മകളുടെ രാത്രിയാത്ര ശരിയല്ലെന്ന് നാട്ടുകാര്‍; 10.30ക്ക് വീട്ടില്‍ കയറി വന്ന മകളുമായി വാക്ക് തര്‍ക്കം; പിന്നാലെ കഴുത്തില്‍ തോര്‍ത്ത് മുറുക്കി കൊലപ്പെടുത്തി അച്ഛന്‍; നാട്ടുകാരോട് പറഞ്ഞത് ആത്മഹത്യ എന്ന്; പോസ്റ്റുമോര്‍ട്ടത്തില്‍ തെളിഞ്ഞു കൊലപാതകം; മാരാരിക്കുളത്തേ വീട്ടില്‍ എയ്ഞ്ചല്‍ ജാസ്മിന് സംഭവിച്ചത്

നാളുകള്‍ മാറിയതോടെ യാത്രക്കുള്ള തലങ്ങളുമുതലുള്ള സമീപനങ്ങള്‍ വരെ മാറിക്കഴിഞ്ഞിരിക്കുന്നു. രാത്രിയാത്രയും ഇനി ഒരു അത്ഭുതമോ അപരിചിതമോ ആയ കാര്യമല്ല. കൂട്ടുകാരോടൊപ്പം രാത്രി കറങ്ങി നടക്കുന്നത് ഇപ്പോള്‍ പലരും സ്വാഭാവികമായി കാണുന്നു  പ്രത്യേകിച്ചും യുവതികളും യുവാക്കളും. ചില കുടുംബങ്ങള്‍ ഇത്തരത്തിലുള്ള യാത്രകളെ പിന്തുണയ്ക്കുമ്പോള്‍, മറ്റുചിലര്‍ അതിനോട് എതിര്‍പ്പ് പ്രകടിപ്പിക്കുന്നവരാണ്. എന്നതില്‍ ചില ആളുകള്‍ പെണ്‍കുട്ടികള്‍ രാത്രിയില്‍ പോകുന്നത് ശരിയല്ലെന്ന് പറഞ്ഞ് കുടുംബത്തെ ബുദ്ധിമുട്ടിലാക്കുന്ന ചിലരുടെ ഇടപെടലിലാണ്. ഇത്തരമൊരു നിലപാടാണ് ചിലപ്പോള്‍ വലിയ ദു:ഖങ്ങളിലേക്കും സംഭവങ്ങളിലേക്കും വഴി തെളിയിക്കുന്നത്. അത്തരമൊരു രാത്രിയാത്രയുടെ പ്രശ്‌നമാണ് സ്‌നേഹിച്ച് വളര്‍ത്തിയ മകളെ സ്വന്തം അച്ഛന്‍ തന്നെ കൊല്ലാന്‍ ഇടയാക്കിയതും. 

മാരാരിക്കുളത്താണ് സംഭവം. കുടുംബത്തിന്റെ നിശ്ചലത തകര്‍ത്ത ദാരുണ സംഭവമാണ് മകളെ അച്ഛന്‍ തോര്‍ത്ത് ഉപയോഗിച്ച് കഴുത്ത് ഞെരിച്ചു കൊലപ്പെടുത്തിയത്. രാത്രിയില്‍ കൂട്ടുകാരോടൊപ്പം മകള്‍ യാത്ര ചെയ്തതാണ് തര്‍ക്കത്തിന്റെ തുടക്കം. മകളുടെ ആഗ്രഹം എന്നന്നേക്കുമായി മാറ്റാനുള്ള ശ്രമം ദുരന്തത്തിലേക്ക് തിരിയുകയായിരുന്നു. വീട്ടില്‍ തര്‍ക്കവും നിരന്തരമായ വാക്കേറ്റവും നടന്നു. ഒടുവില്‍ ദേഷ്യം സഹിക്കാന്‍ കഴിയാതെ സ്വന്തം മകളെ അച്ഛന്‍ കഴുത്തില്‍ തോര്‍ത്ത് മുരുക്കി കൊലപ്പെടുത്തുകയായിരുന്നു. മാരാരിക്കുളം തെക്ക് പഞ്ചായത്ത് പതിനഞ്ചാം വാര്‍ഡില്‍ കുടിയാംശേരി വീട്ടിലാണ് ഈ ഞെട്ടിക്കുന്ന സംഭവം. 28 വയസ്സുള്ള എയ്ഞ്ചല്‍ ജാസ്മിന് എന്ന യുവതിയാണ് അച്ഛന്റെ കൈകളാല്‍ ജീവന്‍ നഷ്ടമായത്. സംഭവത്തെത്തുടര്‍ന്ന് 53 കാരനായ അച്ഛന്‍ ഫ്രാന്‍സിസിനെ (ജോസ് മോന്‍ എന്നറിയപ്പെടുന്നു) മണ്ണഞ്ചേരി പൊലീസ് കസ്റ്റഡിയില്‍ എടുത്തിരിക്കുകയാണ്. അവരുടെ വീടിനകത്ത് നടന്ന ഈ സംഭവം എല്ലാവരും ഞെട്ടലോടെയാണ് കേട്ടത്. 

