താര സംഘടനയായ 'അമ്മ'യില് (AMMA) ഉടലെടുത്ത ആഭ്യന്തര തര്ക്കങ്ങളും ചേരിപ്പോരും സങ്കീര്ണമായതോടെ തര്ക്ക വിഷയങ്ങള് പരിശോധിക്കാന് അഞ്ചംഗ സമിതി. സംഘടനയുടെ പ്രസിഡന്റ് ശ്വേതാ മേനോനും ജനറല് സെക്രട്ടറി കുക്കു പരമേശ്വരനും പുറമെ രമേശ് പിഷാരടി, പൊന്നമ്മ ബാബു, മുത്തുമണി എന്നിവരാണ് സമിതിയിലെ അംഗങ്ങള്. സ്വതന്ത്രസമിതി വേണമെന്ന് അന്സിബ ആവശ്യപ്പെട്ടതിനെ തുടര്ന്നാണ് എക്സിക്യൂട്ടിവ് കമ്മിറ്റിയില് ഇല്ലാത്ത മൂന്ന് പേരെ സമിതിയില് ഉള്പ്പെടുത്തിയത്. ടിനി ടോമിനെതിരെ അന്സിബ ഹസന് നല്കിയ പരാതി സമിതി പരിശോധിക്കും.
നടന് ടിനി ടോം തന്നെ മതതീവ്രവാദിയായി ചിത്രീകരിച്ചുവെന്നും തനിക്കെതിരെ അവിഹിതക്കഥകള് പ്രചരിപ്പിച്ചുവെന്നുമാണ് അന്സിബയുടെ പ്രധാന ആരോപണം. ഭരണസമിതിയുടെ ഭാഗമായ ടിനി ടോം തന്റെ വളര്ച്ചയെ തടയാന് ശ്രമിക്കുന്നുവെന്ന് ആരോപിച്ച നടി, ഇയാള്ക്കെതിരെ കൊച്ചി കടവന്ത്ര പൊലീസില് പരാതി നല്കുകയും ചെയ്തിട്ടുണ്ട്. നടിയുടെ പരാതിയില് പൊലീസ് അന്വേഷണം ആരംഭിച്ചുകഴിഞ്ഞു. വരും ദിവസങ്ങളില് അന്സിബയുടെ മൊഴി വിശദമായി രേഖപ്പെടുത്തിയ ശേഷമാകും ടിനി ടോമിനെ വിളിപ്പിക്കുന്ന കാര്യത്തില് പൊലീസ് തീരുമാനമെടുക്കുക. എന്നാല്, ഈ ആരോപണങ്ങളെല്ലാം നിഷേധിച്ച ടിനി ടോം, സംഘടനയില് സജീവമായി പ്രവര്ത്തിക്കുന്ന തന്റെ വളര്ച്ചയില് ഭയമുള്ള ചിലര് നടത്തുന്ന ഗൂഢാലോചനയാണിതെന്നാണ് വിശദീകരിക്കുന്നത്.
ടിനി ടോമിനെതിരെയുള്ള അന്വേഷണത്തിന് പ്രസിഡന്റും ജനറല് സെക്രട്ടറിയും ഉള്പ്പെടാത്ത തികച്ചും സ്വതന്ത്രമായൊരു സമിതി വേണമെന്നായിരുന്നു അന്സിബയുടെ നിലപാട്. എന്നാല് ഭരണഘടനാനുസൃതമായി പ്രസിഡന്റിനെയും ജനറല് സെക്രട്ടറിയെയും മാറ്റിനിര്ത്തിക്കൊണ്ട് ഒരു പാനല് രൂപീകരിക്കാന് ആകില്ലെന്ന് ശ്വേതാ മേനോന് നിലപാട് എടുത്തതോടെയാണ് ഈ മൂന്ന് പേരെക്കൂടി ഉള്പ്പെടുത്തി അഞ്ചംഗ സമിതിയാക്കി മാറ്റിയത്. എങ്കിലും, തന്റെ പരാതിയില് ശ്വേതാ മേനോനും ആരോപണവിധേയ ആണെന്നും അതിനാല് അവര് ഉള്പ്പെട്ട സമിതിക്ക് മുന്നില് തന്റെ പരാതി ബോധിപ്പിക്കുന്നതില് കാര്യമില്ലെന്നുമാണ് നടി നേരത്തെ സ്വീകരിച്ച നിലപാട്. പുതുതായി രൂപീകരിച്ച ഈ സമിതിക്ക് മുന്നില് അന്സിബ എത്തുമോ എന്ന കാര്യത്തില് താരം ഇതുവരെ വ്യക്തമായ പ്രതികരണം നടത്തിയിട്ടില്ല.
