ഒരു വര്‍ഷം മുന്‍പ് അവളെ ഇറക്കിക്കൊണ്ട് വന്നു; കരഞ്ഞ് കാല് പിടിച്ചാണ് സതീഷ് തിരികെ കൊണ്ടുപോയത്; അന്ന് പരാതി നല്‍കിയിരുന്നെങ്കില്‍...ഇന്ന് മകള്‍ ഒപ്പം കാണുമായിരുന്നു; പൊട്ടിക്കരഞ്ഞ് അതുല്യയുടെ അച്ഛന്‍ രാജശേഖരന്‍

ഷാര്‍ജയില്‍ ഗാര്‍ഹിക പീഡനത്തെ തുടര്‍ന്ന് സംഭവിച്ച രണ്ട് മരണങ്ങളും പ്രവാസ ലോകത്തെ അതിവിശേഷം ദുഃഖത്തിലാഴ്ത്തിയതാണ്. ആദ്യമായി മരണപ്പെട്ടത് വിപഞ്ചികയും അവളുടെ കുഞ്ഞുമായിരുന്നു. ഇവരുടെ മരണവാര്‍ത്തക്ക് പിന്നാലെയാണ് തേവലക്കര കോയിവിള സ്വദേശിനിയായ അതുല്യയുടെ മരണവാര്‍ത്ത കൂടി പുറത്ത് വന്നത്. ഭര്‍ത്താവിന്റെ ചൂഷണവും പീഡനവുമാണ് ഇവരെ ജീവനൊടുക്കാന്‍ പ്രേരിപ്പിച്ചത് എന്നതാണ് ഇരുവര്‍ക്കും തമ്മിലുള്ള സാദൃശ്യം.

അതുല്യയുടെ കുടുംബം ഈ ദുഃഖം താങ്ങാന്‍ കഴിയാതെ വിഷാദത്തിലാണ്. ഭര്‍ത്താവിന് ഒപ്പം ഏറെ നാളായി ഷാര്‍ജയിലാണ് അതുല്യ. ജോലി കിട്ടിയിട്ടും സതീഷ് ഇവരെ വിടാന്‍ സമ്മതിച്ചിരുന്നില്ല. ഭര്‍ത്താവിന്റെ പീഡനം മൂലം സഹിച്ച് കഴിയുകയായിരുന്നു. കഴിഞ്ഞ ദിവസമാണ് അതുല്യയ്ക്ക് ഒരു മാളില്‍ ജോലി ലഭിച്ചത്. ഈ ജോലിക്ക് വേണ്ടി പോകാന്‍ ഇരിക്കുന്നതിന് മുന്‍പാണ് അതുല്യയെ തൂങ്ങി മരിച്ച നിലയില്‍ കണ്ടെത്തിയത്. ജോലിയില്‍ പ്രവേശിക്കാനായി അവള്‍ നാളുകളായി ഒരുങ്ങിക്കൊണ്ടിരുന്നതായിരുന്നു. പുതിയ വസ്ത്രങ്ങള്‍ വാങ്ങിയതും, പുതിയ ജീവിതം ആരംഭിക്കാനുള്ള പ്രതീക്ഷയും ഒക്കെ അതുല്യയെ ഉറ്റുനോക്കി നിന്നിരുന്നപ്പോഴാണ് ദുഃഖകരമായ ഈ സംഭവം.

'ഇന്നലെ മുതല്‍ ജോലിക്കു പോകേണ്ട എന്റെ മോളാണ് ഇപ്പോള്‍ മരിച്ച നിലയില്‍ കിടക്കുന്നത്.'  അതുല്യയുടെ അച്ഛന്‍ എസ്. രാജശേഖരന്‍ പിള്ള വേദനയോടെ പറഞ്ഞു. ഏറെ നാളായി അതുല്യ ഒരു ജോലി ലഭിക്കാനായി കാത്തിരുന്നുവെന്നും അതിനായി നിരവധി ശ്രമങ്ങള്‍ നടത്തിത്തുടങ്ങിയതായും അച്ഛന്‍ പറയുന്നു. അതുല്‍യക്ക് ജോലി ചെയ്യാന്‍ അനുമതി നല്‍കാന്‍ ഭര്‍ത്താവ് ഒരിക്കലും തയ്യാറായിരുന്നില്ല. ഓരോ തവണയും നിരവധി കാരണം പറഞ്ഞ് ജോലി ചെയ്യുന്നത് ഒഴിവാക്കിക്കൊണ്ടിരുന്നു.

