ആദ്യം പഹല്‍ഗാം ഭീകരാക്രമണത്തില്‍ നിന്നും; പിന്നെ രക്ഷപ്പെട്ടത് നീലേശ്വരത്തെ വെടിക്കെട്ട് അപകടത്തില്‍ നിന്ന്; ഇപ്പോള്‍ കാസര്‍കോട് മണ്ണിടിച്ചില്‍ നിന്നും; രക്ഷപ്പെട്ടത് മുന്ന് ദുരന്തത്തില്‍ നിന്ന്; സിന്ധുവിന്റെ അത്ഭുത രക്ഷപ്പെടലിന്റെ കഥ

വളരെ കുറച്ച് ആളുകള്‍ മാത്രമാണ് വലിയ ദുരന്തങ്ങളില്‍ നിന്ന് അപ്രതീക്ഷിതമായി രക്ഷപെടുന്നത്. പലപ്പോഴും എല്ലാം പെട്ടെന്ന് സംഭവിക്കുമ്പോള്‍ അവരുടെ ജീവന്‍ അത്ഭുതകരമായി രക്ഷിക്കപ്പെടുന്നു. ഇങ്ങനെ രക്ഷപ്പെടുന്നത് പലപ്പോഴും ആ സമയത്തെ ഭാഗ്യമായിരിക്കും. ചിലര്‍ക്ക് ഒരു തവണ ഭാഗ്യം കൈപിടിച്ചു രക്ഷപ്പെടാം, പക്ഷേ അതിനു പിന്നില്‍ അവരുടെ ജാഗ്രതയും ഭാഗ്യവും ഉണ്ട് എന്ന് അവര്‍ വിശ്വസിക്കും. ആ ഭാഗ്യം വീണ്ടും വരുമോ എന്നത് ഉറപ്പില്ലെങ്കിലും, ഒരിക്കല്‍ സംഭവിച്ച അത്ഭുത രക്ഷയെ ജീവിതത്തിലെ വലിയ അനുഭവമായി അവര്‍ കണക്കാക്കും. ഇത്തരം അനുഭവങ്ങള്‍ ജീവിതത്തെക്കുറിച്ചുള്ള അവരുടെ നിലപാട് പോലും മാറ്റിയേക്കാം. ഇപ്പോഴിതാ അത്തരത്തില്‍ ഒന്നല്ല മൂന്ന് വട്ടം ദുരന്തത്തില്‍ നിന്ന് രക്ഷപ്പെട്ടിരിക്കുകയാണ് സിന്ധു. 

കാഞ്ഞങ്ങാട് കാരാട്ടുവയലില്‍ താമസിക്കുന്ന സിന്ധു ഹരീഷ് പടന്നക്കാട് എസ്എന്‍ടിടിഐയിലെ ടീച്ചര്‍ എജ്യുക്കേറ്ററാണ്. കഴിഞ്ഞ ഒരു വര്‍ഷം സിന്ധുവിന് ജീവിതത്തിലെ ഏറ്റവും ബുദ്ധിമുട്ടുള്ള കാലഘട്ടങ്ങളിലൊന്നായിരുന്നു. നിരവധി പരീക്ഷണങ്ങളും വെല്ലുവിളികളും അനുഭവിച്ച ഈ സമയത്ത്, ഏറ്റവും ഒടുവില്‍ വന്നത് വലിയൊരു അപകടം തന്നെ ആയിരുന്നു. കഴിഞ്ഞ ദിവസം സിന്ധു കാറിലായി യാത്ര ചെയ്യുകയായിരുന്നു. അപ്പോഴായിരുന്നു വീരമലക്കുന്നിലെ മണ്ണിടിച്ചില്‍. അപ്രതീക്ഷിതമായി കുത്തിയൊലിച്ചുവന്ന മണ്ണ് സിന്ധുവിന്റെ കാറിനെ തള്ളിക്കൊണ്ടുപോയത് ഏകദേശം നാല് മീറ്ററോളം ദൂരം. എങ്കിലും ആ ക്ഷണിക സമയത്ത് പോലും മനസ്സാന്തം കൈവിടാതെ, കൂടുതല്‍ അപകടം ഒഴിവാക്കാന്‍ വേണ്ടി കാര്‍ വളരെ ബുദ്ധിപൂര്‍വം നിയന്ത്രിച്ച് നിര്‍ത്താന്‍ സിന്ധുവിനു കഴിഞ്ഞു. അതിനാലാണ് അന്നു ഒരു വലിയ ദുരന്തം ഒഴിവായത്.

