അടുക്കളയിലെ അവശ്യസാധനങ്ങള്‍ ശരിയായ സ്ഥലത്താണോ സൂക്ഷിക്കുന്നത് 

അടുക്കളയിലെ അവശ്യസാധനങ്ങള്‍ ശരിയായ സ്ഥലത്താണോ സൂക്ഷിക്കുന്നത്? സാധനങ്ങള്‍ ചീത്തയാകാതിരിക്കാന്‍ അറിയേണ്ട കാര്യങ്ങള്‍.

ഗ്യാസ് സ്റ്റൗവിന് അരികില്‍ എണ്ണ സൂക്ഷിക്കുന്നത് - എളുപ്പത്തില്‍ എടുക്കാന്‍ വേണ്ടി എണ്ണയും നെയ്യും സ്റ്റൗവിന് സമീപം വെക്കുന്നതാണ് ഏറ്റവും സാധാരണമായ തെറ്റ്. ചൂടും വെളിച്ചവുമാണ് ഭക്ഷണസാധനങ്ങളുടെ ഗുണമേന്മയുടെ ഏറ്റവും വലിയ ശത്രുക്കള്‍. പ്രത്യേകിച്ച്, കോള്‍ഡ് പ്രസ്സ്ഡ് എണ്ണകള്‍ (Cold-pressed oils) സാധാരണ റിഫൈന്‍ഡ് എണ്ണകളേക്കാള്‍ വേഗത്തില്‍ മാറ്റം വരുന്നവയാണ്. ചൂടും വെളിച്ചവുമുള്ള ഇടങ്ങളില്‍ വെച്ചാല്‍ അവ ഓക്സിഡൈസ് ആവുകയും അവയുടെ മണം നഷ്ടപ്പെടുകയും ചെയ്യും. ഇവയുടെ ഫ്രഷ്നസ് നിലനിര്‍ത്താന്‍ ഏറ്റവും എളുപ്പമുള്ള വഴി തണുപ്പുള്ളതും ഇരുണ്ടതുമായ കാബിനറ്റുകളില്‍ സൂക്ഷിക്കുക എന്നതാണ്. ഗ്ലാസ് ജാറുകളില്‍ ജനലരികില്‍ ഭംഗിയായി വെക്കുന്നതും ഇതേ കാരണത്താല്‍ സാധനങ്ങള്‍ പെട്ടെന്ന് കേടാകാന്‍ ഇടയാക്കും.

ഭരണികള്‍ ശരിയായി അടയ്ക്കാതിരിക്കുക - ഭരണികളുടെ അടപ്പുകള്‍ അയഞ്ഞുപോവുകയോ ശരിയായി അടയ്ക്കാതിരിക്കുകയോ ചെയ്യുന്നതാണ് രണ്ടാമത്തെ തെറ്റ്. തേന്‍ ശരിയായി അടച്ചു സൂക്ഷിച്ചില്ലെങ്കില്‍ അത് വായുവില്‍ നിന്നുള്ള ഈര്‍പ്പം വലിച്ചെടുക്കുകയും, ഇത് അതിന്റെ കട്ടി കുറയ്ക്കാനും ക്രമേണ പുളിച്ചുപോകാനും (fermentation) കാരണമാകും. നന്നായി അടച്ച ഗ്ലാസ് ഭരണികളാണ് തേനിന് ഏറ്റവും അനുയോജ്യം. ഓരോ തവണ അടയ്ക്കുമ്പോഴും ഭരണിയുടെ വായ്വട്ടം തുടച്ചു വൃത്തിയാക്കുന്നത് നല്ലതാണ്. കാരണം അവിടെ പറ്റിപ്പിടിച്ചിരിക്കുന്ന അവശിഷ്ടങ്ങള്‍ ഈര്‍പ്പത്തെ ആകര്‍ഷിക്കാന്‍ സാധ്യതയുണ്ട്.

ആവശ്യമില്ലാത്ത സാധനങ്ങള്‍ ഫ്രിഡ്ജില്‍ സൂക്ഷിക്കുന്നത് - നെയ്യ്, തേന്‍ തുടങ്ങിയ ആവശ്യമില്ലാത്ത സാധനങ്ങള്‍ ആളുകള്‍ പലപ്പോഴും ഫ്രിഡ്ജില്‍ വെക്കാറുണ്ട്. ഇത് അവയുടെ സ്വാഭാവിക രുചി നഷ്ടപ്പെടുത്താനും, തേനിലെ പഞ്ചസാര തരികളായി മാറാനും (crystallisation) കാരണമാകുന്നു. സാധാരണ മുറിയിലെ തണുപ്പുള്ള താപനിലയിലാണ് ഇവ ഏറ്റവും നന്നായി ഇരിക്കുന്നത്. നിങ്ങളുടെ തേന്‍ ഇതിനകം തരികളായി മാറിയിട്ടുണ്ടെങ്കില്‍ അത് കേടായതല്ല. ചെറുചൂടുവെള്ളത്തില്‍ ആ ഭരണി അല്പനേരം ഇറക്കിവെച്ചാല്‍ അത് പഴയ പരുവത്തിലാകും.

നനഞ്ഞ സ്പൂണ്‍ ഉപയോഗിക്കുന്നത് - നനഞ്ഞ സ്പൂണ്‍ ഉപയോഗിക്കുക എന്നത് നമ്മളില്‍ മിക്കവരും ചെയ്യുന്ന ഒരു തെറ്റാണ്. നെയ്യിലോ തേനിലോ എത്തുന്ന ചെറിയ അളവിലുള്ള ഈര്‍പ്പം പോലും കാലക്രമേണ അവയുടെ ഗുണനിലവാരം കുറയ്ക്കും. അതിനാല്‍ ഓരോ തവണയും പൂര്‍ണ്ണമായും ഉണങ്ങിയ സ്പൂണ്‍ മാത്രം ഉപയോഗിക്കുക എന്നത് ശ്രദ്ധിക്കേണ്ട കാര്യമാണ്.

വൃത്തിയല്ലാത്ത പാത്രങ്ങള്‍ ഉപയോഗിക്കുന്നത് - വൃത്തിയല്ലാത്തതോ പ്ലാസ്റ്റിക് കൊണ്ടുള്ളതോ ആയ പാത്രങ്ങളിലേക്ക് സാധനങ്ങള്‍ മാറ്റിപ്പകരുന്നത് എളുപ്പത്തില്‍ പറ്റുന്ന മറ്റൊരു അബദ്ധമാണ്. പ്രകൃതിദത്തവും കൃത്രിമമായി മാറ്റങ്ങള്‍ വരുത്താത്തതുമായ ചേരുവകള്‍ ബാഹ്യ അന്തരീക്ഷത്തോട് വേഗത്തില്‍ പ്രതികരിക്കും. അതിനാല്‍ വായുകടക്കാത്ത, പൂര്‍ണ്ണമായും ഉണങ്ങിയ ഗ്ലാസ് പാത്രങ്ങളാണ് എപ്പോഴും മികച്ചത്. കൂടാതെ, വലിയ അളവിലുള്ള പാക്കറ്റുകള്‍ മുഴുവനായി വീണ്ടും വീണ്ടും തുറക്കുന്നതിന് പകരം, കുറഞ്ഞ കാലത്തേക്ക് ആവശ്യമായത് മാത്രം ചെറിയ പാത്രങ്ങളിലേക്ക് മാറ്റിയെടുത്ത് ഉപയോഗിക്കുന്നതാണ് ഉചിതം.