എയ്ഞ്ചല്‍ ജാസ്മിന്‍ രാത്രിയില്‍ ഒറ്റയ്ക്ക് പുറത്ത് പോകുന്നത് വീട്ടില്‍ സ്ഥിരമായ ചര്‍ച്ചാവിഷയമായിരുന്നു. മുമ്പ് പലപ്പോഴായി ഇതിനെക്കുറിച്ച് അച്ഛനും മകളും തമ്മില്‍ തര്‍ക്കങ്ങള്‍ ഉണ്ടായിട്ടുമുണ്ട്. എയ്ഞ്ചലിന്റെ ഈ രാത്രിയാത്രകള്‍ക്ക് നേരെ അച്ഛന്‍ ഫ്രാന്‍സിസിന് നിലപാട് കര്‍ശനമായിരുന്നു. ഇത് മാത്രമല്ല, നാട്ടിലുള്ള ചിലര്‍ എയ്ഞ്ചലിന്റെ ഈ യാത്രകള്‍ 'ശരിയല്ല' എന്ന നിലയിലാണ് ഫ്രാന്‍സിസിനോട് പറയുകയും ചെയ്തിരുന്നു. നാട്ടുകാര്‍ പറയുന്നതും കുറ്റപ്പെടുത്തലുകളും എല്ലാം ആയപ്പോള്‍ അദ്ദേഹത്തിന്റെ ദേഷ്യം വര്‍ദ്ധിച്ചു. ഇത് അയാളിലെ കോപത്തിനെ അടക്കിവെക്കാന്‍ സാധിക്കുന്നതിലും അപ്പുറമായിരുന്നു. ചൊവ്വാഴ്ച രാത്രി എയ്ഞ്ചല്‍ വീണ്ടും പുറത്ത് പോയി വൈകിയെത്തുകയായിരുന്നു. വീട്ടിലേക്കെത്തിയ ഉടന്‍ തന്നെ ഫ്രാന്‍സിസ് എയ്ഞ്ചലുമായി വാക്ക് തര്‍ക്കം ഉണ്ടായി. ഈ തര്‍ക്കം വാക്കുകള്‍ മാത്രമല്ല, കൈയേറ്റത്തിലേക്കും വളര്‍ന്നു. ബോധം നഷ്ടപ്പെടുന്ന തരത്തില്‍ ഫ്രാന്‍സിസ് എയ്ഞ്ചലിന്റെ കഴുത്ത് ഞെരിച്ചു. തുടര്‍ന്ന് തോര്‍ത്ത് എടുത്ത് കഴുത്തില്‍ മുറുക്കി പിടിക്കുകയായിരുന്നു. ഈ സംഭവം നടക്കുമ്പോള്‍ വീട്ടില്‍  ഫ്രാന്‍സിസിന്റെ പിതാവ് സേവ്യര്‍, മാതാവ് സൂസി, ഭാര്യ സിന്ധു എന്നിവരും ഉണ്ടായിരുന്നു. ഇവര്‍ എതിര്‍ത്തെങ്കിലും ഫ്രാന്‍സിസിന്റെ കോപം അടങ്ങിയില്ല. 

