ഖലീഫ' നിര്‍മിക്കാന്‍ മോഹമുണ്ടായിരുന്നു, പക്ഷേ ജിനു സമ്മതിച്ചില്ല'; ശമ്പളം വാങ്ങിച്ച് അഭിനയിച്ചാല്‍ മതിയെന്നായിരുന്നു തിരക്കഥാകൃത്ത് പറഞ്ഞതെന്നും പൃഥ്വിരാജ്

'പോക്കിരി രാജ'യ്ക്കു ശേഷം പൃഥ്വിരാജും വൈശാഖും വീണ്ടും ഒന്നിക്കുന്ന ബിഗ് ബജറ്റ് ചിത്രം 'ഖലീഫ'യുടെ വിശേഷങ്ങള്‍ പങ്കുവെച്ച് പൃഥ്വിരാജ്. ചിത്രത്തിന്റെ നിര്‍മാണ പങ്കാളിയാകാന്‍ തനിക്ക് താല്‍പ്പര്യമുണ്ടായിരുന്നുവെന്നും എന്നാല്‍ തിരക്കഥാകൃത്ത് ജിനു ഏബ്രഹാം അതിന് സമ്മതിച്ചില്ലെന്നും താരം വെളിപ്പെടുത്തി. 

'ഖലീഫ നിര്‍മിക്കാന്‍ അവസരമുണ്ടായിരുന്നെങ്കില്‍ ഞാന്‍ ചെയ്‌തേനേ. പക്ഷേ ജിനു സമ്മതിച്ചില്ല. ശമ്പളം വാങ്ങിച്ച് അഭിനയിച്ചാല്‍ മതിയെന്നായിരുന്നു ജിനുവിന്റെ നിലപാട്,' പൃഥ്വിരാജ് പറഞ്ഞു. ചിത്രത്തില്‍ ആമിര്‍ അലി എന്ന കരുത്തുറ്റ കഥാപാത്രമായാണ് പൃഥ്വിരാജ് എത്തുന്നത്. 'കടുവ'യ്ക്കു ശേഷം ജിനു വി. ഏബ്രഹാം തിരക്കഥയൊരുക്കുന്ന ഈ ചിത്രം സ്വര്‍ണക്കടത്തിന്റെ പശ്ചാത്തലത്തിലാണ് ഒരുങ്ങുന്നത്. ചിത്രത്തിന്റെ ടൈറ്റില്‍ ലോഞ്ച് മുതല്‍ പൃഥ്വിരാജിന്റെ സ്‌റ്റൈലിഷ് ലുക്ക് സോഷ്യല്‍ മീഡിയയില്‍ വൈറലാണ്. 

എന്നാല്‍ ആരാധകരെ ആവേശത്തിലാഴ്ത്തുന്ന മറ്റൊരു വിവരം ചിത്രത്തിലെ മോഹന്‍ലാലിന്റെ സാന്നിധ്യമാണ്. മാമ്പറയ്ക്കല്‍ അഹമ്മദ് അലി എന്ന കഥാപാത്രമായി അതിഥി വേഷത്തില്‍ മോഹന്‍ലാല്‍ ഈ ചിത്രത്തിലെത്തും. രണ്ടു ഭാഗങ്ങളായി ഒരുങ്ങുന്ന ചിത്രത്തിന്റെ രണ്ടാം ഭാഗത്തില്‍ മോഹന്‍ലാല്‍ ആയിരിക്കും നായകനെന്നാണ് സൂചന. ബോളിവുഡ് താരം നീല്‍ നിതിന്‍ മുകേഷ് ആണ് വില്ലനായി എത്തുന്നത്. 

വൈശാഖ് സംവിധാനം ചെയ്യുന്ന ചിത്രത്തിന് ഛായാഗ്രഹണമൊരുക്കുന്നത് ജോമോന്‍ ടി. ജോണ്‍ ആണ്. ജേക്സ് ബിജോയ് സംഗീതവും ചമന്‍ ചാക്കോ എഡിറ്റിങ്ങും നിര്‍വഹിക്കുന്നു. ചിത്രത്തിന്റെ ചിത്രീകരണം നിലവില്‍ പുരോഗമിക്കുകയാണ്. പുറത്തുവന്ന ട്രെയിലറിന് ഇതിനോടകം തന്നെ വന്‍ സ്വീകാര്യതയാണ് ലഭിച്ചത്. മോഹന്‍ലാലും പൃഥ്വിരാജും ഒരേ ഫ്രെയിമിലെത്തുന്ന 'ഖലീഫ' ബോക്‌സ് ഓഫീസില്‍ പുതിയ ചരിത്രം കുറിക്കുമെന്ന പ്രതീക്ഷയിലാണ് ആരാധകര്‍.