ഇനി അധികകാലം അമ്മ തയ്യല്‍ മെഷീന്‍ ചവിട്ടേണ്ടി വരില്ല; ശമ്പളം കിട്ടി തുടങ്ങുമ്പോള്‍ എല്ലാം ശരിയാകും; ആഗ്രഹിച്ചതുപോലെ പോലീസായി... പക്ഷേ; ട്രെയിനിംഗ് ക്യാമ്പിന് പോകുന്നതിന് മുന്‍പ് അമ്മയെ കെട്ടിപിടിച്ച് ആനന്ദ് പറഞ്ഞത്

'പോലീസിന്റെ യൂണിഫോമിട്ട് അമ്മയുടെ മുന്നിലെത്തണം' അതായിരുന്നു അമ്മ ചന്ദ്രികയുടെ ഏറ്റവും വലിയ സ്വപ്‌നം. ഭര്‍ത്താവായ അശോകന്‍ പന്ത്രണ്ടുവര്‍ഷം മുമ്പ് മരിച്ചപ്പോള്‍, മുന്നില്‍ ചെറിയ കുട്ടികളെയും ജീവിതത്തിന്റെ ഭാരം നിറഞ്ഞൊരു ഭാവിയെയും കണ്ടുനില്‍ക്കുകയായിരുന്നു അവള്‍. കുടുംബത്തിന് ആശ്രയമായത് വീട്ടിലെ ഒരു തയ്യല്‍ മെഷീന്‍ മാത്രമാണ്. അതിന്റെ ശബ്ദത്തിനിടയില്‍ ദിനവും രാവും അവള്‍ കഷ്ടപ്പെട്ടു ജോലി ചെയ്തു. ആ വിയര്‍പ്പിന്റെ വിലക്കാണ് ആനന്ദിന്റെയും സഹോദരന്‍ അരവിന്ദിന്റെയും വളര്‍ച്ച. പക്ഷേ, അമ്മ ഏറെക്കാലം കാത്തിരുന്ന ആ നിമിഷം യാഥാര്‍ഥ്യമായില്ല. യൂണിഫോമിട്ട മകന്‍ അമ്മയുടെ കണ്ണിന് മുന്നിലെത്തുന്നതിന് മുന്‍പേ, വെള്ളത്തുണിയില്‍ പൊതിഞ്ഞ നിശ്ചലശരീരമായാണ് വീട്ടിലേക്ക് തിരികെ വന്നത്. അമ്മയുടെ ജീവിതകാലത്തെ സ്വപ്‌നവും മകന്റെ ഭാവിയും ഒരുപോലെ തകര്‍ന്നടിഞ്ഞു.

ഭര്‍ത്താവ് അശോകന്‍ പന്ത്രണ്ടു വര്‍ഷം മുന്‍പ് മരിച്ചപ്പോള്‍, മുന്നില്‍ ചെറുപ്പക്കാരായ രണ്ട് മക്കളും, ജീവിതത്തിന്റെ മുഴുവന്‍ ഭാരവും മാത്രമാണ് ചന്ദ്രികയ്ക്കുണ്ടായത്. കുടുംബത്തെ മുന്നോട്ട് കൊണ്ടുപോകാന്‍ അവള്‍ക്കൊരാശ്രയമായത് വീടിനുള്ളിലെ ഒരു തയ്യല്‍ യന്ത്രം മാത്രം. അതിന്റെ ശബ്ദത്തിനൊപ്പം രാവും പകലും അവള്‍ കഷ്ടപ്പെട്ടു. ഭക്ഷണത്തിനും പഠനത്തിനും മക്കള്‍ക്ക് ഒന്നും കുറവാകാതിരിക്കാനായിരുന്നു ആ അമ്മയുടെ എല്ലാ ശ്രമവും. ആനന്ദും സഹോദരന്‍ അരവിന്ദും അമ്മയുടെ ആ പരിശ്രമം മനസ്സിലാക്കി വളര്‍ന്നു. ബാല്യകാലം മുതല്‍ തന്നെ ആനന്ദ് അമ്മയോട് എപ്പോഴും ചോദിക്കുമായിരുന്നു. അമ്മയ്ക്ക് ഞാന്‍ ആരാകുന്നത് കാണാനാണ് ഏറ്റവും ഇഷ്ടം എന്ന്. അത് ചോദിച്ചപ്പോഴെല്ലാം അമ്മ നല്‍കിയ മറുപടി ഒന്നായിരുന്നു.'നീ ഒരു പോലീസാകണം.'' അമ്മയുടെ ആ സ്വപ്‌നം അവന്റെ മനസ്സില്‍ പതിഞ്ഞു. അതിനെ യാഥാര്‍ഥ്യമാക്കാന്‍ പഠനത്തില്‍ അവന്‍ മിടുക്കനായി, പരീക്ഷകള്‍ വിജയിച്ച് ഒടുവില്‍ പോലീസ് ട്രെയിനിയായും മാറി.

