പുതിയ ചിത്രത്തിന്റെ ഭാഗമായി കോഴിക്കോട് വന്നപ്പോൾ എനിക്ക് ഉണ്ടായത് മരവിപ്പിക്കുന്ന ഒരനുഭവമാണ്; ഇത്രയ്ക്ക് ഫ്രസ്ട്രേറ്റഡ് ആയിട്ടുള്ളരാണോ നമ്മുടെ ചുറ്റുമുള്ളവർ; ലൈംഗിക അതിക്രമത്തിന് ഇരയായെന്ന് യുവനടി

കുമ്പളങ്ങി നൈറ്റ്‌സ് എന്ന സിനിമയിലൂടെ ശ്രദ്ധേയമായ നടിയാണ് ഗ്രേസ് ആന്റണി. മധു സി നാരായണന്‍ സംവിധാനം ചെയ്ത  നിർവഹിച്ച സിനിമയിൽ ഫഹദ് ഫാസിലിന്റെ ഭാര്യയുടെ വേഷത്തിലാണ്  ഗ്രേസ്  തിളങ്ങിയിരുന്നത്. ഗ്രേസ് ആന്റണിയുടെ കരിയറില്‍   കുമ്പളങ്ങിയിലെ സിമിയെന്ന കഥാപാത്രം  വലിയ വഴിത്തിരിവായി മാറുകയും ചെയ്‌തു. പിന്നാലെ നിരവധി സിനിമകളിൽ ശ്രദ്ധേയമായ വേഷങ്ങളിലൂടെ തിരക്കുള്ള നായികയായി മാറുകയും ചെയ്‌തു. എന്നാൽ ഇപ്പോൾ കോഴിക്കോട്ടെ പ്രമുഖ മാളിൽവച്ച്  താരത്തിന്  നേരേ ലൈംഗികാതിക്രമം ഉണ്ടായ വിവരം വെളിപ്പെടുത്തിയിരിക്കുകയാണ്.

നടിയുടെ പോസ്റ്റിൽനിന്ന്:

ഇന്ന് എന്റെ പുതിയ ചിത്രത്തിന്റെ ഭാഗമായി കോഴിക്കോട് വന്നപ്പോൾ എനിക്ക് ഉണ്ടായത് മരവിപ്പിക്കുന്ന ഒരനുഭവമാണ്. ഞാൻ ഒത്തിരി ഇഷ്ടപ്പെടുന്ന ഒരു സ്ഥലമാണ് കോഴിക്കോട്. പക്ഷേ പ്രോഗ്രാം കഴിഞ്ഞു പോകുന്നതിനിടയിൽ ആൾക്കൂട്ടത്തിൽ അവിടെ നിന്ന ഒരാൾ എന്ന കയറിപ്പിടിച്ചു.

എവിടെ എന്ന് പറയാൻ എനിക്ക് അറപ്പ് തോന്നുന്നു. ഇത്രയ്ക്ക് ഫ്രസ്ട്രേറ്റഡ് ആയിട്ടുള്ളരാണോ നമ്മുടെ ചുറ്റുമുള്ളവർ. പ്രമോഷന്റെ ഭാഗമായി ഞങ്ങൾ ടീം മുഴുവൻ പലയിടങ്ങളിൽ പോയി. അവിടെയൊന്നുമുണ്ടാകാത്ത ഒരു വൃത്തികെട്ട അനുഭവമായിരുന്നു ഇന്നുണ്ടായത്.

എന്റെ കൂടെയുണ്ടായ മറ്റൊരു സഹപ്രവർത്തകയ്ക്കും ഇതേ അനുഭവമുണ്ടായി. അവർ അതിനു പ്രതികരിച്ചു. പക്ഷേ എനിക്ക് അതിന് ഒട്ടും പറ്റാത്ത ഒരു സാഹചര്യമായിപ്പോയി. ഒരുനിമിഷം ഞാൻ മരവിച്ചുപോയി. ആ മരവിപ്പിൽ നിന്നുകൊണ്ട് ചോദിക്കുകയാണ് തീർന്നോ നിന്റെ ഒക്കെ അസുഖം.