'എതിര്‍ദിശയില്‍ നിന്ന് അതിവേഗതയില്‍ വന്ന ഫോര്‍ച്ചുണര്‍ കാര്‍ ഇടിക്കുകയായിരുന്നു'; മത്സരഓട്ടത്തില്‍ പാഞ്ഞെത്തിയ കാറിടിച്ച് ഞങ്ങള്‍ക്ക് നഷ്ടമായത് കൊച്ചുവിനെ; അയ്യപ്പ സംഗമത്തില്‍ പങ്കെടുത്തു മടങ്ങവേ അപകടത്തില്‍ മരിച്ച  ബെനറ്റ് രാജിനെ അനുസ്മരിച്ച് കുറിപ്പുമായി ഗായകന്‍ ഇഷാന്‍ ദേവ് 

അയ്യപ്പസംഗമത്തില്‍ ഭക്തിഗാന സദസ്സില്‍ പങ്കെടുത്തു മടങ്ങവേ വാഹനാപകടത്തില്‍ മരിച്ച ബെനറ്റ് രാജിനെ അനുസ്മരിച്ച് ഗായകന്‍ ഇഷാന്‍ ദേവ്. അയ്യപ്പസംഗമത്തിന്റെ ഭാഗമായി നടന്ന ഇഷാന്‍ ദേവിന്റെ ഭക്തിഗാന സദസ്സിനു പിന്നണിക്കെത്തിയ സംഘം സഞ്ചരിച്ച വാഹനമാണ് അപകടത്തില്‍ പെട്ടത്. കാര്‍ ഓടിപ്പിച്ചിരുന്നത് ബെനറ്റ് രാജായിരുന്നു. മറ്റു കാറുകളുടെ മത്സരഓട്ടമാണ് ബെനറ്റിന്റെ ജീവനെടുക്കാന്‍ കാരണമായതെന്ന് ഇഷാന്‍ ദേവ് സമൂഹമാധ്യമത്തില്‍ പങ്കുവച്ച കുറിപ്പില്‍ പറഞ്ഞു. 

ഇഷാന്‍ ദേവിന്റെ കുറിപ്പിന്റെ പൂര്‍ണരൂപം: ഇന്നലെ ഞങ്ങളുടെ ബാന്റ് പ്രോഗ്രാം കഴിഞ്ഞു മടങ്ങുന്ന വഴി ഞങ്ങളുടെ ഡ്രമ്മര്‍ കിച്ചുവിന്റെ കാര്‍ റാന്നിയില്‍ അപകടത്തില്‍ പെട്ടു. കിച്ചുവിന്റെ സുഹൃത്ത് ബെനറ്റ് രാജ് ആണ് കാര്‍ ഡ്രൈവ് ചെയ്തിരുന്നത്. എതിര്‍ദിശയില്‍ നിന്ന് അതിവേഗതയില്‍ wrong side കയറി വന്ന fortuner ഇടിച്ചുണ്ടായ അപകടത്തില്‍ പ്രിയപ്പെട്ട കൊച്ചു എന്ന് ഞങ്ങള്‍ വിളിക്കുന്ന ബെനറ്റ് മരണപെട്ടു. മറ്റു കാറുകളുടെ മത്സരഓട്ടത്തില്‍ വന്ന കാര്‍ ആണ് അപകടം ഉണ്ടാക്കിയത്. അപകടത്തില്‍ ഞങ്ങളുടെ ഡ്രമ്മര്‍ കിച്ചുവിന് കാലിനു ഒടിവ് ഉണ്ടായതിനെ തുടര്‍ന്ന് കോഴഞ്ചേരി മുത്തൂറ്റ് ആശുപത്രിയില്‍ surgery കഴിഞ്ഞു.. 

