നെഞ്ച് പൊട്ടുന്നുണ്ട്... ഹൃദയം നുറുങ്ങുന്നുണ്ട്... എന്തൊരു വിധിയാണിത്; രണ്ട് പിതാക്കന്മാരുടെ ദയനീയ മുഖം മനസ്സ് മരവിച്ച നിലയില്‍; ഫയര്‍ സ്റ്റേഷന്‍ ഓഫിസര്‍ കുറിപ്പ് വൈറലാകുമ്പോള്‍

കേരളത്തില്‍ വീണ്ടും വീണ്ടും ആവര്‍ത്തിക്കുന്ന മുങ്ങിമരണങ്ങള്‍ ഓരോ വീടിനെയും ഭീതിയിലാഴ്ത്തുകയാണ്. മഴക്കാലം തുടങ്ങുമ്പോഴൊക്കെ ഇത്തരം വാര്‍ത്തകള്‍ കേള്‍ക്കുന്നത് ഇനി അപൂര്‍വ്വമല്ല, പതിവായി മാറിക്കൊണ്ടിരിക്കുന്നു. കളിക്കാനും കുളിക്കാനും സന്തോഷത്തോടെ വീട്ടില്‍ നിന്നിറങ്ങുന്ന കുഞ്ഞുങ്ങളും യുവാക്കളും പലപ്പോഴും തിരിച്ചെത്തുന്നത് മൃതദേഹമായാണ്. കുടുംബങ്ങള്‍ക്ക് അവരുടെ പ്രിയപ്പെട്ടവരുടെ നഷ്ടം സഹിക്കാന്‍ കഴിയാത്ത വേദനയാണ് ഇത് സമ്മാനിക്കുന്നത്. പുഴകളുടെ കരയില്‍ നിന്നും കരയുന്ന അമ്മമാരുടെയും അച്ഛന്മാരുടെയും നിലവിളികളില്‍ ഈ ദുരന്തത്തിന്റെ ആഴം കേള്‍ക്കാം. രക്ഷാപ്രവര്‍ത്തകര്‍ ദിനവും രാത്രിയും ഇറങ്ങി തെരഞ്ഞ് പിടിക്കുന്ന മൃതദേഹങ്ങള്‍ കണ്ടുമുട്ടുമ്പോഴെല്ലാം അവരുടെ മനസ്സും തളരുന്നു.

കേരളത്തിലെ തുടര്‍ച്ചയായ മുങ്ങിമരണങ്ങളുടെ വാര്‍ത്തകള്‍ കേട്ട് വിറങ്ങലിച്ച് നില്‍ക്കുകയാണ് മലയാളികള്‍. ഓരോ ദിവസവും പത്രങ്ങളിലും ടെലിവിഷനിലും പുതിയൊരു ദുരന്തവാര്‍ത്ത വന്നിറങ്ങുമ്പോള്‍ സാധാരണ ജനങ്ങളും ഭയത്തോടെ പുഴകളും കായലുകളും നോക്കി നില്‍ക്കുന്നു. കോഴിക്കോട്ടെ ഏറ്റവും പുതിയ മുങ്ങിമരണങ്ങളില്‍ രക്ഷാപ്രവര്‍ത്തനത്തിലേര്‍പ്പെട്ട ഫയര്‍ സ്റ്റേഷന്‍ ഓഫിസര്‍ എം. എ. ഗഫൂര്‍ തന്റെ അനുഭവങ്ങള്‍ സോഷ്യല്‍ മീഡിയയില്‍ പങ്കുവച്ചത് വലിയ ചര്‍ച്ചയാക്കി. മരിച്ചവരുടെ മൃതദേഹങ്ങള്‍ കണ്ടെത്തിയപ്പോള്‍ കണ്ട ദൃശ്യങ്ങളും കുടുംബങ്ങളുടെ കണ്ണീര്‍ നിറഞ്ഞ മുഖങ്ങളും അദ്ദേഹം തന്റെ കുറിപ്പില്‍ വിശദമായി പറഞ്ഞിരിക്കുന്നു.

'നെഞ്ച് പൊട്ടുന്നുണ്ട്... ഹൃദയം നുറുങ്ങുന്നുണ്ട്... എന്തൊരു വിധിയാണിത്...'  ഇങ്ങനെ തുടങ്ങുന്നാണ് ഫയര്‍ സര്‍വീസ് ഓഫിസര്‍ എം. എ. ഗഫൂര്‍ തന്റെ കുറിപ്പ് പങ്കുവെച്ചത്. പതിനെട്ട് വര്‍ഷമായി ഫയര്‍ സര്‍വീസില്‍ ജോലി ചെയ്യുന്ന അദ്ദേഹം അനേകം ദുരന്തമുഖങ്ങള്‍ കണ്ടവനാണ്. ചൂരല്‍മല, കവളപ്പാറ പോലുള്ള വലിയ ദുരന്തങ്ങളിലും, മഴപ്പൊക്കിലും, വാഹനാപകടങ്ങളിലും, വീടുതീപ്പിടിത്തങ്ങളിലും, നിരവധി ആളുകളെ രക്ഷിച്ച് ജീവിതത്തിലേക്ക് തിരിച്ചുകൊണ്ടുവന്നിട്ടുണ്ട്. പലപ്പോഴും ജീവന്‍ നഷ്ടപ്പെട്ടവരുടെ മൃതദേഹങ്ങള്‍ കണ്ടെത്തി കുടുംബങ്ങള്‍ക്ക് കൈമാറേണ്ടി വന്നിട്ടുണ്ട്.

