എന്നും നിറഞ്ഞ് നില്‍ക്കുന്നത് കുട്ടിക്കാലത്തെ ഓണം; എല്ലാ വിഭവങ്ങളും കൂട്ടി ഊണ് കിട്ടുന്നത് ഓണത്തിന്; അച്ഛനൊപ്പം സമയം ചിലവഴിക്കാന്‍ കിട്ടുന്നത് ഓണത്തിന് മാത്രം: ഓണക്കാലത്തെ അനുഭവം പങ്കുവെച്ച് അപ്പുണ്ണി ശശി

നാടകപ്രവര്‍ത്തകനും നടനുമായ അപ്പുണ്ണി ശശി തന്റെ കുട്ടിക്കാല ഓണക്കാല അനുഭവങ്ങള്‍ പങ്കുവെച്ചു. ഓണനാളില്‍ അച്ഛനൊപ്പം സദ്യയുണ്ണാന്‍ കാത്തിരുന്ന ഓര്‍മകളാണ് ഏറ്റവും പ്രിയപ്പെട്ടതെന്ന് ശശി പറഞ്ഞു. ചായക്കടക്കാരനായിരുന്ന അച്ഛന്‍ പുലര്‍ച്ചെ ജോലി തുടങ്ങാന്‍ പോയാല്‍ രാത്രി വൈകിയാണ് എത്താറുണ്ടായിരുന്നത്. ഓണനാളിലാണ് മാത്രമായിരുന്നു അച്ഛനൊപ്പം സമയം ചെലവഴിക്കാനും സദ്യയുണ്ണാനും കഴിഞ്ഞിരുന്നത്.

''രാവിലെ മാവേലിവേഷം കെട്ടിയെത്തുന്ന ആളിനൊപ്പം നാടുചുറ്റാന്‍ പോയാല്‍ വീട്ടിലെത്തേണ്ട കാര്യം മറന്നുപോകും. സദ്യ കഴിഞ്ഞും ഞാന്‍ വീട്ടിലെത്താതിരുന്നതില്‍ അച്ഛനും അമ്മയും പറഞ്ഞ വഴക്ക് ഇന്നും മനസ്സില്‍ തെളിഞ്ഞുനില്‍ക്കുന്നു,'' ശശി പറഞ്ഞു.

കുട്ടിക്കാലത്തെ ഓണമാണ് മനസ്സില്‍ എന്നും നിറഞ്ഞുനില്‍ക്കുന്നതെന്നും ശശി ഓര്‍ത്തെടുത്തു. ''ഒന്നുമില്ലാതിരുന്ന കാലത്ത് ഓണത്തിനാണ് മാത്രം എല്ലാ വിഭവങ്ങളും കൂട്ടിയുള്ള ഊണ് കിട്ടിയിരുന്നത്. പുലര്‍ച്ചെ ഇരുട്ട് മാറുന്ന സമയത്ത് ഞങ്ങള്‍ കുട്ടികള്‍ പൂപറിക്കാന്‍ പോകും. മറ്റുള്ളവരുടെ വീടുകളില്‍ സൂക്ഷിച്ചുവെച്ച പൂക്കള്‍ ഒളിച്ചെടുത്തു പറിച്ചിരിക്കും. പിടിക്കപ്പെട്ടാല്‍ മതിലില്‍നിന്ന് ചാടിപ്പോയി ഓടും, ചിലപ്പോള്‍ വീണു പരിക്കുമേല്‍ക്കും. പൂക്കള്‍ പറിക്കാനുള്ള കാര്യത്തില്‍ ഞാന്‍ തന്നെയായിരുന്നു സംഘത്തില്‍ മുന്‍പന്തിയില്‍,'' ശശി ചിരിച്ചുകൊണ്ട് പറഞ്ഞു.

ഓണക്കാലത്ത് കിട്ടിയിരുന്ന പണം സൈക്കിള്‍ ഓടിക്കാന്‍ പഠിക്കാന്‍ ഉപയോഗിച്ചതായും ശശി പറഞ്ഞു. ''ആ ഓണദിവസം സൈക്കിളില്‍ നിന്ന് വീണ് പരിക്കേറ്റ് വീട്ടില്‍ വഴക്ക് കേട്ടതും ഓര്‍മ്മയിലുണ്ട്. ഊഞ്ഞാല്‍ ആദ്യമായി കയറേണ്ടത് ഞാനായിരിക്കണമെന്ന വാശിയുമുണ്ടായിരുന്നു,'' എന്നും അദ്ദേഹം കൂട്ടിച്ചേര്‍ത്തു.

നാടകത്തിലേക്കെത്തിയശേഷം ഓണം വീട്ടില്‍ ആഘോഷിക്കാന്‍ സാധിക്കാതെ നാടകം കളിച്ചാണ് ചെലവഴിച്ചതെന്നും സിനിമയിലെത്തിയശേഷം ഓണം സെറ്റിലായിരുന്നുവെന്നും ശശി പറഞ്ഞു. ''ഇപ്പോള്‍ വീണ്ടും ഓണത്തിന് വീട്ടില്‍ നില്‍ക്കാന്‍ കഴിയുന്നത് സന്തോഷം നല്‍കുന്നു. അന്ന് ഉണ്ടായിരുന്ന അത്രയധികം ഉല്ലാസം ഇല്ലെങ്കിലും വീട്ടുകാര്‍ക്കൊപ്പം സമയം ചെലവഴിക്കാന്‍ കഴിയുന്നത് വലിയ കാര്യമാണ്,'' അപ്പുണ്ണി ശശി പറഞ്ഞു.