ഗിറ്റാറിസ്‌റ് ഡോണി ക്കു തലക്കും കൈക്കും ആണ് പരിക്ക്. ഡോണിക്കും സര്‍ജറി ആവശ്യം ഉണ്ട്. രണ്ടു പേരും അപകടനില തരണം ചെയ്തു തീവ്രപരിചരണ വിഭാഗത്തില്‍ ആണ്. കുടുംബ അംഗകളും ഞങ്ങള്‍ സുഹൃത്തുക്കളും ഇവിടെ ആശുപത്രിയില്‍ ഉണ്ട്.. ഇടിച്ച വാഹനം കണ്ടെത്തി നിയമപരമായ നടപടികള്‍ പോലീസിന്റെ ഭാഗത്തു നിന്ന് തുടങ്ങിയിട്ടുണ്ട്. ഈ പ്രതിസന്ധി ഘട്ടത്തില്‍ അവരെ സഹായിക്കാനും, സപ്പോര്‍ട്ട് ചെയ്യുവാനും അറിയുന്നവരും, അറിയാത്തവരുമായ എല്ലാ സന്മനസ്സുകളുടെയും പ്രാര്‍ത്ഥനയും, സപ്പോര്‍ട്ടും ഉണ്ടാകണം. 

ശനിയാഴ്ച ഉച്ചയ്ക്ക് 3.20ന് പുനലൂര്‍-മൂവാറ്റുപുഴ പാതയില്‍ മന്ദിരം ജംക്ഷനും വാളിപ്ലാക്കല്‍പടിക്കും മധ്യേ പൊട്ടങ്കല്‍പടി വളവിലാണ് അപകടം നടന്നത്. എതിര്‍ദിശയില്‍ അതിവേഗതയില്‍ റോങ് സൈഡ് കയറി വന്ന ഫോര്‍ച്ച്യൂണര്‍ കാറിടിച്ച് ബെനറ്റ് രാജ് സഞ്ചരിച്ചിരുന്ന വാഹനം പൂര്‍ണമായി തകര്‍ന്നു. ഈ അപകടത്തില്‍ ഡ്രമ്മര്‍ കിച്ചുവിന് കാലിന് ഒടിവ് സംഭവിച്ചു. ഇദ്ദേഹത്തിന് കോഴഞ്ചേരി മുത്തൂറ്റ് ആശുപത്രിയില്‍ ശസ്ത്രക്രിയ നടത്തി. ഗിറ്റാറിസ്‌റ് ഡോണിക്ക് തലയ്ക്കും കയ്യിനും പരിക്കേറ്റിട്ടുണ്ട്. ഇദ്ദേഹത്തിനും ശസ്ത്രക്രിയ ആവശ്യമാണെന്ന് റിപ്പോര്‍ട്ടുകളുണ്ട്. ഇരുവരും അപകടനില തരണം ചെയ്തതായും തീവ്രപരിചരണ വിഭാഗത്തില്‍ നിരീക്ഷണത്തിലാണെന്നും അറിയിച്ചിട്ടുണ്ട്. 

മത്സരയോട്ടമാണ് അപകടത്തിന് കാരണമെന്ന് ഇഷാന്‍ ദേവ് കുറിപ്പില്‍ സൂചിപ്പിക്കുന്നു. അപകടത്തില്‍പ്പെട്ട വാഹനം പോലീസ് കണ്ടെത്തിയിട്ടുണ്ട്. നിയമനടപടികള്‍ ആരംഭിച്ചതായും അധികൃതര്‍ അറിയിച്ചു. ഈ പ്രതിസന്ധി ഘട്ടത്തില്‍ എല്ലാവരുടെയും പ്രാര്‍ത്ഥനയും പിന്തുണയും അഭ്യര്‍ത്ഥിച്ച് കൊണ്ടാണ് ഇഷാന്‍ ദേവ് കുറിപ്പ് അവസാനിപ്പിക്കുന്നത്. കാറിന്റെ വാതിലുകള്‍ വെട്ടിപ്പൊളിച്ചാണ് യാത്രക്കാരെ പുറത്തെടുത്തത്. ബെനറ്റിനെ കോഴഞ്ചേരി സ്വകാര്യ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല.