സീരിയല്‍ നടി ഡോണ അന്നയെ താലി ചാര്‍ത്തി ടോണി; കന്യാദാനം സീരിയല്‍ നായികയുടെ വിവാഹം ഏറെ നാളത്തെ പ്രണയത്തിനൊടുവില്‍

കന്യാദാനം സീരിയല്‍ നായിക ഡോണാ അന്ന വിവാഹിതയായി. ഇന്ന് രാവിലെ ക്രിസ്ത്യന്‍ ആചാര പ്രകാരം പള്ളിയങ്കണത്തില്‍ വച്ചായിരുന്നു ഡോണയുടെ കഴുത്തില്‍ ടോണി മിന്നുകെട്ടിയത്. പിങ്ക് ഫ്ളോറല്‍ സാരിയില്‍ ടോണിയുടെ കൈകോര്‍ത്തുപിടിച്ച് ദേവാലയത്തിലേക്ക് കയറിയ ഡോണ പ്രാര്‍ത്ഥനാ ചടങ്ങുകള്‍ക്ക് ഒടുവിലാണ് വിവാഹിതയായത്. ടോണി സിജിമോന്‍ എന്ന പയ്യനാണ് ഡോണയെ വിവാഹം കഴിച്ചിരിക്കുന്നത്. 

നിറചിരിയില്‍ പള്ളിയിലേക്ക് എത്തിയ വധുവരന്മാരെ കാത്ത് നൂറുകണക്കിന് ബന്ധുക്കളും സുഹൃത്തുക്കളും പ്രിയപ്പെട്ടവരുമാണ് പള്ളിയങ്കണത്തില്‍ എത്തിയിരുന്നത്. തുടര്‍ന്ന് പ്രാര്‍ത്ഥനാ ചടങ്ങുകള്‍ക്കു ശേഷം അച്ചന്‍ നല്‍കിയ മിന്ന് ഡോണയുടെ കഴുത്തില്‍ കെട്ടുകയായിരു്നു ടോണി. തുടര്‍ന്ന് ഇരുവരും പരസ്പരം വിവാഹമോതിരം അണിയിക്കുകയും ഇരുവരുടേയും നെറ്റിയില്‍ കുരിശുവച്ച് അച്ചന്‍ കൊന്ത സമ്മാനിക്കുകയും ആയിരുന്നു. ചുവന്ന മന്ത്രകോടിയാണ് ടോണി ഡോണയ്ക്ക് സമ്മാനിച്ചത്. തുടര്‍ന്ന് നിലത്ത് മുട്ടുകുത്തിനിന്ന് പ്രാര്‍ത്ഥിച്ച ശേഷം വധുവരന്മാര്‍ക്ക് അപ്പം വായില്‍ വച്ചു കൊടുക്കുകയും ചെയ്തതോടെയാണ് വിവാഹ ചടങ്ങുകള്‍ അവസാനിച്ചത്.

അതേസമയം, ഏറെക്കാലത്തെ പ്രണയത്തിനൊടുവിലാണ് ടോണി സിജിമോന്‍ ഡോണയെ സ്വന്തമാക്കിയിരിക്കുന്നത്. രണ്ടു മാസം മുമ്പായിരുന്നു കന്യാദാനം പരമ്പരയില്‍ നിന്നും ഡോണ പിന്മാറിയത്. പിന്നാലെയാണ് സമയം അടുത്തിരിക്കുന്നു, ഈ നിമിഷം അവന്റേതാണ്, സ്‌നേഹം നമ്മുടേതാണ്, എന്നന്നേയ്ക്കും ഒരുമിച്ച് എന്ന ക്യാപ്ഷനില്‍ പ്രിയപ്പെട്ടവനൊപ്പമുള്ള ചിത്രം പങ്കുവച്ച് ഉടന്‍ നടക്കാന്‍ പോകുന്ന പ്രണയ വിവാഹത്തിന്റെ സൂചനകള്‍ നടി നല്‍കിയത്. വെബ് സീരിസുകളിലൂടെ സുപരിചിത ആയ മുഖമായിരുന്നു സീരിയല്‍ നടി ഡോണ അന്നയുടേത്. കന്യാദാനം എന്ന പരമ്പരയില്‍ എത്തിയതോടെ അവരുടെ അനുവായി മാറിയ ഡോണ പ്രേക്ഷകരുടെ പ്രിയപ്പെട്ട താരങ്ങളുടെ ലിസ്റ്റിലേക്ക് വളരെ വേഗം എത്തുകയായിരുന്നു. ഒന്നര മാസം മുമ്പാണ് കന്യാദാനത്തിലെ അനുപമയായി തിളങ്ങിയ നടി ആ കഥാപാത്രം ഉപേക്ഷിച്ച് പരമ്പരയില്‍ നിന്നും പടിയിറങ്ങിയത്. ഇക്കാര്യം നടി എവിടെയും പറഞ്ഞിരുന്നില്ലെങ്കിലും പുതിയ നടിയെ പ്രഖ്യാപിച്ചുകൊണ്ടുള്ള പോസ്റ്റുകള്‍ സോഷ്യല്‍ മീഡിയയില്‍ പ്രത്യക്ഷപ്പെട്ടതോടെയാണ് ആരാധകരില്‍ ഭൂരിഭാഗവും ഇക്കാര്യം അറിഞ്ഞത്. അന്നയുടെ ഫോട്ടോകള്‍ക്കു താഴെ നിരവധി പേരാണ് നടിയുടെ പിന്മാറ്റത്തെ കുറിച്ചും ചോദിച്ചത്.