ഈ അപകടം സിന്ധു അതിജീവിച്ച വലിയ ദുരന്തമായിരുന്നു. അതിന്റെ മുമ്പും ഇത്തരത്തില്‍ രണ്ട് വലിയ അപകടങ്ങള്‍ സിന്ധു നേരിട്ടിരുന്നു. അതിനെയും അതിജീവിക്കുകയും, വീണ്ടും പെട്ടെന്നുള്ള ഈ ദുരന്തത്തില്‍ നിന്നും രക്ഷപ്പെടുകയും ചെയ്തതാണ് സിന്ധുവിന്റെ ആത്മവിശ്വാസത്തിന്റെ തെളിവ്. ഏറെ കഠിനമായ ഒരു വര്‍ഷത്തിന് ശേഷം, ഇതെല്ലാം ദൈവദയയാലും തന്റെ ധൈര്യത്താലും തരണം ചെയ്തതിലാണു സിന്ധു ആ ദുരനന്തത്തില്‍ നിന്ന് രക്ഷപ്പെട്ടത്. ഇക്കഴിഞ്ഞ ഏപ്രില്‍ 21ന് പഹല്‍ഗാമില്‍ ഭീകരാക്രമണം നടന്നത് എല്ലാവരെയും ഞെട്ടിച്ച സംഭവമായിരുന്നു. അതിന്റെ മുന്‍ ദിവസം വരെ സിന്ധുവും അവരുടെ വിനോദയാത്രാ സംഘവും പഹല്‍ഗാമില്‍ സഞ്ചരിച്ചിരുന്നു. ഭര്‍ത്താവ് കാഞ്ഞങ്ങാട് സപ്ന എന്റര്‍പ്രൈസസിന്റെ ഉടമയായ വി.വി. ഹരീഷും മകള്‍ മീനാക്ഷിയും ആ യാത്രയില്‍ സിന്ധുവിനൊപ്പം ഉണ്ടായിരുന്നു. പ്രകൃതിയുടെ സൗന്ദര്യം നിറഞ്ഞ പഹല്‍ഗാമിലെ താഴ്വാരങ്ങളും പര്‍വ്വതങ്ങളുമൊക്കെ സന്തോഷത്തോടെയും ആഹ്ലാദത്തോടെയും അവര്‍ അനുഭവിച്ചിരിക്കുന്നു.

യാത്ര പൂര്‍ത്തിയാക്കി നാട്ടിലേക്ക് തിരിച്ചെത്തിയപ്പോള്‍, പഹല്‍ഗാമില്‍ ഭീകരാക്രമണം നടന്നതായി വാര്‍ത്ത കേട്ടപ്പോഴാണ് അതിന്റെ ഗുരുതരം മനസ്സിലായത്. അവര്‍ പോയ സ്ഥലത്ത്, ചില മണിക്കൂറുകള്‍ക്കകം തന്നെ വലിയ ദുരന്തമുണ്ടായത് അവരെ ഞെട്ടിച്ചു. കുറച്ച് നേരം വൈകിയിരുന്നെങ്കില്‍ അപകടം അവരുടെ തലയിലും വന്നേനെ എന്ന ആലോചന സിന്ധുവിനെയും കുടുംബത്തെയും ഭയഭക്തിയിലാക്കി. അത്രയും അതികഠിനമായ ഒരു സംഭവത്തില്‍ നിന്ന് ഭാഗ്യവശാല്‍ രക്ഷപ്പെട്ടതിന്റെ തീരാനന്ദവുമാണ് അവരുടെ മനസ്സില്‍ നിലനില്‍ക്കുന്നത്.

കഴിഞ്ഞ ഒക്ടോബര്‍ 28ന് അര്‍ധരാത്രി നീലേശ്വരം അഞ്ഞൂറ്റമ്പലം വീരര്‍കാവില്‍ ഉണ്ടായ വെടിക്കെട്ടപകടത്തില്‍നിന്ന് സിന്ധുവും കുടുംബവും കഷ്ടിച്ചാണ് രക്ഷപ്പെട്ടത്. 6 പേര്‍ മരിച്ച വെടിക്കെട്ടപകടം നടന്ന ഷെഡിനോട് ചേര്‍ന്നു നിന്നിരുന്ന സിന്ധു മൂവാളംകുഴി ചാമുണ്ഡിയുടെ തോറ്റം നടക്കുന്നതിനിടെയാണ് ഭര്‍ത്താവ് ഹരീഷിന് ഫോണ്‍ വന്നതിനാല്‍ അവിടെനിന്നു മാറിയത്. തിരിച്ച് ഷെഡിനടുത്തേക്കു തന്നെ പോവാന്‍ ശ്രമിച്ചെങ്കിലും തിരക്കു കാരണം പറ്റിയില്ല. ഷെഡിനടുത്തേക്ക് പോയിരുന്നെങ്കില്‍ സ്ഥിതി മറ്റൊന്നാകുമായിരുന്നു എന്ന് നെടുവീര്‍പ്പോടെ സിന്ധു ഓര്‍ക്കുന്നു. ദുരന്തത്തില്‍നിന്നു രക്ഷപ്പെട്ടതിന്റെ ആശ്വാസത്തോടൊപ്പം ഭീതിയുടെ നിഴലിലുള്ള ഓര്‍മകളും മുറിഞ്ഞുപോകുന്ന സിന്ധുവിന്റെ വാക്കുകളില്‍ പ്രതിഫലിക്കുന്നുണ്ട്. വീരമലക്കുന്നില്‍ കാറില്‍ ഒറ്റപ്പെട്ടുപോയ സിന്ധുവിനെ രക്ഷപ്പെടുത്തിയ തൊട്ടടുത്ത ഹോട്ടല്‍ ജീവനക്കാരായ രൂപേഷ്, അരവിന്ദ് എന്നിവരെ സിന്ധുവും ഭര്‍ത്താവ് ഹരീഷും നേരില്‍കണ്ടു നന്ദിയും പറഞ്ഞിരുന്നു.