എനിക്കറിയാവുന്നതില്‍ ഏറ്റവും സ്മാര്‍ട്ടും മിടുക്കിയും അനുകമ്പയും ദയയും അന്വേഷാണാത്മകവുമായ പെണ്‍കുട്ടികളിലൊരാളാണ് നീ; കുറിപ്പ് പങ്കുവച്ച് സുപ്രിയ മേനോൻ

പൃഥ്വിരാജിന്റെയും സുപ്രിയയുടെയും മകളായ അലംകൃതയുടെ പിറന്നാള്‍ ആയിരുന്നു കഴിഞ്ഞ ദിവസം. അലംകൃത എന്ന പേരിനേക്കാള്‍ ആലി എന്ന പേരാണ് പ്രേക്ഷകര്‍ക്ക് ഏറെ പരിചിതം. മകളുടെ വിശേഷങ്ങളെല്ലാം പൃഥ്വിയും സുപ്രിയയും സോഷ്യല്‍മീഡിയയിലൂടെ പലപ്പോഴും പങ്കുവെക്കാറുണ്ട്. ക്ഷണനേരം കൊണ്ടാണ് ആലിയെന്ന അല്ലിയെക്കുറിച്ചുള്ള പോസ്റ്റുകള്‍ വൈറലായി മാറാറുള്ളത്. പതിവ് പോലെ തന്നെ ഇത്തവണത്തെ പിറന്നാളിലും ഇരുവരും മകളുടെ മുഖം കാണിച്ചുള്ള ചിത്രങ്ങള്‍ പങ്കുവെച്ചിരുന്നു. ഇതിനകം തന്നെ ഇവരുടെ പോസ്റ്റ് വൈറലായി മാറിയിരുന്നു.

അല്ലിക്ക് 8 വയസായി, എനിക്കറിയാവുന്നതില്‍ ഏറ്റവും സ്മാര്‍ട്ടും മിടുക്കിയും അനുകമ്പയും ദയയും അന്വേഷാണാത്മകവുമായ പെണ്‍കുട്ടികളിലൊരാളാണ് നീ. നിന്നെയോര്‍ത്ത് എനിക്കെപ്പോഴും അഭിമാനമാണ്. ഞാന്‍ നിന്നെ സ്നേഹിക്കുന്നു. നമുക്കേറെ പ്രിയപ്പെട്ട ഡാഡി ഇല്ലാത്ത ആദ്യത്തെ ജന്മദിനമാണിത്. അദ്ദേഹം എല്ലാദിവസവും സ്വര്‍ഗത്തില്‍ നിന്നും വീക്ഷിക്കുകയും അദ്ദേഹത്തിന്റെ അനുഗ്രഹാശിസുകള്‍ വര്‍ഷിക്കുകയും ചെയ്യുമെന്നുറപ്പുണ്ട്. ആലിക്ക് പിറന്നാളാശംസ നേര്‍ന്നതിനൊപ്പം ഓണാശംസയും നേര്‍ന്നിരുന്നു സുപ്രിയ.

ഡാഡയുടെ ജീവിതത്തിലെ ഏറ്റവും വലിയ ബ്ലോക്ക് ബസ്റ്ററായ ആലിക്ക് 8 വയസ്. ഡാഡയുടേയും മമ്മയുടേയും ജീവിതത്തിലെ എക്കാലത്തേയും വെളിച്ചമാണ് നീ. നിന്നിലെ സാഹസികതയും ലോകത്തോടുള്ള നിന്റെ സ്നേഹവും എന്നും നിന്നിലുമുണ്ടാവണമെന്ന് ഞങ്ങളാഗ്രഹിക്കുന്നു, അതിനായി പ്രാര്‍ത്ഥിക്കുന്നു. നിന്നെക്കുറിച്ചോര്‍ത്ത് എന്നും ഞങ്ങള്‍ക്ക് അഭിമാനമാണെന്നുമായിരുന്നു പൃഥ്വിരാജ് കുറിച്ചത്.

