ആ ബന്ധം തകര്‍ന്നതോടെ എന്നെക്കുറിച്ചും ജീവിതത്തെക്കുറിച്ചും ഗൗരവമായി ചിന്തിച്ചു; രാത്രികാലങ്ങളില്‍ മുറിയില്‍ പ്രേതരൂപങ്ങളെ കണ്ട് പേടിച്ചിട്ടുണ്ട് ഞാന്‍; രണ്‍ബീറുമായിട്ടുള്ള പ്രണയതകര്‍ച്ച വെളിപ്പെടുത്തി കത്രീനാ കൈഫ് 

ബോളിവുഡില്‍ ഏറെ ശ്രദ്ധനേടിയ പ്രണയമായിരുന്നു രണ്‍ബീര്‍ കപൂറിന്റേയും നടി കത്രീന കൈഫിന്റേയും. പിന്നീട് ഈ സുന്ദര പ്രണയം തകരുകയും ചെയ്തു. ആലിയ ഭട്ടുമായി പ്രണയത്തിലാകുന്നതിന് മുന്‍പ് രണ്‍ബീറും കത്രീനും കടുത്ത പ്രണയത്തിലായിരുന്നു. ഇരുവരും പലപ്പോഴും പരസ്യമായി പ്രണയം തുറന്നുപറഞ്ഞിട്ടുമുണ്ട്. താരങ്ങളുടെ വേര്‍പിരിയലിനെ ആരാധകര്‍ ഞെട്ടലോടെയാണ് സ്വീകരിച്ചത്. പ്രണയത്തകര്‍ച്ചയെ നേരിട്ടതിനെക്കുറിച്ച് കത്രീന പറയുന്നതിങ്ങനെ: 

''വ്യക്തിപരമായി ഒരുപാട് മാറ്റങ്ങളുണ്ടായി. കരിയറും മാറി മറിഞ്ഞു. ആ ബന്ധം തകര്‍ന്നതോടെ എന്നെക്കുറിച്ചും ജീവിതത്തെക്കുറിച്ചും ഗൗരവമായി ചിന്തിച്ചു. സംഭവിക്കാനുള്ളത് സംഭവിച്ചു. എന്ത് സംഭവിച്ചാലും അതിനെല്ലാം ഒരു കാരണമുണ്ട്. തായ്ലാന്‍ഡില്‍ ബാര്‍ ബാര്‍ ദേഖോ എന്ന ചിത്രത്തിന്റെ ഷൂട്ടിങ് നടക്കുകയാണ്. ആവശ്യമില്ലാത്ത എന്തൊക്കെയോ കാര്യങ്ങളെക്കുറിച്ച് മനസ്സില്‍ ചിന്തകള്‍ വരുന്നുണ്ട്. ആ ചിന്തകള്‍ എന്നെ അസ്വസ്ഥയാക്കിക്കൊണ്ടേയിരുന്നു. അതെന്നെ ഇത്രമാത്രം ബുദ്ധിമുട്ടിക്കുമെന്ന് ഞാന്‍ ചിന്തിച്ചിരുന്നതേ ഇല്ല. നമ്മള്‍ മനുഷ്യര്‍ എങ്ങനെയാണെന്ന് ഞാന്‍ മനസ്സിലാക്കി. ലോകത്തോടുള്ള എന്റെ കാഴ്ചപ്പാടും സമീപനവും ഇങ്ങനെയാണ് മാറിയത്.

''എല്ലാത്തിനെയും നേരിട്ടു. രാത്രികാലങ്ങളില്‍ മുറിയില്‍ പ്രേതരൂപങ്ങളെ കണ്ട് പേടിച്ചിട്ടുണ്ട് ഞാന്‍. അതങ്ങനെ മാഞ്ഞുപോകും വരെ ആ രൂപത്തെ തുറിച്ചുനോക്കിയിരുന്നിട്ടുണ്ട്. ഇന്ന് സങ്കടമോ സന്തോഷമോ എന്തുതന്നെ ആയാലും അത് സംഭവിക്കാന്‍ ഞാന്‍ അനുവദിക്കും. അതെന്നെ വേദനിപ്പിച്ചാലും അസ്വസ്ഥയാക്കിയാലും കുഴപ്പമില്ല. 

''ഒരിക്കല്‍ യോഗ ചെയ്തുകൊണ്ടിരുന്നപ്പോള്‍ എന്റെ ഗുരു ചോദിച്ചു, നിങ്ങള്‍ ഓകെ ആണോ എന്ന്. ഞാന്‍ പറഞ്ഞു, കുഴപ്പമൊന്നുമില്ലെന്ന്. 'പക്ഷേ നിങ്ങള്‍ കരയുകയാണല്ലോ' എന്നവര്‍ പറഞ്ഞു. ഇത് കേട്ടതോടെ ഞാന്‍ പൊട്ടിക്കരയാന്‍ തുടങ്ങി. ആ സമയത്ത് അത് അനിവാര്യമായിരുന്നു. ഇപ്പോള്‍ ഒന്നിനെയും ഒഴിവാക്കാന്‍ ആഗ്രഹിക്കാറില്ല. അങ്ങനെയാണ് ജീവിത സാഹചര്യങ്ങളെ സമീപിക്കാറ്''-കത്രീന പറഞ്ഞു. ഇതാദ്യമായാണ് പ്രണയത്തകര്‍ച്ചയെക്കുറിച്ച് കത്രീന തുറന്നുസംസാരിക്കുന്നത്.