എന്നാല്‍, അമ്മ ഏറെ പ്രതീക്ഷയോടെ കാത്തിരുന്ന നിമിഷം ഒരിക്കലും വന്നില്ല. യൂണിഫോമിട്ട് അമ്മയുടെ മുന്നില്‍ അഭിമാനത്തോടെ നിന്നിരിക്കേണ്ട മകന്‍ വീട്ടിലെത്തിയത് വെള്ളത്തുണിയില്‍ പൊതിഞ്ഞാണ്. പോലീസ് ട്രെയിനിംഗിനിടെ എസ്എപി ക്യാമ്പില്‍ ദുരൂഹസാഹചര്യത്തിലാണ് ആനന്ദിന്റെ ജീവന്‍ അവസാനിച്ചത്. ഇന്ന് അമ്മ ചന്ദ്രികയും സഹോദരന്‍ അരവിന്ദും ആ സംഭവത്തിന്റെ ദുഖത്തില്‍ തളര്‍ന്ന് കഴിയുകയാണ്. വര്‍ഷങ്ങളോളം തന്റെ മകനിലൂടെ സാധിക്കാനിരുന്ന സ്വപ്‌നം പാതിവഴിക്ക് അവസാനിച്ചിരിക്കുകയാണ്. പഠനത്തില്‍ എപ്പോഴും മിടുക്കനായിരുന്ന ആനന്ദ്, ഉഴമലയ്ക്കല്‍ സ്‌കൂളിലും പിന്നീട് ചെമ്പഴന്തി എസ്.എന്‍ കോളേജിലും നല്ല മാര്‍ക്കോടെയാണ് പ്ലസ്ടുവും ഡിഗ്രിയും പൂര്‍ത്തിയാക്കിയത്. അമ്മയുടെ സ്വപ്‌നം തന്റെ ജീവിതലക്ഷ്യമാക്കി ഒരിക്കലും പഠനത്തില്‍ വിട്ടുവീഴ്ച ചെയ്തില്ല. പോലീസാകണമെന്നത് അമ്മയുടെ ആഗ്രഹമത്രമല്ല, അത് തന്റെ കടമയാണെന്നു പോലെ ആനന്ദ് കരുതിയിരുന്നു. ഒടുവില്‍ പരീക്ഷയെഴുതി വിജയിക്കുകയും പോലീസ് ട്രെയിനിംഗിന് തിരഞ്ഞെടുക്കപ്പെടുകയും ചെയ്തപ്പോള്‍, കുടുംബത്തിന്റെ വര്‍ഷങ്ങളായ സ്വപ്‌നങ്ങള്‍ യാഥാര്‍ഥ്യമായി.

