കലാമണ്ഡലത്തില്‍ ഓട്ടം തുള്ളല്‍ പഠിച്ച ഒരുത്തി; ഇവള്‍ ഓട്ടം തുള്ളലാണോ പഠിച്ചത് എന്നുപോലും അറിയില്ല;വീര്‍ത്ത കവിളും ആകപ്പാടെ ഉരുണ്ടിരിക്കുന്ന ഒരുത്തി;നീ അമ്മയുടെ വയറ്റില്‍ ഉണ്ടാകുന്നതിനു മുന്‍പ് മുഖത്ത് ചായം തേച്ച് ഫീല്‍ഡില്‍ ഇറങ്ങി;പിണ്ഡോദരി മോളെ നിന്നെ ഏതേലും പൊതുവേദിയില്‍ വച്ച് ഞാന്‍ കാണും; സ്നേഹ ശ്രീകുമാറിനെതിരെ വീഡിയോയുമായി സത്യഭാമ

നടി സ്‌നേഹ ശ്രീകുമാറിനെ അധിക്ഷേപിച്ചും ബോഡി ഷെയിമിങ് നടത്തിയും കലാമണ്ഡലം സത്യഭാമ. മുന്‍പ് നര്‍ത്തകനും നടന്‍ കലാഭവന്‍ മണിയുടെ സഹോദരനുമായ ആര്‍എല്‍വി രാമകൃഷ്ണനുമായി ബന്ധപ്പെട്ട് സത്യഭാമ നടത്തിയ വിവാദ പരാമര്‍ശങ്ങളില്‍ സ്നേഹ പ്രതികരിച്ചിരുന്നു. രാമകൃഷ്ണനെ അനുകൂലിച്ചാണ് സ്‌നേഹ പ്രതികരിച്ചത്. ഇതിനുള്ള മറുപടിയാണ് സത്യഭാമയുടെ പുതിയ ഫെയ്‌സ്ബുക്ക് വീഡിയോ

പിണ്ഡോദരി മോളെ' എന്ന് സ്‌നേഹയെ വിശേഷിപ്പിച്ച സത്യഭാമ, സ്‌നേഹയുടെ ഭര്‍ത്താവ് ശ്രീകുമാര്‍ കേസില്‍പ്പെട്ടതിനെ പരിഹസിക്കുകയും പൊതുവേദിയില്‍ വച്ച് കാണുമ്പോള്‍ ഇതിന് മറുപടി നല്‍കുമെന്നും വിഡിയോയില്‍ ഭീഷണി മുഴക്കുന്നുണ്ട്. സ്‌നേഹയുടെയോ രാമകൃഷ്ണന്റെയോ പേര് സത്യഭാമ പരാമര്‍ശിച്ചിട്ടില്ലെങ്കിലും ഫെയ്‌സ്ബുക്ക് വിഡിയോയില്‍ സ്‌നേഹയുടെ ചിത്രം സത്യഭാമ പങ്കുവച്ചിട്ടുണ്ട്.

''പിണ്ഡോദരി മോളെ നിന്നെ ഏതേലും പൊതുവേദിയില്‍ വച്ച് ഞാന്‍ കാണും. അന്നു നീ നിന്റെ ഭര്‍ത്താവ് പെണ്ണ് കേസില്‍ പെട്ടതിനേക്കാള്‍ കൂടുതല്‍ വിഷമിക്കും. എനിക്ക് എതിരെ നീ ഇട്ട വിഡിയോ ഞാന്‍ സൂക്ഷിച്ചു വച്ചിട്ടുണ്ട്. തത്ക്കാലം ഇത് ഇരിക്കട്ടെ'.- വിഡിയോ പങ്കുവച്ച് സത്യഭാമ കുറിച്ചു.

ഞാന്‍ കുറച്ചു വിവാദങ്ങളിലൊക്കെ പെട്ടതായി എല്ലാവര്‍ക്കും അറിയാമല്ലോ. അത് വിവാദമായി നിങ്ങള്‍ക്ക് തോന്നിയെങ്കിലും എനിക്ക് അങ്ങനെ തോന്നിയിട്ടില്ല. അതിന്റെ സത്യാവസ്ഥകള്‍ ഞാന്‍ ലൈവില്‍ വന്നു പറയും. പക്ഷേ ആ സമയത്ത് എന്നെ വേദനിപ്പിച്ച ചിലരുണ്ട്. എന്റെ ബന്ധുക്കള്‍ക്ക് എന്നെ പബ്ലിക് ആയി സപ്പോര്‍ട്ട് ചെയ്യാന്‍ പറ്റില്ല, കാരണം മാധ്യമങ്ങള്‍ അവരെ വളയും.

