പ്രളയത്തില്‍ ഫാം മുഴുവന്‍ തകര്‍ന്നു; പശുക്കള്‍ ഒലിച്ചുപോയി; ചെളി നീക്കാന്‍ ഒരുപാട് നാള്‍ എടുത്തു; ഇനി ഇല്ല എന്ന് തീരുമാനിച്ചതാണ്; പക്ഷേ മണ്ണിനോടുള്ള സ്‌നേഹമാണ് വീണ്ടും ഫാം തുടങ്ങാന്‍ തീരുമാനിക്കുന്നത്; ഞാന്‍ ഒരു ക്ഷീര കര്‍ഷകനാണെന്ന് പറയാന്‍ അഭിമാനമുണ്ട്: ജയറാം

മികച്ച ക്ഷീര കര്‍ഷകനുള്ള സംസ്ഥാന സര്‍ക്കാരിന്റെ അവാര്‍ഡ് ലഭിച്ചതിന്റെ പിന്നിലെ കഥ നടന്‍ ജയറാം പങ്കുവച്ചു. സംസ്ഥാന കാര്‍ഷികോത്സവത്തില്‍ സംസാരിക്കവേ അദ്ദേഹം പറഞ്ഞു, സിനിമാ നടനായതിനാലല്ല തനിക്ക് അവാര്‍ഡ് ലഭിച്ചത്, 100 ശതമാനം അര്‍ഹതയുണ്ടായതിനാലാണ് രണ്ട് തവണയും സംസ്ഥാന സര്‍ക്കാര്‍ അംഗീകരിച്ചതെന്ന് ജയറാം പറഞ്ഞു. 

'ഞാന്‍ ഒരു ക്ഷീര കര്‍ഷകനാണെന്ന് പറയാന്‍ അഭിമാനമുണ്ട്. ഫാം എന്റെയൊരു സ്വകാര്യ സന്തോഷമാണ്. 2005-ല്‍ ഏറ്റവും വൃത്തിയുള്ള ഫാം എന്ന നിലയ്ക്കാണ് ആദ്യ അവാര്‍ഡ് ലഭിച്ചത്. 2018ലെ പ്രളയത്തില്‍ പെരിയാറിന്റെ തീരത്തെ ഫാം മുഴുവന്‍ തകര്‍ന്നു. പശുക്കള്‍ ഒലിച്ചുപോയി. ചെളി നീക്കം ചെയ്യാന്‍ നാല്-അഞ്ച് മാസം എടുത്തു. അന്ന് എല്ലാം അവസാനിപ്പിക്കണോ എന്ന് ആലോചിച്ചു. പക്ഷേ മണ്ണിനോടുള്ള സ്നേഹമാണ് ഫാം വീണ്ടും പണിയാന്‍ പ്രചോദനമായത്,' ജയറാം പറഞ്ഞു.

2022 ഓടെ ഫാം പൂര്‍ണമായും പുതുക്കി ലാഭത്തിലേക്ക് കൊണ്ടുവന്നുവെന്നും അതിനാലാണ് വീണ്ടും സംസ്ഥാന അവാര്‍ഡ് ലഭിച്ചതെന്നും അദ്ദേഹം പറഞ്ഞു. കഴിഞ്ഞ ആറു വര്‍ഷമായി കേരള സര്‍ക്കാരിന്റെ 'കേരള ഫീഡ്‌സ്' ബ്രാന്‍ഡ് അംബാസഡറാണ് ജയറാം. 'അത് പോലും വെറുതേ, സിനിമാ നടന്‍ ആണെന്നതിനാലല്ല. പശുക്കള്‍അക്ക് ഏറ്റവും കൂടുതല്‍ കൊടുക്കുന്ന ഉല്‍പ്പന്നമാണ് കേരള ഫീഡ്‌സ്,' അദ്ദേഹം വ്യക്തമാക്കി.

കാലടിയിലെ തോട്ടുവയിലാണ് ജയറാമിന്റെ 'ആനന്ദ് ഫാം'. മുത്തശ്ശി ആനന്ദവല്ലി അമ്മാളിന്റെ പേരിലാണ് ഫാമിന് പേര് നല്‍കിയിരിക്കുന്നത്. നിരവധി ഇനങ്ങളിലുള്ള പശുക്കളാണ് ഇവിടെ വളര്‍ത്തുന്നത്.