നേരത്തെ നടി ലക്ഷ്മി പ്രിയ തനിക്കെതിരെ പരാതി നല്കിയ സമയത്ത്, വിഷയത്തില് ഇടപെടണമെന്ന് അന്സിബ 'അമ്മ' സംഘടനയോട് ആവശ്യപ്പെട്ടിരുന്നു. എന്നാല് അന്ന് 'നതിംഗ് ടു ഡു വിത്ത് അമ്മ' (അമ്മയ്ക്ക് ഇതില് ഒന്നും ചെയ്യാനില്ല) എന്ന നിലപാടാണ് സംഘടനയുടെ പ്രസിഡന്റ് സ്വീകരിച്ചതെന്ന് അന്സിബ വ്യക്തമാക്കുന്നു. എന്നാല് പിന്നീട് ലക്ഷ്മി പ്രിയയെ പ്രസിഡന്റ് വ്യക്തിപരമായി പിന്തുണച്ചതായി അവര് തന്നെ എക്സിക്യൂട്ടീവ് കമ്മിറ്റിയില് പറയുകയുണ്ടായി. ഇത്തരം ഇരട്ടത്താപ്പുകള് കാണിക്കുന്ന പ്രസിഡന്റും സെക്രട്ടറിയും ഉള്പ്പെടുന്ന കമ്മിറ്റിക്ക് മുന്നില് നിന്ന് ഇനി എന്ത് നീതിയാണ് ലഭിക്കുക എന്ന ആശങ്ക അന്സിബ പങ്കുവെക്കുന്നുണ്ട്.
സംഘടന എന്നത് കേവലം ചാരിറ്റി പ്രവര്ത്തനങ്ങള്ക്ക് വേണ്ടി മാത്രമുള്ളതല്ലെന്നും, മറിച്ച് തങ്ങളുടെ അംഗങ്ങള്ക്കിടയിലെ പ്രശ്നങ്ങള് പരിഹരിക്കാനുള്ള ഉത്തരവാദിത്തം കൂടി സംഘടനയ്ക്കുണ്ടെന്നും അന്സിബ ഓര്മ്മിപ്പിക്കുന്നു. വരും ദിവസങ്ങളില് പൊലീസിന്റെ അന്വേഷണ പുരോഗതിയും പുതിയ സമിതിയുടെ നീക്കങ്ങളും 'അമ്മ' സംഘടനയിലെ ഈ ആഭ്യന്തര കലഹത്തിന്റെ ഭാവി നിര്ണ്ണയിക്കുന്നതില് നിര്ണ്ണായകമാകും.
Premium Lifestyle and Entertainment website
രേണു പോരാട്ടത്തിന്റെ നടുവിലാണ്; ചെറുതല്ലാത്ത രോഗത്തോട് ധൈര്യത്തോടെ പൊരുതുകയാണ്; മെഡിക്കല് റിപ്പോര്ട്ട് പ്രകാരം രോഗം കൂടുതല് സാരമായി ബാധിച്ചു; കോട്ടയം മെഡിക്കല് കോളേജില് തുടര് ചികിത്സ ആരംഭിക്കും; ബിഷപ് നോബിള് ഫിലിപ്പ് അമ്പലവേലില് സുധിലയത്തില് എത്തിയ ചിത്രം പങ്ക് വച്ച് ഫിറോസ് കെഎച്ച്ഡിഇസി കുറിച്ചത്
പ്രഭുദേവയുടെ കൊറിയോഗ്രാഫിയില് നര്ത്തകനായി തുടക്കം; നൊറാ ഫത്തേഹിയുമായുള്ള അടുപ്പം നല്കിയ ലോക വേദി; ഫുട്ബോള് ലോകകപ്പില് മലയാളിയുടെ ചുവടുകള്; ഔദ്യോഗിക ഗാനത്തിന് നൃത്തസംവിധാനമൊരുക്കി പാലക്കാട്ടുകാരന്; ഫിഫ ആല്ബവുമായി സഹകരിക്കുന്ന ആദ്യ ഇന്ത്യക്കാരനായി രജിത് ദേവിനെ അറിയാം