എങ്കിലും എന്റെ ബന്ധുക്കള്‍ എല്ലാവരും എന്നെ വിളിച്ച് പിന്തുണ അറിയിച്ചു. എന്റെ കരിയര്‍ പോലും നിന്നും പോകുന്ന അവസ്ഥ ഉണ്ടായിരുന്നു. പക്ഷേ ഈശ്വരാധീനം ഉള്ള കല ആണ് ഞാന്‍ ചെയ്യുന്നത്. അതുകൊണ്ടു ദൈവങ്ങള്‍ എന്റെ കൂടെ നിന്നു. ഞാന്‍ തളര്‍ന്നില്ല ഒറ്റയ്ക്ക് പോരാടി. കലാലോകത്ത് എനിക്ക് വേണ്ടപ്പെട്ടവര്‍ക്ക് പോലും നേരിട്ട് സഹായിക്കാന്‍ സാധിച്ചില്ല. കല പഠിച്ച ചിലര്‍ എന്നെ ദ്രോഹിക്കുകയും ചെയ്തു. ദേഹോപദ്രവം അല്ല ഞാന്‍ ഉദേശിച്ചത്, അല്ലാതെ മാധ്യമങ്ങളിലൂടെ ഓരോന്ന് വിളിച്ചു പറഞ്ഞു.

ആ സമയത്ത് ഞാന്‍ മാനസികമായി കുറച്ചു ബുദ്ധിമുട്ടിയിരുന്നു. കലാമണ്ഡലത്തില്‍ ഓട്ടം തുള്ളല്‍ പഠിച്ച ഒരുത്തിയുണ്ട്. ഇവള്‍ ഓട്ടം തുള്ളലാണോ പഠിച്ചത് എന്നുപോലും എനിക്ക് അറിയില്ല. ഞാന്‍ പിന്നീടാണ് അത് അറിഞ്ഞത്, ചാനലില്‍ വരുന്ന 'മറിമായം' എന്നൊരു പരിപാടിയില്‍ അഭിനയിക്കുന്ന സ്ത്രീയാണത്. വളരെ നല്ല രീതിയില്‍ പോകുന്ന ഒരു പരിപാടിയാണ് അത്. മണികണ്ഠന്‍, നിയാസ്, ഉണ്ണി തുടങ്ങിയ അസാധ്യ കലാകാരന്മാര്‍ ഒക്കെ അതിലുണ്ട്.

അതിനകത്താണ് ഞാന്‍ പറയുന്ന ഈ കക്ഷി ഉള്ളത്. അവളെ നിങ്ങള്‍ക്ക് എല്ലാവര്‍ക്കും അറിയാം. വീര്‍ത്ത കവിളും ആകപ്പാടെ ഉരുണ്ടിരിക്കുന്ന ഒരുത്തി. ഇവള്‍ വന്നിട്ട് എന്നെ പറഞ്ഞത് എന്താണെന്ന് അറിയാമോ. ഈ സ്ത്രീ മറ്റേയാളുടെ കൂടെ വന്ന് നൃത്തം കളിക്കാമോ എന്ന്, എന്റെ എതിര്‍ കക്ഷിയായ ആളുടെ കൂടെ, എന്താടി എനിക്ക് കളിക്കാന്‍ പറ്റാത്തത് ? ഞാന്‍ സ്ത്രീ അല്ല എന്ന് എവിടെയെങ്കിലും പറഞ്ഞിട്ടുണ്ടോ.

നിനക്ക് ഡാന്‍സ് ഇന്റര്‍വ്യൂവിനു ചെന്നിട്ട് കിട്ടാഞ്ഞിട്ടല്ലേ നീ ഓട്ടം തുള്ളല്‍ എടുത്തത്. നീ എന്നിട്ട് ഇപ്പോ ഓട്ടം തുള്ളല്‍ ആണോ തുള്ളുന്നത്, ആദ്യം നീ പഠിച്ച തൊഴില്‍ നീ കൈകാര്യം ചെയ്യുന്നുണ്ടോ, അത് ആദ്യം നീ ചെയ്യ്, എന്നിട്ട് നീ എന്റെ അടുത്തേക്ക് വാ. നീ നിന്റെ അമ്മയുടെ വയറ്റില്‍ ഉണ്ടാകുന്നതിനു മുന്‍പ് ഞാന്‍ മുഖത്ത് ചായം തേച്ച് ഫീല്‍ഡില്‍ ഇറങ്ങിയതാണ്.

നീ സ്ത്രീ എന്ന് വിളിക്കാന്‍ ഞാന്‍ പുരുഷന്‍ ആണെന്ന് പറഞ്ഞ് പാന്റും ഷര്‍ട്ടും ഇട്ടു നടന്നിട്ടില്ല. നീ പോയി കേസ് കൊടുക്ക് അപ്പോള്‍ ഞാന്‍ നിന്റെ പിറകെ വരാം. നീ പഠിച്ചത് നീ ഒന്ന് കളിച്ചേ. എന്റെ ഒരു ഫ്രണ്ട് പറഞ്ഞപ്പോഴാണ് അറിഞ്ഞത് നീ തുള്ളല്‍ ആണ് പഠിച്ചതെന്ന്. തുള്ളല്‍ നല്ല ഒരു കലയാണ് അത് സമ്മതിച്ചു.

