യാത്ര ചെയ്യുമ്പോള്‍ ബുക്ക് ചെയ്യുന്ന ഹോട്ടലുകളില്‍ വെളുത്ത് ബെഡ് ഷീറ്റ് മാത്രം വിരിക്കുന്നത് എന്തുകൊണ്ട്? അതിന്റെ പിന്നിലെ കാരണം അറിഞ്ഞാലോ

യാത്രക്കാർ ഹോട്ടലിൽ താമസിക്കാൻ പോകുമ്പോൾ കൂടുതലായും കാണുന്ന ഒരു പൊതുവായ സവിശേഷതയാണ് വെളുത്ത നിറത്തിലുള്ള ബെഡ് ഷീറ്റുകൾ. റിസോർട്ടുകളിലോ ബജറ്റ് ഹോട്ടലുകളിലോ ആയാലും, മുറിയിലേക്കു കടന്നാൽ വൃത്തിയേറിയ വെളുത്ത ബെഡ് ഷീറ്റ് വിരിച്ച കിടക്കയാണ് കാത്തിരിക്കുന്നത്. മറ്റ് നിറത്തിലുള്ള ഷീറ്റ് വളരെ അപൂർവ്വമാണ്. ഇതിന് പിന്നിൽ നിരവധി കാരണങ്ങളുണ്ടെന്ന് ഹോട്ടൽ വ്യവസായം വ്യക്തമാക്കുന്നു.

ശുചിത്വത്തിന്റെ അടയാളം
വെളുത്ത ബെഡ് ഷീറ്റുകളിൽ ചെറിയൊരു കറപോലും എളുപ്പത്തിൽ കണ്ടെത്താം. അതിഥികൾക്ക് വിശ്വാസം നൽകുന്നതിനും ജീവനക്കാർക്ക് ഷീറ്റ് മാറ്റാൻ സൗകര്യമൊരുക്കുന്നതിനും ഇത് സഹായകമാണ്. വെളുപ്പ് സുതാര്യതയും സത്യസന്ധതയും പ്രതിഫലിപ്പിക്കുന്ന നിറമാണെന്നും വിദഗ്ധർ പറയുന്നു.

ഏകോപനവും സമയലാഭവും
മുറിയുടെ ഭിത്തി നിറം ഏതായാലും വെളുത്ത ഷീറ്റ് പൊരുത്തപ്പെടും. ഇതിലൂടെ ഓരോ മുറിക്കും പ്രത്യേക നിറത്തിലുള്ള ഷീറ്റ് കണ്ടെത്തേണ്ട സാഹചര്യം ഒഴിവാക്കാം. സമയവും പരിശ്രമവും ലാഭിക്കാനാകുന്നത് ഹോട്ടലുകൾക്ക് വലിയ നേട്ടമാണ്.

പ്രായോഗിക ഗുണങ്ങൾ
വെളുത്ത ബെഡ് ഷീറ്റുകൾ ഉയർന്ന താപനിലയിൽ അലക്കി വൃത്തിയാക്കാൻ കഴിയും. നിറം മങ്ങുന്നതിനുള്ള ഭയം ഇല്ലാത്തതിനാൽ, ദീർഘകാലം ഉപയോഗിക്കാനാകും.

പ്രീമിയം അനുഭവം
വെളുപ്പ് ആഡംബരവും കുലീനത്വവും നൽകുന്ന നിറമാണെന്നതിനാൽ, ബജറ്റ് ഹോട്ടലുകളിലും ഇത് പ്രീമിയം അനുഭവം നൽകുന്നുവെന്ന തോന്നൽ സൃഷ്ടിക്കുന്നു. സ്റ്റാൻഡേർഡ് മുറികളിലും സ്യൂട്ട് മുറികളിലും ഒരേ തരത്തിലുള്ള ഷീറ്റ് ഉപയോഗിക്കുന്നത് സ്ഥിരതയും പ്രൊഫഷണലിസവും ഉറപ്പാക്കുന്നു.