താരങ്ങളും ആരാധകരുമുള്‍പ്പടെ നിരവധി പേരാണ് അലംകൃതയ്ക്ക് ആശംസ അറിയിച്ചിട്ടുള്ളത്. ക്ഷണനേരം കൊണ്ടായിരുന്നു പോസ്റ്റ് വൈറലായി മാറിയത്. മകളുടെ സ്വകാര്യതയ്ക്ക് പ്രധാന്യം നല്‍കുന്നതിനാല്‍ മുഖം കാണുന്ന തരത്തിലുള്ള ചിത്രങ്ങള്‍ പോസ്റ്റ് ചെയ്യാറില്ല പൃഥ്വിരാജും സുപ്രിയയും. മകളുടെ എഴുത്തിനെക്കുറിച്ചും അത് പുസ്തകമാക്കി മാറ്റിയതിനെക്കുറിച്ചുമെല്ലാം സുപ്രിയ തുറന്നുപറഞ്ഞിരുന്നു.

എപ്പോഴും ആക്റ്റീവായിരിക്കുന്നയാളാണ് അല്ലി. അതിരാവിലെ എഴുന്നേറ്റ് സ്‌കൂളിലേക്ക് പോയി തിരിച്ചുവന്ന് ഹോംവര്‍ക്ക് ചെയ്ത് കളിക്കാന്‍ പോവുന്നയാളാണ് അവള്‍. അതുകഴിഞ്ഞ് വന്നാലും തന്നോട് കളിക്കാന്‍ കൂടാമോ എന്ന് ചോദിക്കാറുണ്ടെന്നും അവളുടെ എനര്‍ജി ലെവലും സംശയങ്ങള്‍ ചോദിക്കുന്ന സ്വഭാവവും തന്നെ സ്വാധീനിച്ചിട്ടുണ്ടെന്നായിരുന്നു പൃഥ്വിരാജ് പറഞ്ഞത്.

ചതയമാണ് അലംകൃതയുടെ നക്ഷത്രം. അലംകൃത എന്ന പേര് സുപ്രിയയാണ് പറയുന്നത്. അലംകൃത എന്നാല്‍ അലങ്കരിക്കപ്പെട്ടവള്‍ എന്നാണര്‍ഥം. സെന്‍സ് എന്നൊരു അര്‍ഥം കൂടിയുണ്ട്. പൃഥ്വിയുടെയും സുപ്രിയയുടെയും ജീവിതം മുഴുവന്‍ അലംകൃതയെ കേന്ദ്രീകരിച്ചാണ്. പൃഥിയുടെ ആഗ്രഹം പോലെയൊരു മകള്‍. അലംകൃതയ്ക്ക് രാജുവിന്റെ ദേഷ്യമുണ്ടെന്ന് സുപ്രിയ പലപ്പോഴും പറഞ്ഞിട്ടുണ്ട്. ഒരു സാധാരണബാല്യത്തിലൂടെ അലംകൃതയും കടന്നുപോകണമെന്നാണ് പൃഥ്വിയുടെ ആഗ്രഹം. അവള്‍ക്ക് കിട്ടുന്ന ഈ സൗകര്യങ്ങളെല്ലാം ലോകത്ത് വളരെ കുറച്ചുപേര്‍ക്ക് മാത്രം കിട്ടുന്നതാണ് എന്ന ധാരണ അവള്‍ക്കുണ്ടാകണമെന്നും പൃഥ്വി പറയുന്നു.

2011 ഏപ്രില്‍ 25നായിരുന്നു പൃഥ്വിരാജ്- സുപ്രിയ വിവാഹം. പ്രശസ്ത നടന്‍ സുകുമാരന്റെ മകനായ പൃഥ്വി 2002ല്‍ രഞ്ജിത്തിന്റെ സംവിധാനത്തില്‍ പുറത്തിറങ്ങിയ നന്ദനത്തിലൂടെയാണ് ശ്രദ്ധേയനാകുന്നത്. മാധ്യമപ്രവര്‍ത്തകയാണ് സുപ്രിയ.