എന്തുപറ്റി??? സീരിയല്‍ നിന്ന് മാറിയത്....??? വേറെ ഏതു നടി വന്നാലും പ്രേക്ഷകര്‍ക്ക് അനു നിങ്ങളാണ്.. എന്തു കാര്യമാണെങ്കിലും വിഷമിക്കണ്ടാട്ടോ.. ആരൊക്കെ വന്നാലും അനു നിങ്ങള്‍ തന്നെയാണ് സൂപ്പര്‍..?? എന്നിങ്ങനെയാണ് കമന്റുകള്‍ പ്രത്യക്ഷപ്പെട്ടത്. അതേസമയം, മറ്റു സീരിയലുകളൊന്നും തന്നെ നടി കമ്മിറ്റ് ചെയ്തിട്ടില്ല. ഈ സാഹചര്യത്തില്‍ നടി വിവാഹത്തിന്റെ ഭാഗമായി തന്നെയാണ് പരമ്പരയില്‍ നിന്നും പിന്മാറിയതെന്ന് ഉറപ്പിച്ചിരിക്കുകയാണ്. മാത്രമല്ല, വ്ിവാഹശേഷം ഇനി അഭിനയത്തിലേക്ക് തിരിച്ചു വരില്ലേയെന്ന ആശങ്കയും ആരാധകര്‍ പങ്കുവെക്കുന്നുണ്ട്. സാരിയിലും കുര്‍ത്തയും മാത്രം ധരിക്കാന്‍ ഇഷ്ടപ്പെടുന്ന അന്ന ഗ്ലാമറസ് വേഷങ്ങളിലൊന്നും തന്നെ ഇതുവരെ പ്രത്യക്ഷപ്പെട്ടിട്ടില്ല. അതുകൂടിയാണ് അന്നയെ ആരാധകര്‍ കൂടുതല്‍ ഇഷ്ടപ്പെടാന്‍ കാരണമായതും.

സോഷ്യല്‍ മീഡിയയില്‍ അടക്കം സജീവമായ താരം തിരുവല്ല സ്വദേശിനിയുമാണ്. കോളേജ് പഠന കാലത്താണ് ഡോണയ്ക്ക് അഭിനയത്തിലേക്ക് അവസരം വരുന്നത്. 'മിഴിയോരം' എന്ന മ്യൂസിക്ക് ആല്‍ബമായിരുന്നു തുടക്കം. ശേഷം ചില യൂട്യൂബ് ചാനലുകളില്‍ അവതാരകയായി. പിന്നീട് പ്രണയം ലവ് കാതല്‍, ഇനിയവളെ എന്നീ മ്യൂസിക് വീഡിയോകളുടേയും ഭാഗമായി. കീടാണു എന്ന ഹ്രസ്വ ചിത്രത്തില്‍ അഭിനയിച്ചതോടെ ഏറെ ശ്രദ്ധിക്കപ്പെട്ടു. 'പലപ്പോഴും' എന്ന ഹ്രസ്വ ചിത്രത്തില്‍ അജു വര്‍ഗ്ഗീസിനും കാര്‍ത്തിക് ശങ്കറിനുമൊപ്പം പ്രധാന കഥാപാത്രത്തെ അവതരിപ്പിച്ചു. 'ഏക് സന്തുഷ്ട് കുടുംബ്', കൂള്‍ ഡ്രിങ്ക്സ് എന്നീ വെബ് സീരീസുകളിലും ഡോണ അഭിനയിച്ചിട്ടുണ്ട്. ഇടയ്ക്കിടയ്ക്ക് ഫോട്ടോഷൂട്ട് ചിത്രങ്ങള്‍ പങ്കുവയ്ക്കാറുണ്ട്.

കാര്‍ത്തിക് ശങ്കറിന്റെ ശ്രദ്ധേയമായ വെബ് സീരീസായ മോം ആന്‍ഡ് സണ്ണിലും അന്ന എന്ന കഥപാത്രമായി അടുത്തിടെ ഡോണ അന്ന തിളങ്ങിയിരുന്നു.  കൊവിഡ് കാലത്ത് ഇറങ്ങിയ ഒട്ടനവധി വെബ് സീരിസുകളിലൂടെയാണ് അന്നയുടെ മുഖം സുപരിചിതമായത്. പരമ്പരയുടെ ലൊക്കേഷന്‍ വിശേഷങ്ങളും സഹ താരങ്ങള്‍ക്കൊപ്പമുള്ള റീലുകളുമെല്ലാം ഡോണ പങ്കുവെക്കാറുണ്ട്. ഇവയെല്ലാം തന്നെ ശ്രദ്ധിക്കപ്പെടാറുമുണ്ട്. ഡോണയും അമ്മയും ഒന്നിച്ചുള്ള ഒരു വീഡിയോയും ഇടയ്ക്ക് വൈറലായിരുന്നു. ഇന്‍സ്റ്റയില്‍ സജീവമായ ഡോണയ്ക്ക് പതിനായിരത്തിനടുത്ത് ഫോളോവേഴ്സുണ്ട്. പുത്തന്‍ ഫോട്ടോഷൂട്ട് ചിത്രങ്ങള്‍ പങ്കുവയ്ക്കാറുമുണ്ട്.