'പിസാസ് 2' എന്ന ചിത്രത്തില്‍ ഇറോട്ടിക് രംഗങ്ങളുണ്ടായിരുന്നുവെന്ന് നടി ആന്‍ഡ്രിയ ജെര്‍മിയ. തിരക്കഥയില്‍ ഉള്‍പ്പെടുത്തിയിരുന്ന ഒരു നഗ്‌നരംഗം, നിര്‍മ്മാതാവിന് ഉണ്ടാകാനിടയുള്ള ബുദ്ധിമുട്ടുകള്‍ പരിഗണിച്ച് സംവിധായകന്‍ മിഷ്‌കിന്‍ ഒഴിവാക്കുകയായിരുന്നുവെന്നും ആന്‍ഡ്രിയ വെളിപ്പെടുത്തി. തന്റെ പുതിയ ചിത്രമായ 'മാസ്‌ക്'-ന്റെ പ്രചാരണ പരിപാടിക്കിടെ മാധ്യമങ്ങളോട് സംസാരിക്കുകയായിരുന്നു താരം. മിഷ്‌കിനെപ്പോലുള്ള ഒരു സംവിധായകന്‍ സിനിമയിലേക്ക് വിളിക്കുമ്പോള്‍ കഥ പോലും നോക്കാതെയാണ് താന്‍ അവസരം സ്വീകരിക്കുന്നതെന്ന് ആന്‍ഡ്രിയ പറഞ്ഞു.
'കഥയ്ക്ക് അനിവാര്യമായ രംഗമായതുകൊണ്ടാണ് അത്തരം ഒരു രംഗത്തിന് സമ്മതിച്ചത്. എന്നാല്‍ ഷൂട്ടിംഗ് സമയത്ത്, ഈ രംഗം ചിത്രീകരിച്ചാല്‍ നിര്‍മ്മാതാവിന് പ്രശ്‌നങ്ങളുണ്ടാകുമെന്ന് സംവിധായകന്‍ അറിയിക്കുകയും അത് ഒഴിവാക്കാന്‍ തീരുമാനിക്കുകയുമായിരുന്നു. നമ്മുടെ സ്‌കര്‍ട്ട് കുറച്ചു താഴ്ത്തിയാല്‍ സിനിമക്ക് കൂടുതല്‍ മൈലേജുണ്ടെന്ന് വിചാരിക്കുന്ന ചിലയാളുകളെ എനിക്കറിയാം. ഈ പടത്തില്‍ വേറെയും ഇറോട്ടിക് രംഗങ്ങളുണ്ട്. പക്ഷേ, ആദ്യം കേട്ടതുപോലെ ന്യൂഡിറ്റിയില്ല,' ആന്‍ഡ്രിയ കൂട്ടിച്ചേര്‍ത്തു.
2021-ലാണ് ആന്‍ഡ്രിയയെ കേന്ദ്ര കഥാപാത്രമാക്കി മിഷ്‌കിന്‍ 'പിസാസ് 2' പ്രഖ്യാപിച്ചത്. കോവിഡ് ഉള്‍പ്പെടെയുള്ള കാരണങ്ങളാല്‍ ചിത്രീകരണം നീണ്ടുപോവുകയായിരുന്നു. മൂന്ന് വര്‍ഷം മുന്‍പ് ചിത്രത്തിന്റെ ടീസര്‍ പുറത്തിറങ്ങിയിരുന്നു. ആന്‍ഡ്രിയയെ കൂടാതെ വിജയ് സേതുപതി, പൂര്‍ണ, സന്തോഷ് പ്രതാപ് എന്നിവരും ചിത്രത്തില്‍ പ്രധാന വേഷങ്ങളിലെത്തുന്നുണ്ട്.
Premium Lifestyle and Entertainment website
സുബോധ് ഖാനോല്‍ക്കര്‍-ദിലീപ് പ്രഭാവല്‍ക്കര്‍ ചിത്രം 'ദശാവതാരം'; 'രംഗപൂജ' ഗാനം പുറത്ത്; ചിത്രം ഡിസംബര്‍ 12 ന്