'തുടര്‍ച്ചയായി അമ്മ വേഷങ്ങള്‍ വന്നു, രാം ചരണിന്റെ ബിഗ് ബജറ്റ് സിനിമയിലേക്കുള്ള ഓഫര്‍ നിരസിച്ചു'; വിവാഹം കഴിച്ചതു തന്നെ സിന്ദൂരമിടാന്‍; എത്ര ട്രോളിയാലും ഞാനിതൊക്കെ ചെയ്യും; വെളിപ്പെടുത്തലുമായി സ്വാസിക

മിനി സ്‌ക്രീനിലും ബിഗ് സ്‌ക്രീനിലും ഒരുപോലെ കഴിവ് തെളിയിച്ച നടിയാണ് സ്വാസിക വിജയ്. സഹതാരമായി അഭിനയിച്ച പ്രേം ജേക്കബിനെയാണ് സ്വാസിക വിവാഹം ചെയ്തത്. ഒരു മോഡല്‍ കൂടിയാണ് പ്രേം. ഭര്‍ത്താവിന് ഭക്ഷണം ഉണ്ടാക്കിക്കൊടുക്കുന്നതും കാലില്‍ വീണ് അനുഗ്രഹം വാങ്ങുന്നതുമൊക്കെ തനിക്ക് ഇഷ്ടമുള്ള കാര്യങ്ങളാണെന്ന് വിവാഹത്തിനു മുന്‍പേ തന്നെ സ്വാസിക പറഞ്ഞിരുന്നു. 

ഇതേത്തുടര്‍ന്ന് താരം നിരവധി വിമര്‍ശനങ്ങളും ട്രോളുകളും നേരിട്ടിരുന്നു. ഇപ്പോളിതാ ആരൊക്കെ ട്രോളിയാലും വിമര്‍ശിച്ചാലും ഇത്തരം നിലപാടുകളില്‍ ഉറച്ചു നില്‍ക്കുമെന്നും അതെല്ലാം തന്റെ ഇഷ്ടങ്ങളാണെന്നും തുറന്നു പറയുകയാണ് താരം. വാസന്തി എന്ന പുതിയ സിനിമയുടെ പ്രമോഷന്റെ ഭാഗമായി മാധ്യമങ്ങളോട് സംസാരിക്കുകയായിരുന്നു സ്വാസിക.

നമുക്ക് ചെറുപ്പത്തിലേ ചില ഇഷ്ടങ്ങള്‍ മനസില്‍ കയറിക്കൂടില്ലേ? അതെങ്ങനെ നമ്മുടെ ഉള്ളില്‍ കയറിക്കൂടുന്നു എന്ന് നമ്മള്‍ പോലും അറിയില്ല. അത്തരത്തിലൊന്നാണ് ഇതും. ടീനേജ് പ്രായം മുതലേ ഇതൊക്കെ ഞാന്‍ ആഗ്രഹിക്കുന്നതാണ്. സിന്ദൂരം ധരിക്കാനാണ് ഞാന്‍ വിവാഹം കഴിച്ചതു തന്നെ. ആളുകള്‍ എപ്പോഴും എന്നെ കളിയാക്കുന്നതും ഇതിന്റെയൊക്കെ പേരില്‍ ആണല്ലോ. എന്നെ ഒരു കുലസ്ത്രീ എന്നാണല്ലോ കളിയാക്കുന്നത്. പക്ഷേ എനിക്ക് ആ വാക്ക് ഇഷ്ടമാണ്. കുലസ്ത്രീ ആകാന്‍ ഞാന്‍ ആഗ്രഹിക്കുന്നു.

ഇപ്പോള്‍ ഞാന്‍ കുറച്ച് സിന്ദൂരമേ ഇട്ടിട്ടുള്ളൂ. പക്ഷേ എനിക്ക് കുറച്ചുകൂടി നീളത്തില്‍ സിന്ദൂരം ധരിക്കാന്‍ ഇഷ്ടമാണ്. അത് അങ്ങനെ ധരിക്കണമെന്ന് ആണ് ഐതീഹ്യം എന്നാണ് ഞാന്‍ മനസിലാക്കിയത്. താലി ധരിക്കാനും എനിക്കിഷ്ടമാണ്. ഇതൊക്കെ എന്റെ ഇഷ്ടങ്ങള്‍ ആണ്.

എന്നെ ട്രോളുന്നതിന്റെ പേരില്‍ ഈ ഇഷ്ടങ്ങളൊക്കെ ഞാന്‍ മാറ്റിവെയ്ക്കുകയേ ഇല്ല. നിങ്ങള്‍ക്ക് നിങ്ങളുടെ ഇഷ്ടത്തിന് എന്നെ ട്രോളുകയോ വിമര്‍ശിക്കുകയോ ഒക്കെ ചെയ്യാം, പക്ഷേ സിന്ദൂരം ഇടുക, താലിയിടുക എന്നൊക്കെ പറയുന്നത് എന്റെ വ്യക്തിപരമായ ഇഷ്ടങ്ങളാണ്'', സ്വാസിക പറഞ്ഞു.

തെലുങ്ക് സൂപ്പര്‍താരം രാം ചരണിന്റെ അമ്മയായി അഭിനയിക്കാനുള്ള ക്ഷണം നിരസിച്ചതായിയുമ നടി പങ്ക് വച്ചു. ബുചി ബാബു സന സംവിധാനം ചെയ്യുന്ന 'പെഡ്ഡി' എന്ന ബ്രഹ്മാണ്ഡ ചിത്രത്തിലേക്കുള്ള ഓഫറാണ് താരം വേണ്ടെന്നുവെച്ചത്. കരിയറിന്റെ ഈ ഘട്ടത്തില്‍ അത്തരമൊരു വേഷം ചെയ്യേണ്ട ആവശ്യമില്ലെന്ന് തോന്നിയതുകൊണ്ടാണ് തീരുമാനമെന്നും സ്വാസിക വ്യക്തമാക്കി. 

അടുത്തിടെ തനിക്ക് തുടര്‍ച്ചയായി അമ്മ വേഷങ്ങള്‍ ലഭിക്കുന്നുണ്ടെന്നും അതില്‍ ഏറ്റവും ഞെട്ടിച്ചത് ഈ ഓഫറാണെന്നും സ്വാസിക പറഞ്ഞു. 'തുടര്‍ച്ചയായി എനിക്ക് അമ്മ വേഷങ്ങള്‍ വരുന്നുണ്ട്. അതില്‍ ഞെട്ടിപ്പോയത് രാം ചരണിന്റെ അമ്മയായിട്ടാണ്. വലിയ ബജറ്റിലൊരുങ്ങുന്ന സിനിമയാണ്. ഞാന്‍ നോ പറഞ്ഞു. ഇപ്പോള്‍ എനിക്ക് രാം ചരണിന്റെ അമ്മയാകേണ്ട ആവശ്യമില്ല,' സ്വാസികയുടെ വാക്കുകള്‍. അടുത്തിടെ തമിഴില്‍ പുറത്തിറങ്ങിയ 'ലബ്ബര്‍ പന്ത്' എന്ന ചിത്രത്തില്‍ മുതിര്‍ന്ന പെണ്‍കുട്ടിയുടെ അമ്മയായി സ്വാസിക അഭിനയിച്ചിരുന്നു. ഈ ചിത്രത്തിലെ പ്രകടനത്തിന് മികച്ച അഭിപ്രായം ലഭിച്ചിരുന്നു. ഇതിന് പിന്നാലെയാണ് സമാനമായ നിരവധി വേഷങ്ങള്‍ താരത്തെ തേടിയെത്തുന്നത്.