കപ്പ് അനുമോള്‍ കൊണ്ട് പോയപ്പോള്‍ രണ്ടാം സ്ഥാനം നേടി അനീഷ്; ഷാനവാസിന് മൂന്നാം സ്ഥാനം; വിജയിക്ക് ലഭിക്കുക 50 ലക്ഷം രൂപ;  ബിഗ് ബോസ് സീസണ്‍ 7 വിജയിയായി വീണ്ടും വനിതയെത്തുമ്പോള്‍

മോഹന്‍ലാല്‍ അവതാരകനായ ബിഗ് ബോസ് മലയാളം സീസണ്‍ 7ന്റെ വിജയിയായി അഭിനേത്രിയും മോഡലുമായി അനുമോള്‍. അനീഷാണ് രണ്ടാം സ്ഥാനത്ത്. ഷാനവാസാണ് മൂന്നാം സ്ഥാനം നേടിയത്. നാലാം സ്ഥാനത്ത് നെവിനും അഞ്ചാം സ്ഥാനത്ത് അക്ബറുമാണ് ഇടം പിടിച്ചത്. മോഹന്‍ലാലാണ് വിജയിയെ പ്രഖ്യാപിച്ചത്.

ഓഗസ്റ്റ് 3നാണ് ബിഗ് ബോസ് റിയാലിറ്റി ഷോയുടെ ഏഴാം സീസണ്‍ തുടങ്ങിയത്. ഏഴിന്റെ പണിയെന്ന ടാഗ് ലൈനുമായി എത്തിയ സീസണ്‍ അക്ഷരാര്‍ത്ഥത്തില്‍ അതുതന്നെയായിരുന്നു. ഓരോ ദിവസവും പലതരം പണികള്‍ക്കിടയില്‍ വൈല്‍ഡ് കാര്‍ഡ് അടക്കം 25 മത്സരാര്‍ത്ഥികളും പടപൊരുതി. ഓരോ ആഴ്ചയിലും നോവുകള്‍ സമ്മാനിച്ച് ഒന്നും രണ്ടും പേര്‍ ഫിനാലെ കാണാതെ ബിഗ് ബോസിന്റെ പടിയിറങ്ങി. അങ്ങനെ എവിക്ടായി എവിക്ടായി അവസാനം 5 മത്സരാര്‍ത്ഥികള്‍ അവശേഷിച്ചു. ഇവരില്‍ നിന്നാണ് അനുമോള്‍ വിജയിയായത്.

ഇത്തവണത്തെ ടോപ് ഫൈവില്‍ ഒരേയൊരു വനിതാ മത്സരാര്‍ഥി മാത്രമേ ഉണ്ടായിരുന്നുള്ളൂ- അനുമോള്‍. ഒടുവില്‍ അനുമോള്‍ തന്നെ വിന്നറാകുകയും ചെയ്തു എന്നതാണ് ഇത്തവണത്തെ സീസണിന്റെ പ്രധാന പ്രത്യേകത. ഇത് രണ്ടാം തവണയാണ് ബിഗ് ബോസ് മലയാളത്തിന് ഒരു വനിതാ വിജയി ഉണ്ടാകുന്നത്. ബിഗ് ബോസ് മലയാളം സീസണ്‍ നാലില്‍ ദില്‍ഷാ പ്രസന്നനനായിരുന്നു വിജയി.

അനുമോള്‍, അനീഷ്, ഷാനവാസ്, നെവിന്‍, അക്ബര്‍ എന്നിവരായിരുന്നു ഇത്തവണത്തെ ഫൈനല്‍ ടോപ് ഫൈവില്‍ എത്തിയത്. ഇവരില്‍ അക്ബറായിരുന്നു ആദ്യം പുറത്തായത്. തുടര്‍ന്ന് യഥാക്രമം നെവിന്‍, ഷാനവാസ്, എന്നിവരും പുറത്തായി. പിന്നീട് ബാക്കിയായ അനീഷിനെയും അനുമോളെയും ബിഗ് ബോസ് വീട്ടിലെത്തി മോഹന്‍ലാല്‍ ഗ്രാന്‍ഡ് ഫിനാലെ വേദിയിലേക്ക് ക്ഷണിച്ചുകൊണ്ടുവരികയായിരുന്നു. ഒടുവില്‍ വോട്ടുകള്‍ മാറിമറിഞ്ഞ നാടകീയ നിമിഷങ്ങള്‍ക്കൊടുവില്‍ മോഹന്‍ലാല്‍ അനുമോളുടെ കയ്യ് പിടിച്ച് ഉയര്‍ത്തുകയായിരുന്നു. ബിഗ് ബോസിന് വീണ്ടും ഒരു വനിതാ വിജയി.

