നടുവേദനയുള്ള ഒരാളുടെ മാനറിസങ്ങള്‍ അത്യന്തം പെര്‍ഫെക്റ്റ്; ചിത്രം കാണുമ്പോള്‍ ഇനി ശരിക്കും പ്രശ്‌നമുണ്ടോ എന്നുവരെ തോന്നിപ്പോയി; മോഹന്‍ലാലിനെ കുറിച്ച് ഡോക്ടറുടെ കുറിപ്പ്

മോഹന്‍ലാലിന്റെ പുതിയ ചിത്രം ഹൃദയപൂര്‍വ്വയിലെ അഭിനയത്തെ പ്രശംസിച്ച് ഡോ. ബിജു ജി. നായര്‍ സോഷ്യല്‍ മീഡിയയില്‍ കുറിപ്പ് പങ്കുവെച്ചു. നടുവേദനയുള്ള ഒരാളുടെ സ്വഭാവം ചിത്രത്തില്‍ അതിശയകരമായി അവതരിപ്പിച്ചതായി അദ്ദേഹം അഭിപ്രായപ്പെട്ടു.

'ഫിലിം റിവ്യൂ എഴുതാനുള്ള റേഞ്ച് ഒന്നുമില്ലാത്ത ഒരു സാധാരണ പ്രേക്ഷകനാണ് ഞാന്‍. പക്ഷേ ഹൃദയപൂര്‍വ്വയില്‍ ലാലേട്ടന്‍ അവതരിപ്പിച്ച കഥാപാത്രത്തിലെ നടുവേദനയുള്ള ഒരാളുടെ മാനറിസങ്ങള്‍ അത്യന്തം പെര്‍ഫെക്റ്റാണ്. 32 വര്‍ഷത്തെ ചികിത്സാനുഭവത്തില്‍ ഇതുപോലെയുള്ള നിരവധി രോഗികളെ കണ്ടിട്ടുണ്ട്. ചിത്രം കാണുമ്പോള്‍ ഇനി ശരിക്കും പ്രശ്‌നമുണ്ടോ എന്നുവരെ തോന്നിപ്പോയി,' എന്നാണ് ഡോ. ബിജു തന്റെ ഫേസ്ബുക്ക് പോസ്റ്റില്‍ കുറിച്ചത്.

ചിത്രത്തിലെ ഒരു പ്രത്യേക രംഗം തന്നെ ഏറെ ആകര്‍ഷിച്ചതായും അദ്ദേഹം പറഞ്ഞു. 'ഒരു പടിക്കെട്ട് ഇറങ്ങി വരുന്ന സീന്‍ ഒരിക്കലും മറക്കാനാവില്ല. നല്ല സിനിമയാണെന്ന് പ്രത്യേകം പറയുന്നില്ലെങ്കിലും, ലാലേട്ടന്റെ അഭിനയത്തിലെ വിസ്മയം ഓരോ പ്രാവശ്യവും ഞെട്ടിക്കുന്നതാണ്,' എന്നും കുറിപ്പില്‍ അദ്ദേഹം കൂട്ടിച്ചേര്‍ത്തു.

മോഹന്‍ലാലിന്റെ അഭിനയത്തെ കുറിച്ചുള്ള ഡോ. ബിജു ജി. നായറുടെ ഈ കുറിപ്പ് സോഷ്യല്‍ മീഡിയയില്‍ വൈറലായി. ആരാധകരും സഹപ്രവര്‍ത്തകരും അദ്ദേഹത്തിന്റെ അഭിപ്രായത്തോട് യോജിച്ച് പ്രതികരണങ്ങള്‍ രേഖപ്പെടുത്തുകയാണ്.