ട്രെയിനിയായി പോകണം എന്ന വിവരം അറിഞ്ഞ ദിവസം, വീട്ടിലെത്തി അമ്മയെ കെട്ടിപ്പിടിച്ച് ആനന്ദ് പറഞ്ഞത്  'ഇനി അധികകാലം അമ്മ ഈ തയ്യല്‍ മെഷീന്‍ ചവിട്ടേണ്ടി വരില്ല. എന്റെ ശമ്പളം കിട്ടി തുടങ്ങുമ്പോള്‍ അമ്മക്ക് ഇനി ബുദ്ധിമുട്ടുകളൊന്നും ഉണ്ടാകില്ല. എല്ലാം ശരിയാകും.'' അമ്മയുടെ കണ്ണുനിറയിപ്പിച്ച ആ വാക്കുകള്‍ അവളെ ആശ്വാസത്തോടും അഭിമാനത്തോടും നിറച്ചു. പക്ഷേ, അത്രയും പ്രിയപ്പെട്ട ആ സ്വപ്‌നം ഏറെക്കാലം നിലനിന്നില്ല. ചില മേലുദ്യോഗസ്ഥരുടെ തിണ്ണമിടുക്കും അനീതി നിറഞ്ഞ സമീപനവുമാണ് കുടുംബത്തിന്റെ പ്രതീക്ഷകള്‍ തകര്‍ത്തത്. അമ്മയുടെ ജീവിതം മുഴുവന്‍ ആശ്രയിച്ചിരുന്ന പ്രതീക്ഷകള്‍ ഒരുമിച്ചാണ് ചിതറിപ്പോയത്.

'എല്ലാം ശരിയാകും'' എന്ന് അമ്മയെ ഉറപ്പുനല്‍കി പറഞ്ഞിട്ട് വെറും മൂന്ന് മാസം കഴിഞ്ഞപ്പോഴാണ് ആനന്ദിന്റെ ജീവിതം ദുരൂഹ സാഹചര്യങ്ങളില്‍ അവസാനിച്ചത്. കുടുംബം ഇന്നും വിശ്വസിക്കാന്‍ കഴിയാത്ത വിധത്തില്‍ എല്ലാം പെട്ടെന്നായിരുന്നു. ഓണാവധി കഴിഞ്ഞ് ക്യാമ്പിലേക്ക് മടങ്ങിയ ദിവസം, വെറും അരമണിക്കൂര്‍ വൈകിയെത്തിയെന്ന കാരണത്തിന് ആനന്ദിനെ പുറത്താക്കിയിരുന്നു. അത് വരെ മികച്ച രീതിയില്‍ പരിശീലനം നടത്തിക്കൊണ്ടിരുന്ന മകനെ ചെറിയൊരു കാര്യത്തിന് ഇങ്ങനെ പുറത്താക്കിയത് കുടുംബത്തിന് മനസ്സിലാകാത്ത കാര്യമാണെന്ന് അമ്മ പറയുന്നു. അടുത്ത ദിവസം രാവിലെ, പരിശീലന ഗ്രൗണ്ടില്‍ ശിക്ഷയായി അവനെ നാല് വട്ടം ഓടിച്ചു. അതിനു പിന്നാലെ, നേരത്തെയുണ്ടായിരുന്ന ടീമില്‍ നിന്നും മാറ്റി. ക്യാമ്പിലെ മേലുദ്യോഗസ്ഥരില്‍ നിന്നും പലപ്പോഴും അനാവശ്യമായ കടുത്ത സമീപനം നേരിട്ടിരുന്നു. എന്നാല്‍ ഇതൊന്നും ആനന്ദിനെ തളര്‍ത്തിയില്ല. എന്നാല്‍ ചിലര്‍ കാണിച്ചിരുന്ന ജാതിവിവേചനമാണ് മകന്റെ മനസില്‍ വലിയ ഭാരമായി മാറിയതെന്നും ബന്ധുക്കള്‍ പറയുന്നുണ്ട്. 

മകന്‍ യൂണിഫോമിട്ട് അഭിമാനത്തോടെ ജീവിക്കണമെന്ന അമ്മയുടെ സ്വപ്‌നം യാഥാര്‍ഥ്യമാകേണ്ട സമയത്ത്, അനീതിയും ദുരൂഹതകളും ചേര്‍ന്ന സംഭവങ്ങളാണ് ആ സ്വപ്‌നം തകര്‍ത്തത്. ഇപ്പോഴും ആ ദിവസങ്ങളിലെ സംഭവങ്ങളെ കുറിച്ചുള്ള ചോദ്യങ്ങള്‍ക്ക് കുടുംബത്തിനുള്ളില്‍ മറുപടിയില്ല. മകന്റെ വേര്‍പാടില്‍ ദുഃഖിച്ച് കഴിയുകയാണ് ആ അമ്മ. അനിയനെ നഷ്ടമായതിന്റെ സങ്കടത്തിലാണ് ചേട്ടന്‍ അരവിന്ദും.