നീ ആദ്യം അത് തുള്ള്. നീ കഞ്ഞികുടിച്ചു ജീവിക്കാന്‍ അല്ലേ 'മറിമായ'ത്തില്‍ പോയത്. നീ വലിയ ആര്‍ട്ടിസ്റ്റ് ആണെന്നാണോ വിചാരം. എന്നോട് നീ പറഞ്ഞില്ലേ കളിക്കാന്‍, നിനക്ക് ഇപ്പോള്‍ എന്റെ കളി കാണണോ. ഞാന്‍ അന്തസായി എന്റെ തൊഴില്‍ ആണ് ചെയ്തു ജീവിക്കുന്നത്. നീ പറഞ്ഞ ആള്‍ പഠിച്ചതുപോലെ തന്നെയാണ് ഞാനും പഠിച്ചത്. നിന്റെ നാട്ടില്‍ ഒരു പരിപാടിക്ക് എന്നെ വിളിക്ക് ഞാന്‍ വന്നു കളിക്കാം.

നീ എന്നെ പറഞ്ഞതിന്റെ കുറച്ചു ദിവസം കഴിഞ്ഞപ്പോള്‍ നിനക്ക് കിട്ടിയോ, നിന്റെ ഭര്‍ത്താവ് പീഡന കേസില്‍ പ്രതിയായി. അതൊക്കെ നീ മറന്നോ ? ഞങ്ങളൊന്നുമതു മറന്നിട്ടില്ല. അതിനാണ് ദൈവം എന്നൊരു ശക്തി ഉള്ളത്. ഒരാളെ അറിയാതെ ഒന്നും പറയരുത്. ഒരു വ്യക്തിയെക്കുറിച്ച് സത്യമറിയാതെ ഞാന്‍ ഒന്നും പറയില്ല. നീ എന്റെ കേസിന്റെ സമയത്ത് എനിക്കിട്ടങ്ങു പൂശി.

എനിക്കൊരു അവസരം കിട്ടും, ഞാന്‍ ഫെയ്‌സ്ബുക്കും യൂട്യൂബും ഒക്കെ തുടങ്ങിയത് കാശ് ഉണ്ടാക്കാനല്ല. അങ്ങനെ കുറേപ്പേരുണ്ട്, ഒരു പണിയും അറിയാത്തവര്‍. എന്റെ കയ്യില്‍ അന്തസായി ഒരു പണി ഉണ്ട്. എനിക്ക് നൃത്തം ചെയ്യാന്‍ സാധിക്കും എന്നുള്ളതുകൊണ്ടാണ് ഞാന്‍ ചാനല്‍ തുടങ്ങിയത്. നീ എന്റെ പേജ് തുറന്നു നോക്ക് ഞാന്‍ ഡാന്‍സിനെപ്പറ്റിയും എന്റെ കുട്ടികളുടെ പരിപാടികളെപ്പറ്റിയും അതിനകത്ത് ഇട്ടിട്ടുള്ളത് നോക്ക്. നീ വലിയ ആര്‍ടിസ്റ്റ് ആണെന്നാണ് നിന്റെ വിചാരം.

മുഖത്ത് ചായം തേച്ചു എന്ന് കരുതി ആര്‍ട്ടിസ്റ്റ് ആകില്ല, നിന്റെ ഏറ്റവും വലിയ തൊഴില്‍ 'മറിമായ'ത്തില്‍ തുള്ളുന്നതാണ്. നിന്നെ എന്താ ആരും ഉര്‍വശി ശാരദ എന്ന് വിളിക്കാത്തത്? നമുക്ക് വലിയ വലിയ നടിമാര്‍ ഒക്കെ ഉണ്ട്. നിന്റെ പേര് എന്താ നിന്റെ പരിപാടിയില്‍. നിന്റെ ഫിഗറിന് പറ്റിയ പേരാണ് നിനക്ക് ഇട്ടിരിക്കുന്നത്. എന്നെ പറഞ്ഞതിന്റെ ആറു മാസം നിന്റെ ഭര്‍ത്താവിന് കിട്ടി.

ഇപ്പോള്‍ നിന്റെ ഭര്‍ത്താവിനെ അതില്‍ കാണാന്‍ ഇല്ലല്ലോ. അനാവശ്യം പറയുമ്പോള്‍ ദൈവം എന്നൊരു ശക്തി ഉണ്ടെന്നു ഓര്‍ക്കണം. അതിന്റെ അടി ആണ് നിനക്ക് കിട്ടിയത്. ഇതൊന്നു പറയണം എന്ന് വിചാരിച്ചിട്ട് കുറെ ദിവസമായി ഇന്നാണ് അവസരം കിട്ടിയത്. ഇനി നീ എനിക്കെതിരെ വൃത്തിയായി ഫെയ്‌സ്ബുക്കില്‍ ഇട്. അപ്പോള്‍ അതിന്റെ പുറകെ ഞാന്‍ വരം.''-ഇതായിരുന്നു കലാമണ്ഡലം സത്യഭാമയുടെ വാക്കുകള്‍