എയ്ഞ്ചല്‍ മരിച്ചുവെന്ന് ഉറപ്പായതോടെ ഭയപ്പെട്ട കുടുംബം രാവിലെ വരെ വീടിനുള്ളില്‍ത്തന്നെ ഇരുന്നു. പുലര്‍ച്ചെ 6 മണിയോടെ എയ്ഞ്ചലിനെ മരിച്ച നിലയില്‍ കണ്ടെത്തിയെന്നു പറഞ്ഞു ഇവര്‍ കരഞ്ഞതോടെയാണ് അയല്‍വാസികള്‍ വിവരം അറിയുന്നത്. കരച്ചില്‍ കേട്ടെത്തിയ അയല്‍വാസികളോട് മകള്‍ വിളിച്ചിട്ട് അനങ്ങുന്നില്ലെന്നാണ് കുടുംബം പറഞ്ഞത്. പഞ്ചായത്തംഗം ഉള്‍പ്പെടെയുള്ളവര്‍ വീട്ടിലെത്തുമ്പോള്‍ കട്ടിലില്‍ കിടക്കുന്ന നിലയിലായിരുന്നു മൃതദേഹം. തുടര്‍ന്ന് ചെട്ടികാട് താലൂക്ക് ആശുപത്രിയിലേക്കു മാറ്റി. മണ്ണഞ്ചേരി പൊലീസ് നടത്തിയ പരിശോധനയില്‍ കഴുത്തിലെ പാട് ശ്രദ്ധയില്‍പെട്ടതോടെയാണ് കൊലപാതകമാണെന്ന സംശയം തോന്നിയത്. തുടര്‍ന്നു ഫ്രാന്‍സിസിനെ സ്റ്റേഷനില്‍ വിളിച്ചു വരുത്തി ചോദ്യം ചെയ്തപ്പോള്‍ കൊലപാതകമാണെന്നു സമ്മതിക്കുകയായിരുന്നു. വീട്ടില്‍ ഉള്ളവരെയും പോലീസ് പ്രത്യേകം ചോദ്യം ചെയ്തു. ഫ്രാന്‍സിസിന്റെ ഭാര്യ സിന്ധുവിനെ കേസില്‍ പ്രതി ചേര്‍ത്തേക്കും.

ആലപ്പുഴയിലെ സ്വകാര്യ ആശുപത്രിയില്‍ ലാബ് ടെക്‌നിഷ്യനായ എയ്ഞ്ചല്‍ ഭര്‍ത്താവുമായി പിണങ്ങി ആറു മാസമായി സ്വന്തം വീട്ടിലായിരുന്നു താമസം. രാത്രി സ്‌കൂട്ടറുമായി പുറത്തു പോകാറുള്ള എയ്ഞ്ചല്‍ ചൊവ്വാഴ്ച രാത്രി 9ന് പുറത്തു പോയി പത്തരയോടെയാണ് തിരിച്ചെത്തിയത്. പിടിവലിക്കിടെ എയ്ഞ്ചലിന്റെ കഴുത്തിനു കുത്തിപ്പിടിക്കുകയും തോര്‍ത്ത് ഉപയോഗിച്ച് മുറുക്കി കൊലപ്പെടുത്തുകയുമായിരുന്നു എന്നാണ് ഫ്രാന്‍സിസ് പോലീസിനോട് പറഞ്ഞിരിക്കുന്നത്. പോസ്റ്റ്മാര്‍ട്ടത്തിനു ശേഷം ആലപ്പുഴ മെഡിക്കല്‍ കോളജ് ആശുപത്രിയില്‍ സൂക്ഷിച്ചിരിക്കുന്ന മൃതദേഹം ഇന്നു രാവിലെ 11ന് വീട്ടിലെത്തിക്കും. സംസ്‌കാരം 12ന് ഓമനപ്പുഴ സെന്റ് ഫ്രാന്‍സിസ് സേവ്യേഴ്‌സ് പള്ളിയില്‍. ഭര്‍ത്താവ്: പ്രഹിന്‍ (മനു).