പണി അറിയാവുന്നത് കൊണ്ടാണ് ഫീല്‍ഡില്‍ പിടിച്ച് നില്‍ക്കുന്നത്; കലാസദന്‍ ഉല്ലാസായി മമ്മൂട്ടി; ഗാനഗന്ധര്‍വ്വന്‍ ട്രെയിലര്‍ പുറത്തിറങ്ങി

മലയാളത്തിൻ്റെ മെഗാസ്റ്റാ‍ര്‍ മമ്മൂട്ടിയെ നായകനാക്കി നടനും സംവിധായകനും അവതാരകനുമായ രമേഷ് പിഷാരടി സംവിധാനം ചെയ്യുന്ന ഗാനഗന്ധര്‍വന്‍റെ ട്രെയിലര്‍ പുറത്ത് വിട്ടു. മമ്മൂട്ടിയുടെ ജന്മദിനമായ സെപ്റ്റംബര്‍ ഏഴിന് പുലര്‍ച്ചെയാണ് ട്രെയിലര്‍ പുറത്ത് വിട്ടത്.

ഗാനമേള പാട്ടുകാരനായ കലാസദന്‍ ഉല്ലാസായി മമ്മൂട്ടി  ചിത്രത്തിലെത്തുമ്പോൾ പുതുമുഖം വന്ദിത കലാസദൻ്റെ ഭാര്യയായി എത്തുന്നു. രമേഷ് പിഷാരടിയും ഹരി .പി നായരും ചേര്‍ന്നാണ് ചിത്രത്തിന് കഥയും തിരക്കഥയും സംഭാഷണവും ഒരുക്കിയിരിക്കുന്നത്.

ഹരീഷ് കണാരന്‍, മനോജ് .കെ .ജയന്‍, സുരേഷ് കൃഷ്ണ, മണിയന്‍ പിള്ള രാജു, കുഞ്ചന്‍, അശോകന്‍, മുകേഷ്, ഇന്നസെൻ്റ്, സിദ്ദീഖ്, സലിം കുമാര്‍, ധര്‍മജന്‍ ബോൾഗാട്ടി, സുനില്‍ സുഖദ, അതുല്യ, ശാന്തി പ്രിയ തുടങ്ങിയവരാണ് ചിത്രത്തിലെ മറ്റു പ്രധാന താരങ്ങൾ. 

അഴകപ്പന്‍ ഛായാഗ്രഹണവും ലിജോ പോള്‍ എഡിറ്റിങ്ങും നിര്‍വഹിക്കുന്ന ഗാനഗന്ധര്‍വന് സംഗീതമൊരുക്കുന്നത് ദീപക് ദേവാണ്. ഇച്ചായീസ് പ്രൊഡക്ഷന്‍സും രമേഷ് പിഷാരടി എന്‍റര്‍ടെയ്ൻമെന്‍റ്സും ചേര്‍ന്നൊരുക്കുന്ന ഗാനഗന്ധര്‍വന്‍റെ നിര്‍മാണം ശ്രീലക്ഷ്മി, ശങ്കര്‍ രാജ്, സൗമ്യ രമേഷ് എന്നിവര്‍ ചേര്‍ന്നാണ് നിര്‍വ്വഹിക്കുന്നത്.