ക്യാമറയ്ക്ക് മുന്നിലും പിന്നിലും പ്രവര്‍ത്തിച്ച എല്ലാവര്‍ക്കും തിയേറ്ററുകള്‍ നിറച്ച പ്രേക്ഷകര്‍ക്കും നന്ദി; നമ്മള്‍ ചരിത്രം സൃഷ്ടിച്ചിരിക്കുന്നു: ചരിത്രനേട്ടത്തില്‍ കല്ല്യാണി

മലയാള സിനിമ പ്രേക്ഷകരെ വിസ്മയത്തിലാഴ്ത്തിയിരിക്കുകയാണ് കല്യാണി പ്രിയദര്‍നെ നായികയാക്കി ഡൊമിനിക് അരുണ്‍ സംവിധാനം ചെയ്ത 'ലോക: ചാപ്റ്റര്‍ 1  ചന്ദ്ര'. റിലീസ് ചെയ്ത് വെറും 45 ദിവസത്തിനുള്ളില്‍ 300 കോടി രൂപയുടെ ആഗോള കളക്ഷന്‍ സ്വന്തമാക്കി ചിത്രം മലയാള സിനിമയുടെ ചരിത്രത്തില്‍ പുതുചരിത്രം കുറിച്ചു. മലയാളത്തിലെ ആദ്യ 300 കോടി ക്ലബ് സിനിമയായി 'ലോക' മാറിയിരിക്കുന്നു.

ചിത്രത്തിന്റെ നേട്ടത്തില്‍ കല്യാണി പ്രിയദര്‍ശന്‍ സോഷ്യല്‍ മീഡിയയിലൂടെ ആവേശം പങ്കുവെച്ചു. ''ക്യാമറയ്ക്ക് മുന്നിലും പിന്നിലും പ്രവര്‍ത്തിച്ച എല്ലാവര്‍ക്കും, തിയേറ്ററുകള്‍ നിറച്ച പ്രേക്ഷകര്‍ക്കും നന്ദി. നമ്മള്‍ ചേര്‍ന്ന് ചരിത്രം സൃഷ്ടിച്ചിരിക്കുന്നു'' എന്നായിരുന്നു അവര്‍ ഇന്‍സ്റ്റാഗ്രാം സ്റ്റോറിയിലൂടെ പറഞ്ഞത്. 'ലോക 300 കോടി' ആഘോഷിക്കുന്ന ഔദ്യോഗിക പോസ്റ്ററും അവര്‍ പങ്കുവെച്ചിരുന്നു.

കേരളത്തിന്റെ പുരാണങ്ങളിലും ഐതിഹ്യങ്ങളിലും നിന്ന് പ്രചോദനം ഉള്‍ക്കൊണ്ടുള്ള കഥയിലാണ് ചിത്രത്തിന് ആധാരമായത്. കല്യാണിയോടൊപ്പം നസ്ലന്‍ ഗാഫൂര്‍ പ്രധാന കഥാപാത്രത്തെ അവതരിപ്പിക്കുന്നു. കേരളത്തില്‍ നിന്നു മാത്രം 120 കോടിയിലധികം വരുമാനം നേടിയ ചിത്രത്തിന് വിദേശത്ത് നിന്നും സമാനമായ കളക്ഷനാണ് ലഭിച്ചത്. ഇന്ത്യയിലെ മറ്റ് സംസ്ഥാനങ്ങളില്‍നിന്ന് 60 കോടിയോളം രൂപ കൂടി സമാഹരിച്ചിട്ടുണ്ട്.

മലയാള സിനിമാ ലോകത്ത് ആദ്യമായാണ് അഞ്ച് ഭാഗങ്ങളുള്ള ഒരു ഫാന്റസി സിനിമാറ്റിക് യൂണിവേഴ്സ് രൂപം കൊള്ളുന്നത്. അതിന്റെ തുടക്കമാണ് ഈ ചിത്രം. ചന്തു സലിംകുമാര്‍, അരുണ്‍ കുര്യന്‍, ശരത് സഭ, നിഷാന്ത് സാഗര്‍, വിജയരാഘവന്‍ എന്നിവര്‍ പ്രധാന വേഷങ്ങളിലുണ്ട്. ദുല്‍ഖര്‍ സല്‍മാനും ടോവിനോ തോമസും അതിഥി വേഷങ്ങളിലൂടെ പ്രത്യക്ഷപ്പെടുമ്പോള്‍, മമ്മൂട്ടിയുടെ അദൃശ്യ സാന്നിധ്യവും സിനിമയ്ക്ക് പ്രത്യേകത നല്‍കുന്നു.

ചിത്രത്തിന്റെ രണ്ടാം ഭാഗമായ 'ലോക: ചാപ്റ്റര്‍ 2' അടുത്തിടെ പ്രഖ്യാപിച്ചിട്ടുണ്ട്. ഈ ഭാഗത്തിന്റെ നായകനായി ടോവിനോ തോമസ് എത്തും. ദുല്‍ഖര്‍ സല്‍മാന്റെ വേഫെറര്‍ ഫിലിംസ് നിര്‍മിച്ച ഏഴാമത്തെ ചിത്രമായ 'ലോക' ഇപ്പോള്‍ വരെ ഇന്ത്യയില്‍ ഏറ്റവും കൂടുതല്‍ കളക്ഷന്‍ നേടിയ മലയാള സിനിമയായി മാറിയിരിക്കുന്നു. ചിത്രത്തിന്റെ സാങ്കേതിക വിഭാഗങ്ങളില്‍ നിമിഷ് രവി (ഛായാഗ്രഹണം), ജേക്‌സ് ബിജോയ് (സംഗീതം), ചമന്‍ ചാക്കോ (എഡിറ്റിങ്) എന്നിവരാണ് മുഖ്യ പങ്കാളികള്‍. നിര്‍മാണ, പ്രൊഡക്ഷന്‍, മാര്‍ക്കറ്റിംഗ് ടീമുകള്‍ ചേര്‍ന്ന് 'ലോക'യെ മലയാള സിനിമയുടെ പുതിയ മൈല്‍സ്റ്റോണാക്കി മാറ്റിയിരിക്കുന്നു.