എന്നാല്‍ ഇത്തവണത്തെ അനുഭവം അദ്ദേഹത്തിന്റെ മനസ്സിനെ തകര്‍ത്തു. തുടര്‍ച്ചയായ രണ്ട് ദിവസങ്ങളില്‍ രണ്ടു പിതാക്കന്മാരുടെ നെഞ്ചുപൊട്ടി നിലവിളിക്കുന്ന മുഖം കാണേണ്ടി വന്നപ്പോള്‍ തന്റെ മനസ്സ് പോലും തളര്‍ന്നുപോയെന്ന് അദ്ദേഹം പറയുന്നു. ഇന്നലെ കൊടുവള്ളി മാനിപുരത്തെ 10 വയസുകാരി തന്‍ഹ ഷെറിന്റെ മൃതദേഹം കണ്ടെത്തി കൈമാറിയപ്പോഴും ഇന്ന് പുല്ലൂരംപാറ കുറുങ്കയത്ത് 17 വയസുകാരി അനുഗ്രഹയുടെ മൃതദേഹം കണ്ടെടുത്തപ്പോഴും അദ്ദേഹം കണ്ണുനിറഞ്ഞു. രണ്ടു ദിവസത്തോളം വെള്ളത്തില്‍ നിന്നു തെരഞ്ഞു കണ്ടെടുത്ത ചെറുപ്പക്കാരിയുടെ മൃതദേഹം കണ്ടപ്പോള്‍ കുടുംബങ്ങളുടെ കരച്ചില്‍ സഹിക്കാന്‍ തന്നെ കഴിഞ്ഞില്ലെന്ന് ഗഫൂര്‍ പറയുന്നു.

'രക്ഷാപ്രവര്‍ത്തകനായി മനസ്സ് കരുത്തുറ്റതായിരിക്കണം എന്ന് പലപ്പോഴും പറയാറുണ്ട്. പക്ഷേ, ഇങ്ങനെ നിരന്തരം കുട്ടികളുടെ മൃതദേഹം കണ്ടെടുക്കേണ്ടി വരുമ്പോള്‍ ഹൃദയം തകര്‍ന്ന് പോകുന്നു. ഓരോ മാതാപിതാവിന്റെയും മുഖത്ത് കാണുന്ന ആ നഷ്ടബോധം, ആ വേദന  അതാണ് നമ്മെയും വിറങ്ങലിക്കുന്നത്,' എന്നാണ് ഗഫൂര്‍ തന്റെ കുറിപ്പില്‍ പറഞ്ഞിരിക്കുന്നത്. കൈ വളരുന്നോ, കാല്‍ വളരുന്നോ എന്ന് നോക്കി തങ്ങളുടെ പ്രിയപ്പെട്ട കുഞ്ഞുങ്ങളെ വളര്‍ത്തി കൊണ്ടിരുന്ന രണ്ട് പിതാക്കന്മാര്‍ക്കും ഒരു നിമിഷം കൊണ്ട് എല്ലാം നഷ്ടമായി. വളര്‍ത്തിയ സ്‌നേഹത്തിനും പ്രതീക്ഷകള്‍ക്കും അവസാനം നല്‍കിയത് അവരുടെ മക്കളുടെ മരണം. കരഞ്ഞു വിളിച്ച് കണ്ണീര്‍ ഒഴുക്കുന്ന അവരുടെ മുഖം കണ്ടുനില്‍ക്കുമ്പോള്‍ ആരും തന്നെ മനസ്സു കരുത്തുറ്റവനായി നിലകൊള്ളാന്‍ കഴിയില്ല. അവരുടെ മുന്നില്‍ ജീവന്‍ ഇല്ലാത്ത ശരീരം മാത്രമായി അവരുടെ മക്കളെ കൈമാറേണ്ടി വരുന്ന ആ നിമിഷം എത്രത്തോളം ക്രൂരമാണെന്ന് അതു നേരിട്ട് കാണുന്നവര്‍ക്കേ മനസ്സിലാക്കാനാകൂ.

ഗഫൂര്‍ തന്റെ കുറിപ്പില്‍ പറയുന്നു  'എനിക്ക് ഏകദേശം ഇതേ പ്രായത്തിലുള്ള മക്കളുണ്ട്. അവരുടെ മുഖം ഓര്‍ക്കുമ്പോള്‍ പോലും നെഞ്ച് പിടയുന്നു. അപ്പോഴാണ് മനസ്സ് ചോദിക്കുന്നത്  എന്ത് പറയും ഇവരുടെ മാതാപിതാക്കളോട്? എങ്ങനെയാണ് അവരുടെ ദുഖം കുറയ്ക്കാന്‍ കഴിയുക? എങ്ങനെ പറയും  ഇതാണ് വിധി, ഇതാണ് ജീവിതം?' അദ്ദേഹത്തിന്റെ ഈ വാക്കുകള്‍ രക്ഷാപ്രവര്‍ത്തനത്തിന്റെയും ദുഃഖത്തിന്റെ ഭാരത്തിന്റെയും കഥയാണ് പറയുന്നത്. ഒരു രക്ഷാപ്രവര്‍ത്തകനായിട്ടും, ഒരു പിതാവായിട്ടും, ആ വേദന അവനെ ഉള്ളില്‍ നിന്നും പൊളിച്ചെറിയുന്നുവെന്ന് അദ്ദേഹത്തിന്റെ കുറിപ്പില്‍ വ്യക്തമാകുന്നു. കുടുംബങ്ങളുടെ കണ്ണീരില്‍ നനഞ്ഞുനില്‍ക്കുന്ന ഈ സംഭവങ്ങള്‍ ഇനി ആവര്‍ത്തിക്കാതിരിക്കട്ടെ എന്ന പ്രാര്‍ത്ഥനയിലാണ് അദ്ദേഹം കുറിപ്പ് അവസാനിപ്പിക്കുന്നത്.