രാജേഷ് ഇപ്പോഴും ഐസിയുവില്‍ തുടരുന്നു; കാര്‍ഡിയാക് അറസ്റ്റിനെ തുടര്‍ന്നുണ്ടായ അവസ്ഥകള്‍ പരിഹരിക്കാന്‍ ദീര്‍ഘമായ ചികിത്സ വേണ്ടി വരും;'നമ്മുടെ കാത്തിരിപ്പിന് അര്‍ത്ഥമുണ്ടാകും; തിരിച്ചുവരവിന്റെ അടയാളങ്ങള്‍ കാണിക്കുന്നു; അവതാരകനും നടനുമായ രാജേഷ് കേശവിന്റെ ആരോഗ്യവിവരം പങ്കുവെച്ച് സുഹൃത്ത് 

രാജേഷിന്റെ ആരോഗ്യനിലയില്‍ പ്രതീക്ഷാവഹമായ മാറ്റങ്ങള്‍ ഉണ്ടെന്ന് പ്രിയ സുഹൃത്ത് പ്രതാപ് ജയലക്ഷ്മി. ഹൃദയാഘാതത്തെ തുടര്‍ന്നുണ്ടായ ബുദ്ധിമുട്ടുകള്‍ പരിഹരിക്കാന്‍ ദീര്‍ഘനാളത്തേക്ക് ചികിത്സ ആവശ്യമായി വന്നേക്കുമെന്ന് ഡോക്ടര്‍മാര്‍ അറിയിച്ചതായി പ്രതാപ് ഫെയ്‌സ്ബുക്കില്‍ പങ്കുവെച്ച കുറിപ്പില്‍ പറയുന്നു.

രാജേഷ് ഇപ്പോഴും ഐസിയുവില്‍ തുടരുകയാണ്, ബിപിയും, പള്‍സുമൊക്കെ നോര്‍മല്‍ ആണെങ്കിലും കാര്‍ഡിയാക് അറസ്റ്റിനെ തുടര്‍ന്നുണ്ടായ അവസ്ഥകള്‍ പരിഹരികരിക്കാന്‍ കൂടുതല്‍ ദീര്‍ഘമായ ചികിത്സ വേണ്ടി വന്നേക്കാം എന്നു ഡോക്ടര്‍മാര്‍ അഭിപ്രായപ്പെടുന്നു. തിരിച്ചു വരവിന്റെ അടയാളങ്ങള്‍ കാണിക്കുന്ന പ്രിയ സുഹൃത്തിനെ അടുത്ത ആഴ്ചയോടെ റൂമിലേക്ക് മാറ്റുന്ന കാര്യവും പരിഗണയിലെന്നു ഡോക്ടര്‍ പറയുന്നു.

രാജേഷിന് നല്ല കെയറും ചികിത്സയും ഉറപ്പ് വരുത്തുന്ന കാര്യത്തില്‍ ലേക് ഷോര്‍ ഹോസ്പിറ്റല്‍ ഡോക്ടമാരുടെ ഒരു പാനല്‍ രൂപീകരിക്കുകയും ചികിത്സയും അതുമായി ബന്ധപ്പെട്ട എല്ലാ അപ്‌ഡേററ്റ്‌സും കുടുംബത്തിന് നല്‍കുകയും ചെയ്യുന്നുണ്ട്. എങ്കിലും ന്യൂറോ റീഹാബിലിറ്റേഷന് വിദഗ്ദ ചികിത്സ തേടാന്‍ കേരളത്തിന് പുറത്തുള്ള ഈ മേഖലയിലെ കൂടുതല്‍ പരിചയ സമ്പത്തുള്ള ആശുപത്രികളുമായി ഡോക്ടര്‍മാര്‍ ബന്ധപ്പെടുകയും ചെയ്യുന്നുണ്ട്. 

പക്ഷെ ഇപ്പോഴത്തെ പരിഗണന രാജേഷിന്റെ ഐസിയുവില്‍ നിന്നും റൂമിലേക്ക് മാറ്റി ആരോഗ്യ നില സ്റ്റേബിള്‍ ആക്കുക എന്നുള്ളതാണ്. അത് കഴിഞ്ഞു മാത്രമേ മറ്റു കാര്യങ്ങള്‍ പരിഗണിക്കുന്നുള്ളൂ. നല്ല ചികിത്സയും, ആത്മാര്‍ത്ഥമായ പ്രാര്‍ത്ഥനയും, രാജേഷിന്റെ തിരിച്ചു വരവിനെ ഏറെ സഹായിക്കുമെന്നുറപ്പാണ്. നമ്മുടെ കാത്തിരിപ്പിന് അര്‍ത്ഥമുണ്ടാകും.

കൊച്ചിയിലെ സ്വകാര്യ ഹോട്ടലിലെ പരിപാടിക്കിടെയാണ് 47കാരനായ രാജേഷ് കേശവ് കുഴഞ്ഞ് വീണത്. ആന്‍ജിയോപ്ലാസ്റ്റിക്ക് രാജേഷിനെ വിധേയനാക്കിയെന്നും വളരെ താഴ്ന്ന നിലയിലായിരുന്ന ബിപി സാധാരണ നിലയിലേക്ക് എത്തിയെന്നും ആശുപത്രി വാര്‍ത്താക്കുറിപ്പില്‍ വിശദമാക്കിയിരുന്നു.