വര്‍ണാഭമായ ചടങ്ങില്‍ മോഹന്‍ലാല്‍ തന്നെ ബിഗ് ബോസ് ട്രോഫി അനുമോള്‍ക്ക് സമ്മാനിച്ചു. 50 ലക്ഷം രൂപയാണ് സമ്മാനത്തുക. കോമണര്‍ റണ്ണറപ്പായി എന്ന ഒരു പ്രത്യേകതയും ഇത്തവണത്തെ ബിഗ് ബോസിനുണ്ട്. മൈജി കോണ്‍ടെസ്റ്റില്‍ വിജയിയായാണ് അനീഷി ടി എ ബിഗ് ബോസില്‍ കോമണറായി മത്സരിക്കാന്‍ യോഗ്യത നേടിയിരുന്നത്.

വിജയിക്ക് പ്രഖ്യാപിച്ച 50 ലക്ഷം രൂപയില്‍ നിന്ന്, 'ബിഗ് ബാങ്ക് വീക്ക്' ടാസ്‌കുകളിലൂടെ മത്സരാര്‍ത്ഥികള്‍ നേടിയ തുക കുറയ്ക്കുന്നതിനാല്‍, ടൈറ്റില്‍ വിന്നറായ അനുമോള്‍ക്ക് ലഭിക്കുക 45.25 ലക്ഷം രൂപയായിരിക്കും. ഒന്നാം സമ്മാനമായി ലഭിക്കുന്ന 45.25 ലക്ഷം രൂപയ്ക്ക് 30% വരെ നികുതി ബാധകമാകും. ഇതിനുപുറമെ, സ്പോണ്‍സര്‍മാര്‍ പ്രഖ്യാപിക്കുന്ന കാറുകളും സര്‍പ്രൈസ് സമ്മാനങ്ങളും അനുമോള്‍ ലഭിച്ചിട്ടുണ്ട്. ഫൈനലിസ്റ്റുകളില്‍ ഏറ്റവും കൂടുതല്‍ പ്രതിഫലം കൈപ്പറ്റുന്ന മത്സരാര്‍ത്ഥി അനുമോളാണ്. പ്രതിദിനം 65,000 രൂപ എന്ന കണക്കില്‍ 100 ദിവസം പൂര്‍ത്തിയാക്കുമ്പോള്‍ അനുമോള്‍ക്ക് പ്രതിഫലമായി മാത്രം ലഭിക്കുക ഏകദേശം 65 ലക്ഷം രൂപയാണ്. സമ്മാനത്തുകയേക്കാള്‍ പ്രതിഫലം വാങ്ങുന്ന മത്സരാര്‍ത്ഥി എന്ന കൗതുകം കൂടിയുണ്ട് അനുമോളുടെ കാര്യത്തില്‍.

മിനിസ്‌ക്രീന്‍ താരമായ ഷാനവാസ് ഷാനു പ്രതിദിനം 35,000 രൂപയാണ് പ്രതിഫലം കൈപ്പറ്റുന്നത്. 100 ദിവസത്തെ അദ്ദേഹത്തിന്റെ മൊത്തം വരുമാനം ഏകദേശം 35 ലക്ഷം രൂപയാണ്. അക്ബര്‍ ഖാനും നെവിനും പ്രതിദിനം ഏകദേശം 5,000 രൂപ വീതമാണ് പ്രതിഫലം നേടുന്നത്. ഈ കണക്കനുസരിച്ച് ഇരുവരുടെയും 100 ദിവസത്തെ വരുമാനം ഏകദേശം 5 ലക്ഷം രൂപ വീതമായിരിക്കും. കോമണര്‍ വിഭാഗത്തില്‍ എത്തിയ അനീഷിന് സെലിബ്രിറ്റികളെപ്പോലെ വലിയ പ്രതിഫലം ലഭിക്കില്ല. അനീഷിന്റെ പ്രതിദിന ശമ്പളം അടിസ്ഥാന നിരക്കായ 3,500 മുതല്‍ 5,000 വരെ ആയിരിക്കാനാണ് സാധ്യത. എങ്കിലും, ഷോയിലൂടെ വലിയ രീതിയില്‍ പോപ്പുലാരിറ്റി നേടാന്‍ അനീഷിന് കഴിഞ്ഞിട്ടുണ്ട്.