‍ദം തുടങ്ങിയ വിവിധ ആരോഗ്യപ്രശ്‌നങ്ങള്‍ക്ക് കാരണമായേക്കാം. എന്നാല്‍ അരിയും പാലും പോലുള്ള അടിസ്ഥാന ആഹാരങ്ങള്‍ എല്ലാവരും പൂര്‍ണമായി ഒഴിവാക്കേണ്ടതില്ല. വ്യക്തികളുടെ പ്രായം, ആരോഗ്യസ്ഥിതി, പോഷകാവശ്യങ്ങള്‍ എന്നിവ കണക്കിലെടുത്തായിരിക്കണം ആഹാരം തിരഞ്ഞെടുക്കേണ്ടത്. ഒരു പ്രമുഖ താരത്തിന്റെ ഭക്ഷണശീലം മറ്റുള്ളവര്‍ കണ്ണടച്ച് അനുകരിക്കണമെന്നില്ലെന്നും, വലിയ ഭക്ഷണക്രമ മാറ്റങ്ങള്‍ വരുത്തുന്നതിന് മുന്‍പ് എപ്പോഴും ഒരു ആരോഗ്യവിദഗ്ധന്റെയോ പോഷകാഹാര വിദഗ്ധന്റെയോ ഉപദേശം തേടേണ്ടതാണെന്നും ഓര്‍മ്മിപ്പിക്കുന്നു.