എന്നാല്‍, ഒടുവില്‍ ഏറെ പ്രയാസങ്ങള്‍ക്കൊടുവില്‍ അവള്‍ക്ക് ഷാര്‍ജയിലെ ഒരു മാളില്‍ ജോലി ലഭിച്ചിരുന്നു. അതിന്റെ ഭാഗമായാണ് പുതിയ വസ്ത്രങ്ങളും വാങ്ങിയത്. ആത്മവിശ്വാസത്തോടെ, ജീവിതം കുറെക്കൂടി മെച്ചപ്പെടുമെന്ന പ്രതീക്ഷയോടെ ആ ജോലിയില്‍ ചേരാന്‍ ഒരുങ്ങിയ മോളിന് അപ്രതീക്ഷിതമായാണ് മരണത്തോട് കൈകൊടുക്കേണ്ടിവന്നത്.

'ഒരു ജോലി കിട്ടിയ ശേഷം ജീവിതം ഭര്‍ത്താവില്‍ നിന്ന് വേര്‍പിരിഞ്ഞ് കുഞ്ഞിനെ ഒറ്റയ്ക്ക് വളര്‍ത്തി മുന്നോട്ടുപോകാമെന്നായിരുന്നു അവളുടെ ആഗ്രഹം,' അച്ഛന്‍ പറയുന്നു. എന്നാല്‍ ആ പ്രതീക്ഷകളും, ആ ആസൂത്രണങ്ങളും, ആ നിലയ്ക്കും ജീവിതം മുന്നോട്ട് നയിക്കാനുള്ള ആഗ്രഹങ്ങളും ഒരു അറ്റത്ത് തീര്‍ന്നെന്ന് അദ്ദേഹം കണ്ണീരോടെ പറയുന്നു. 'എന്റെ മോളിന്റെ എല്ലാ സ്വപ്‌നങ്ങളും ഒരേയൊരു നിമിഷത്തില്‍ നിലംപതിച്ചു. ഇനിയും ഞങ്ങള്‍ക്ക് അവളെ തിരിച്ചുകിട്ടാനാവില്ല.'

ഒരു വര്‍ഷം മുന്‍പു താന്‍ ഷാര്‍ജയിലുള്ള സമയത്ത് സതീഷ് മര്‍ദിക്കുന്നെന്ന് കാണിച്ചു മകള്‍ വിളിച്ചു വരുത്തിയിരുന്നതായി രാജശേഖരന്‍ പിള്ള പറഞ്ഞു. അന്ന് മകളെ ഇറക്കിക്കൊണ്ടുവന്നു. ഇനി അവന്റെ കൂടെ താമസിക്കരുതെന്നും ഇങ്ങനെ മുന്നോട്ടു പോകരുതെന്നും പറഞ്ഞിരുന്നു. സതീഷിന്റെ ജോലിയും മറ്റും നഷ്ടപ്പെടുത്തേണ്ടെന്നു കരുതിയാണ് ഷാര്‍ജയില്‍ വച്ചു പരാതി നല്‍കാതിരുന്നത്. പിന്നീട് അതുല്യ താമസിച്ചിരുന്ന ഇടത്തു നിന്ന് കരഞ്ഞു കാലു പിടിച്ചാണ് അതുല്യയെ വീണ്ടും സതീഷ് കൂടെ കൊണ്ടുപോകുന്നത്. അന്നു പരാതി നല്‍കുകയോ മറ്റോ ചെയ്തിരുന്നെങ്കില്‍ ഇന്ന് എന്റെ മോള്‍ കൂടെയുണ്ടാകുമായിരുന്നു. അദ്ദേഹം കരഞ്ഞുകൊണ്ട് പറഞ്ഞു. 

അതുല്യയുടെ പോസ്റ്റ്‌മോര്‍ട്ടം പൂര്‍ത്തിയായി. മരണകാരണവും ഫൊറന്‍സിക് റിപ്പോര്‍ട്ടും ഇന്നു ലഭിക്കുമെന്നാണു സൂചന. ഇതിനു ശേഷമാകും മൃതദേഹം നാട്ടിലെത്തിക്കുക. അതുല്യ ആത്മഹത്യ ചെയ്യില്ലെന്ന് സഹോദരി അഖിലയും പറയുന്നുണ്ട്. ഇതേ നിലപാട് തന്നെയാണ് കഴിഞ്ഞ ദിവസം മാധ്യമങ്ങളെ കണ്ടപ്പോള്‍ അതുല്യയുടെ ഭര്‍ത്താവ് സതീഷും പറഞ്ഞത്. അതുല്യ മരിച്ച ശേഷം ഫ്‌ലാറ്റില്‍ എത്തി നോക്കുമ്പോള്‍ കാലുകള്‍ നിലത്ത് ചവിട്ടാവുന്ന നിലയിലായിരുന്നുവെന്ന് ഭര്‍ത്താവ് സതീഷ് തന്നെ പറഞ്ഞിട്ടുണ്ട്. പിറന്നാള്‍ ദിനത്തിലാണ് അതുല്യ മരണത്തിനു കീഴടങ്ങിയത്.