കുട്ടികളിലെ അമിത വികൃതിയും ഹൈപ്പര്‍ ആക്ടിവിറ്റിയും; തിരിച്ചറിയേണ്ട ലക്ഷണങ്ങള്‍

കുട്ടികളില്‍ അമിതമായ വികൃതിയും ദേഷ്യവും കാണുന്നത് മാതാപിതാക്കള്‍ക്ക് വലിയൊരു ബുദ്ധിമുട്ടാണ്. മൂന്ന് വയസ്സുമുതല്‍ ഏഴ് വയസ്സ് വരെയാണ് സാധാരണയായി ഇത്തരം സ്വഭാവം ആരംഭിക്കുന്നത്. ആണ്‍കുട്ടികളിലാണ് പെണ്‍കുട്ടികളെ അപേക്ഷിച്ച് കൂടുതലായി ഇത് കണ്ടുവരുന്നത്.

മനശാസ്ത്ര വിദഗ്ധര്‍ പറയുന്നതനുസരിച്ച്, കുട്ടികള്‍ താഴെപ്പറയുന്ന ലക്ഷണങ്ങളില്‍ ആറോ അതിലധികമോ കാണിക്കുന്നുണ്ടെങ്കില്‍ ചികിത്സ തേടുന്നത് ആവശ്യമാണ്.

പ്രധാന ലക്ഷണങ്ങള്‍:

• ശാന്തമായി ഇരിക്കാതെ ഇടയ്ക്കിടെ ചാടുകയും ഓടുകയും ചെയ്യുക.

• കൈകാലുകള്‍ നിരന്തരം ചലിപ്പിക്കുക.

• പരിചയമില്ലാത്തവരോടു പോലും പെട്ടെന്ന് അടുപ്പം കാണിക്കുക.

• ഇടയ്ക്കിടെ വിചിത്രമായ ഗോഷ്ടികള്‍ കാണിക്കുക.

• പറയുന്നത് മുഴുവന്‍ കേള്‍ക്കാനുള്ള ക്ഷമ ഇല്ലാതിരിക്കുക.

• മുതിര്‍ന്നവര്‍ സംസാരിക്കുമ്പോള്‍ ഇടയ്ക്ക് കയറി സംസാരിക്കുക.

• പഠനത്തില്‍ ശ്രദ്ധ തെറ്റുകയും പ്രവര്‍ത്തികള്‍ പൂര്‍ത്തിയാക്കാതിരിക്കുകയും ചെയ്യുക.

• ഒറ്റയ്ക്ക് ഇരുന്ന് സ്വയം സംസാരിക്കുക.

• സ്‌കൂളില്‍ ക്ലാസ് സമയത്ത് അധ്യാപകര്‍ക്ക് ബുദ്ധിമുട്ട് ഉണ്ടാക്കുക.

ഇത്തരം പെരുമാറ്റങ്ങള്‍ മാതാപിതാക്കളെ അലട്ടുന്നുണ്ടെങ്കിലും, ശിക്ഷ നല്‍കിയാണ് പരിഹാരം കണ്ടെത്തേണ്ടത് എന്ന് കരുതരുത്. കുട്ടികള്‍ക്ക് സ്‌നേഹവും കരുതലും നല്‍കുകയും, തെറ്റുകള്‍ എന്തുകൊണ്ട് സംഭവിച്ചുവെന്ന് സഹനത്തോടെ മനസ്സിലാക്കിക്കൊടുക്കുകയും ചെയ്യേണ്ടതാണെന്ന് വിദഗ്ധര്‍ നിര്‍ദേശിക്കുന്നു.

അമിത വികൃതിയുള്ള കുട്ടികളെ നിയന്ത്രിക്കാന്‍ പാരന്റിങ് രീതിയില്‍ മാറ്റം വരുത്തുന്നതും ആവശ്യമായ ചികിത്സ തേടുന്നതും ഏറ്റവും നല്ല മാര്‍ഗമാണെന്ന് വിദഗ്ധര്‍ ഓര്‍മിപ്പിക്കുന്നു.